ރަޝިޔާއާއި ޔޫކްރެއިންގެ ފައުޖުތަކުގެ ދެމެދުގައި އެންމެ ވަރުގަދައަށް ހަމަލަ ބަދަލު ކުރަމުންދާ އެއް ސަރަޙައްދު ކަމުގައިވާ ބަޚްމުތަށް ޔޫކްރެއިންގެ ރައީސް ވޮލޮޑޮމީރް ޒެލެންސްކީ ޒިޔާރާތް ކުރައްވައިފިއެވެ. ބަޚްމުތަކީ ޔޫކްރެއިންގެ އިރުމަތީގައި އޮންނަ ދޮނެޓްސްކުގެ ރަށެކެވެ. ދޮނެޓްސްކުގެ ބޮޑު ބައެއް މި ވަގުތު އޮތީ ރަޝިޔާ ސިފައިންގެ އަތްދަށުގައެވެ.
ބަޚްމުތަށް ޒެލެންސްކީ ކުރެއްވި ދަތުރުފުޅުގެ ބޭނުމަކީ ރަޝިޔާގެ އިސްތިޢުމާރީ ސިފައިންނާ ދެކޮޅަށް ޔޫކްރެއިނުން ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭންގައި ބައިވެރިވާ އެ ޤައުމުގެ ސިފައިންނާ ބައްދަލު ކުރެއްވުމެވެ. އަދި، އެ ކެމްޕޭނުގެ ދަށުން އޭނާގެ ސިފައިން ހޯދަމުންދާ ކާމިޔާބީތަކަށް މަރުޙަބާ ވިދާޅުވެ، ހިތްވަރު ދެއްވުމެވެ.
ބަޚްމުތަށް ކުރެއްވި ދަތުރުފުޅުގައި އެ ސަރަޙައްދުގައި ހަރަކާތްތެރިވާ ޔޫކްރެއިންގެ ފައުޖުތަކުގެ އިސް ކޮމާންޑަރުންނާ ޒެލެންސްކީ ބައްދަލު ކުރެއްވި ކަމަށާއި، ކައުންޓަރއޮފެންސިވާ ގުޅޭ އެންމެ ފަހުގެ މަޢުލޫމާތު ސާފު ކުރެއްވި ކަމުގައި ކީވުން ބުނެއެވެ. އަދި، ކައުންޓަރއޮފެންސިވްގައި ބައިވެރިވަމުންދާ ބައެއް ސިފައިންނަށް އޭނާ ވަނީ މެޑެއްޔާއިން އެވޯޑުތައް ހަވާލު ކޮށްދެއްވާފައެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށުމުގެ ކުރިން ބަޚްމުތަކީ 70,000 މީހުންގެ އާބާދީއެއް ދިރިއުޅެމުން ދިޔަ ސިނާޢީ މަސައްކަތްތަކަށް މަޝްހޫރު ރަށެކެވެ. ނަމަވެސް، 10 ވަރަކަށް މަހަށް ދެމިގެންދިޔަ ލޭއޮހޮރުވުން ބޮޑު ހަނގުރާމައަކަށް ފަހު ރަޝިޔާ ސިފައިން ވަނީ އެ ރަށް ހިފާފައެވެ. މި ހަނގުރާމައިގައި އެ ރަށް ވަނީ ސުންނާފަތިވެފައެވެ.
ޒެލެންސްކީ ދޮނެޓްސްކަށް ދަތުރުފުޅެއް ކުރައްވާފައި މި ވަނީ، އެ ޤައުމުގެ ދިފާޢީ ވުޒާރާއަށް އޭނާ ބޮޑެތި ބަދަލުތަކެއް އިޢުލާނު ކުރައްވާފައިވާ ދަނޑިވަޅެއްގައެވެ. މި ގޮތުން، އެ ޤައުމުގެ ދިފާޢީ ވަޒީރު ކަމުގެ މަޤާމު ފުރުއްވަމުން ގެންދެވި އޮލެކްސީ ރޭޒްނިކޮފް އެ މަޤާމުން ވަކި ކުރައްވަން ނިންމަވާފައިވާ ކަން ޒެލެންސްކީ ވަނީ ދާދިފަހުން އިޢުލާނު ކުރައްވާފައެވެ. އަދި، އެ މަޤާމަށް 41 އަހަރުގެ ރުސްތެމް އުމެރޮވް ޢައްޔަން ކުރުމަށް އެ ޤައުމުގެ ޤާނޫނު ހަދާ މަޖިލީހުގެ ރުހުން ހޯދުމަށް ފޮނުއްވާފައެވެ.
ރޭޒްނިކޮފަކީ ރަޝިޔާ-ޔޫކްރެއިން ހަނގުރާމައާ ގުޅިގެން އެ ޤައުމަށް ބޭރުގެ އަސްކަރީ އެހީ ހޯދުމުގައި އިސް ދައުރެއް އަދާ ކުރައްވާފައިވާ ބޭފުޅެކެވެ. ދިފާޢީ ވަޒީރު ކަމުގެ މަޤާމާ އޭނާ ހަވާލުވެ ވަޑައިގަންނަވާފައި ވަނީ 2021 ވަނަ އަހަރުގެ ނޮވެންބަރު މަހުއެވެ. ނަމަވެސް، އޭނާގެ މައްޗަށް ކޮރަޕްޝަންގެ ގިނަ ތުހުމަތުތަކެއް ކުރެވިފައިވާ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ދިފާޢީ ވަޒީރު ކަމުގެ މަޤާމުން ރޭޒްނިކޮފް ވަކި ކުރައްވަން ޒެލެންސްކީ ނިންމަވާފައި މި ވަނީ، ކޮރަޕްޝަނާ ދެކޮޅަށް އޭނާ ފައްޓަވާފައިވާ މަސައްކަތްތަކުގެ ދަށުން ކަމަށް ކީވުން ބުނެއެވެ. ޔޫކްރެއިނުން ވިލާތުގެ އިއްތިހާދު (އީ.ޔޫ)ގެ މެންބަރު ކަން ހޯދުމަށް ހުށަހަޅާފައިވާއިރު، ކޮރަޕްޝަން ނައްތައިލަން މަސައްކަތް ކުރުމަކީ އެ އިއްތިހާދާ ގުޅުމުގެ ކުރިން ޔޫކްރެއިނުން ފަށަން ޖެހޭ މަސައްކަތެކެވެ.
ރަޝިޔާ-ޔޫކްރެއިން ހަނގުރާމައަށް 559 ދުވަސް ފާއިތުވެފައިވާއިރު، ރަޝިޔާގެ ފައުޖުތަކުން ވަނީ ޔޫކްރެއިންގެ މައި ތިން ސަރަޙައްދަކަށް އަތްގަދަކޮށްފައެވެ. އެއީ އިރުމަތީގައިވާ ދޮންބާސްގައި ހިމެނޭ މައި ދެ ސަރަޙައްދު ކަމުގައިވާ ލުހާންސްކާއި ދޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއެވެ. ރަޝިޔާއިން ވެރިވެގަނެފައިވާ ސަރަޙައްދުތައް މިނިވަން ކުރަން ޔޫކްރެއިނުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ހިންގަމުންނެވެ.