ދުރާލާ ވިސާ ނެގުމަކާ ނުލައި ދިވެހިންނަށް މިހާރު ކިރިގިސްތާނަށް ދެވޭނެ

ދުރާލާ ވިސާ ނެގުމަކާއި ނުލައި ދިވެހިންނަށް ކިރިގިސްތާނަށް 30 ދުވަހުގެ މުއްދަތަކަށް އެތެރެވެވޭނެ އިންތިޒާމް ހަމަޖައްސައިފިއެވެ. މިގޮތައް ހަމަޖައްސާފައިވަނީ މިއަދުން ފެށިގެންނެވެ.

ވިސާއާއި ނުލާ ކިރިގިސްތާނަށް ދިވެހިންނަށް ދަތުރުކުރެވޭ އިންތިޒާމް ހަމަޖައްސާފައިވަނީ 2 ގައުމުގެ މެދުގައި ވެފައިވާ އެއްބަސްވުމުގެ ދަށުންނެވެ. އެގޮތުން 23 ސެޕްޓެމްބަރ 2022 ގައި ވަނީ 2 ޤައުމުގެ މެދުގައި ވިސާއާއި ނުލާ ދަތުރުކުރެވޭ އެއްބަސްވުމެއް ޤާއިމްކޮށްފައެވެ.

ދުރާލާ ވިސާ ނެގުމަކާއި ނުލާ ދިވެހިންނަށް ކިރިގިސްތާނަށް ދަތުރުކުރެވޭ އިންތިޒާމް ހަމަޖައްސާފައިވީނަމަވެސް ދިގު މުއްދަތަކަށް ދަތުރުކުރާ ފަރާތްތަކާއި، ތައުލީމު ފަދަ ކަންކަމަށް ދަތުރުކުރާނަމަ ދުރާލާ ވިސާ ޖަހަންޖެހޭނެއެވެ.

ދިވެހިންނަށް ރާއްޖެއިން ބޭރުގެ ގިނަ ޤައުމުތަކަކަށް ވިސާއާއި ނުލާ ފަސޭހައިން ދަތުރުކުރެވޭ އިންތިޒާމް ހަމަޖެއްސުމުގެ ގޮތުން ސަރުކާރުން ދަނީ ވިސާ ފްރީ އެއްބަސްވުންތައް ޤާއިމްކުރަމުންނެވެ. އެގޮތުން މިމަހުގެ ތެރޭގައި ވިސާއާއި ނުލައި ދިވެހިންނަށް 30 ދުވަހަށް މޮންގޯލިއާއަށް ދެވޭނެ އެއްބަސްވުމެއްގައިވެސް ވަނީ ސޮއިކޮށްފައެވެ.