އެންމެ ކުދި ވިޔަފާރިތަކުން ޓެކްސް ކަނޑާލާނަން: ޢުމަރު
-
ރައްޔިތުންނަށް އޮތް ބުރައަކަށް ދައުލަތް ނުވާނެކަމަށް
-
އޭނާގެ ވެރިކަމެއްގައި މަގުތައް އަމާން ވާނެކަމަށް
ވެރިކަމަށް ވަޑައިގެންނެވިއްޖެނަމަ އެންމެ ކުދި ވިޔަފާރިތަކުން ނަގާ ޓެކްސް ނުނަންގަވާނެކަމަށް ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ކެންޑިޑޭޓް ޢުމަރު ނަސީރު ވިދާޅުވެއްޖެއެވެ. ޢުމަރު މިހެން ވިދާޅުވީ، ވިލިމާލޭގައި ބޭއްވި ނެއިބަހުޑް ބައްދަލުވުމުގައި ވާހަކަދައްކަވަމުންނެވެ.
ޢުމަރު ވިދާޅުވީ، އެމަނިކުފާނުގެ ވެރިކަމެއްގައި ރާއްޖެ އިޤްތިޞާދީގޮތުން އެހެން މިސްރާބަކަށް ގެންގޮސްދޭނެކަމަށެވެ. އަދި އެއްވެސް ހާލަތެއްގައި ދައުލަތް ރައްޔިތުންނަށް އޮތް ބުރައަކަށް ނުވާނެކަމަށް ޢުމަރު ވިދާޅުވިއެވެ. އެހެންކަމުން ކުދި ވިޔަފާރިތަކަށް ވިޔަފާރިކުރުމަށް ފަހި މާހައުލެއް ޤާއިމްކޮށްދީ، އެފަދަ ވިޔަފާރިތަކުން ޓެކްސް ނުނަންގަވާނެކަމަށްވެސް ޢުމަރު ވަނީ ވިދާޅުވެފައެވެ.
"މި ޤައުމުގެ އިޤްތިސާދު މުޅިން އެހެން ހިސާބަކަށް އަޅުގަނޑު ހިއްލާލާނަން. ޓްރާންޝިޕްމަންޓް ބަނދަރު އަޅުގަނޑު ހަދާނެ. މިހިރަ ކުދިކުދި ފިހާރަތަކަކުން ޓެކްސްއެއް ނުނަގާނެ އަޅުގަނޑުގެ ވެރިކަމަކުއެއް. މި ކުދިކުދި ފިހާރަތަކުގެ ޓެކްސްއެއް އަޅުގަނޑު ކަނޑާލާނެ. ދައުލަތަކީ މީހުންނަށް ބުރަވާ އެއްޗަކަށް އަޅުގަނޑު ނަހަދާނެ. ޤަވައިދުތަކާއި އެއްޗެހި އަޅުގަނޑު ބަދަލުކުރާނެ.” ޢުމަރު ވިދާޅުވިއެވެ.
ޢުމަރު ވިދާޅުވީ، އޭނާގެ ވެރިކަމެއްގައި މަގުތައް އަމާންކުރާނެކަމަށެވެ. އަދި ޤައުމުގައި ތިބިކަމަށް ބުނާ ބިދޭސީ ސިފައިންގެ މައްސަލަވެސް ހައްލު ކުރެވޭނީ އޭނާއަށްކަމަށް ވަނީ ވިދާޅުވެފައެވެ.
އޭނާ ވާހަކަދައްކަވަނީ ހައްޤަށްކަން ފާހަގަކުރައްވައި ޢުމަރު ވިދާޅުވީ، ހައްޤަށް ނަސްރު ލިބޭނެކަމަށެވެ. އޭނާގެ ފަހަތުގައި ގިނަ ބަޔަކު ނެތްނަމަވެސް ގިނަ ދިވެހިން އޭނާގެ ސިޔާސަތުތަކަށް ތާއީދުކުރާކަމަށް ޢުމަރު ވަނީ ވިދާޅުވެފައެވެ.