ރަޝިޔާއިން ޔޫކްރެއިންގައި ކުރަމުންދާ ހަނގުރާމައިގައި ބޭނުން ކުރުމަށް ރަޝިޔާއަށް ހަތިޔާރު ވިއްކުން ވެގެންދާނީ އުތުރު ކޮރެޔާއިން ހިތާމަކުރާނެ އަމަލަކަށް ކަމަށް ބުނެ، އެމެރިކާއިން އުތުރު ކޮރެޔާއަށް ބިރު ދައްކައިފިއެވެ. ވައިޓް ހައުސްގެ އިސް އޮފިޝަލެއް މި މޭރުމުން ވާހަކަފުޅު ދައްކަވާފައި މި ވަނީ، އުތުރު ކޮރެޔާއިން ރަޝިޔާއަށް ހަތިޔާރު ވިއްކުމާ ގުޅޭ ގޮތުން ދެ ޤައުމުގެ ދެމެދުގައި މަޝްވަރާތައް ކުރަމުންދާ ކަމަށް އެމެރިކާއިން ތުހުމަތު ކުރަމުންދާ ދަނޑިވަޅެއްގައެވެ.
އެމެރިކާގެ ޤައުމީ ސަލާމަތާ ބެހޭ މުޝީރު ޖޭކް ސަވިލަން ވިދާޅުވީ އަސްކަރީ އެހީއާއި ހަތިޔާރުގެ ވިޔަފާރިއާ ގުޅޭ ގޮތުން ރަޝިޔާއާއި އުތުރު ކޮރެޔާއާ ދެމެދު ކުރަމުންދާ މަޝްވަރާތަކުގައި ކުރިއެރުންތަކެއް ހޯދާފައިވާ ކަން އެމެރިކާއަށް އެނގޭ ކަމުގައެވެ. އަދި، އުތުރުން ރަޝިޔާއަށް ހަތިޔާރު ފޯރުކޮށްދީފި ނަމަ، އެ ކަމުގެ ބަދަލުގައި އުތުރަށް "ބޮޑު އަގެއް" ދައްކަން ޖެހޭނެ ކަމަށް ބުނެ އޭނާ ވަނީ އިންޒާރު ދެއްވާފައެވެ.
"ޔޫކްރެއިންގެ ގޮވާން ރައްކާކުރާ ސައިލޯ ނުވަތަ ގުދަންތަކަށާއި، ޢާންމު ރައްޔިތުންނަށް ކަރަންޓު ފަދަ އަސާސީ ޚިދުމަތްތައް ދިނުމަށް ބޭނުންކުރާ ވަސީލަތްތަކަށް ހަމަލަދޭން ރަޝިޔާއިން އުތުރު ކޮރެޔާގެ ހަތިޔާރުތައް ބޭނުން ކުރަން ފަށައިފި ނަމަ، އުތުރުން އެ ކަމުގެ ޒިންމާ އުފުލަން ޖެހޭނެ. އަދި އޭގެ ބަދަލުގައި ބޮޑު އަގެއް ދައްކަން ޖެހޭނެ،" ސަލިވަން ވިދާޅިވިއެވެ.
އޭނާ މިހެން ވިދާޅުވެފައި މި ވަނީ، އުތުރު ކޮރެޔާގެ ޒައީމް ކިމް ޖޮންގް އުން ރަޝިޔާއަށް ދަތުރުފުޅެއް ކުރައްވައި، އެ ޤައުމުގެ ރައީސް ވްލަޑިމިޔަރ ޕުޓިންއާ ބައްދަލު ކުރައްވަން ރާވާފައިވާ ކަމަށް އެމެރިކާއިން ބުނަމުންދާ ދަނޑިވަޅެއްގައެވެ. ރަޝިޔާއާއި އުތުރު ކޮރެޔާއިން މި ތުހުމަތުތަކަކީ ހަޤީޤަތެއް ކަން ކަށަވަރު ކޮށްދީފައެއް ނުވެއެވެ.
މި ކަމާ ގުޅޭ ގޮތުން ކްރެމްލިނުން ބުނީ، ދެ ޤައުމެއްގެ އިސްވެރިންގެ މެދުގައި ދެކެވޭ މަޝްވަރާތަކާއި، ކުރައްވާ ބައްދަލުވުންތަކާ ގުޅޭ ގޮތުން ވާހަކަ ދައްކަން ބޭނުން ނުވާ ކަމުގައެވެ. ނަމަވެސް، އުތުރާއި ރަޝިޔާއާ ދެމެދު އޮތް ގުޅުންތައް ބަދަހި ކުރަމުންދާ ކަން، ދެ ޤައުމުގެ ދެމެދުގައި ބާއްވަމުންދާ ދަތުރުތަކާއި މަޝްވަރާތަކުން ހާމަވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
މި އަހަރުގެ ޖުލައި މަހުގެ ތެރޭގައި ރަޝިޔާގެ ދިފާޢީ ވަޒީރު ސަރްޖޭ ޝޮއިގޫ ވަނީ ޗޮންގްޔަންގަށް ޒިޔާރަތް ކުރައްވައި ކިމްއާ ބައްދަލު ކުރައްވާފައެވެ. އަދި، ދެ ޤައުމުގެ ދެމެދުގައި އަސްކަރީ ދާއިރާއިން ގުޅުން ބަދަހިކުރުމާ ގުޅޭ ގޮތުން މަޝްވަރާ ކުރައްވާފައެވެ.
އެމެރިކާގެ ޚާރިޖީ ވުޒާރާގެ ތަރުޖަމާނު ވެދާންތް ޕަޓޭލް ވެސް ދާދިފަހުން ވަނީ ރަޝިޔާއާ އެކު އަސްކަރީ ގުޅުންތައް ބަދަހިކުރުން ހުއްޓައިލުމަށް ގޮވައިލާ، އުތުރު ކޮރެޔާއަށް އިންޒާރު ދެއްވާފައެވެ. އޭނާ ވިދާޅުވީ، އުތުރު ކޮރެޔާއިން ހަތިޔާރު ގަންނަން ރަޝިޔާއިން މަސައްކަތް ފެށުމަކީ، ރަޝިޔާއާ ދެކޮޅަށް ހުޅަނގުން އަޅާފައިވާ ދަތި ކުރުމުގެ ފިޔަވަޅުތައް ކާމިޔާބުވެފައިވާ ކަމުގެ ނިޝާނެއް ކަމުގައެވެ.
އެމެރިކާ އިސްވެ، ރަޝިޔާއާ ދެކޮޅަށް ހުޅަނގުގެ ބާރުތަކުން ދަތިކުރުމުގެ ފިޔަވަޅުތައް އަޅާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާގެ ސިފައިން ޔޫކްރެއިނަށް އަރައި ފެށި ހަނގުރާމައާ ގުޅިގެންނެވެ. މި ހަނގުރާމައިގައި ބޭނުން ކުރަން އުތުރު ކޮރެޔާއިން ރަޝިޔާއަށް ހަތިޔާރު ވިއްކައިގެން ނުވާނެ ކަމަށް އެމެރިކާއިން ބުނަމުން ދިޔަ ނަމަވެސް، ޔޫކްރެއިނުން ބޭނުންކުރާ ހުރިހާ ހަތިޔާރެއް އެ ޤައުމަށް ފޯރުކޮށްދެމުން ދަނީ އެމެރިކާއާއި ނޭޓޯގެ މެންބަރު ޤައުމުތަކުން ކަން ފާހަގަކޮށްލަން ޖެހެއެވެ.