ހުޅަނގު އެފްރިކާގެ ޤައުމެއް ކަމުގައިވާ ނީޜޭގެ ވެރިކަން ބަޣާވާތަކުން ވައްޓައިލުމާ ގުޅިގެން ކަންބޮޑުވުން ފާޅުކޮށް ބައިނަލްއަޤުވާމީ މުޖުތަމަޢުގެ ފާޑުކިޔުންތައް އެ ޤައުމުގެ އަސްކަރިއްޔާއަށް ކުރިމަތިވަމުން އެބަދެއެވެ. ބަޣާވާތެއްކޮށް ނީޜޭގެ ރައީސް މުޙައްމަދު ބަޒޫމް ހައްޔަރުކޮށްފައިވާ ކަން އެ ޤައުމުގެ އަސްކަރިއްޔާއިން ވަނީ އިޢުލާނުކޮށްފައެވެ. އޭނާ ހައްޔަރުކޮށް ބަހައްޓާފައި ހުރީ ރިޔާސީ ގަނޑުވަރުގައި ކަމަށް ބެލެވެއެވެ.
ބަޣާވާތަކުން ނީޜޭގެ ވެރިކަން ވައްޓައިލާފައިވާ ކަން އިޢުލާނުކޮށްފައި ވަނީ ދައުލަތުގެ މީޑިޔާ މެދުވެރިކޮށް ކުރި އިޢުލާނެއްގައި އެ ޤައުމުގެ އަސްކަރިއްޔާގެ އިސް އޮފިޝަލެއް ކަމުގައިވާ ކާނަލް އަމަދޫ ޢަބްދުއްރަޙްމާނެވެ. އޭނާ ބުނީ ބަޒޫމް ވެރިކަމުން ދުރުކޮށްފައި ވަނީ ޤައުމުގެ ސަލާމަތީ ކަންކަން ބޮއްސުންލުމާ ގުޅިގެ ކަމަށާއި، ސަރުކާރު ހިންގުމުގައި އިންސާފުވެރިކަމެއް ނެތުމުން ކަމުގައެވެ.
ބަޣާވާތެއް ކޮށް ބަޒޫމް ހައްޔަރު ކުރުމަށް ފަހު ނީޜޭގެ އަސްކަރިއްޔާއިން ވަނީ އެ ޤައުމުގެ ބޯޑަރުތައް ވެސް ބަންދުކޮށްފައެވެ. އަދި، ދަޢުލަތުގެ ހުރިހާ މުއައްސަސާއެއް ސަސްޕެންޑު ކޮށް، މުޅި ޤައުމުގައި ކާފިޔުއެއް އިޢުލާނުކޮށްފައެވެ. އަދި، ރައީސް ބަޒޫމް މިނިވަން ކުރަން ބޭރު ޤައުމަކުން މަސައްކަތް ކުރުމާ ދެކޮޅަށް ވެސް އަސްކަރިއްޔާއިން ވަނީ އިންޒާރުދީފައެވެ.
ބަޣާވާތެއް ކޮށް ނީޜޭގެ އިންތިޚާބީ ރައީސް ބަޒޫމްގެ ސަރުކާރު ވައްޓައިލުމާ ގުޅިގެން ބައިނަލްއަޤުވާމީ މުޖުތަމަޢުން ވަނީ ކަންބޮޑުވުން ފާޅުކޮށްފައެވެ. ފަރަންސޭސިވިލާތުން ވަނީ ބަޒޫމް މިނިވަން ކޮށް، ޤާނޫނީ ވެރިކަން ނެގެހެއްޓުމަށް ނީޜޭގެ އަސްކަރިއްޔާއަށް ގޮވައިލާފައެވެ. 1960 ވަނަ އަހަރާ ޖެހެންދެން ނީޜޭ އޮތީ ފަރަންސޭސީންގެ އިސްތިޢުމާރީ އަޅުވެތިކަމުގެ ދަށުގައެވެ.
ރަޝިޔާގެ ޚާރިޖީ ވަޒީރު ސިރްގިޔޭ ލެވްރޮފް ވެސް ވަނީ ޤާނޫނީ ސަރުކާރު ދެމެހެއްޓުމަށް ނީޜޭގެ އަސްކަރިއްޔާއަށް ގޮވައިލާފައެވެ. އެމެރިކާގެ ނައިބު ރައީސް ކަމަލާ ހެރިސް ވިދާޅުވީ އެ ޤައުމުން ނީޜޭގެ ސަރުކާރާ އެކު ބާއްވާ ގުޅުންތައް ދަމަހައްޓާނީ ޑިމޮކުރަސީގެ ހަމަތަކަށް ރުޖޫއަވުމުން ކަމުގައެވެ. އަދި، ނީޜޭގެ ދާޚިލީ ހާލަތު ހަމައަކަށް އަޅުވަން އ.ދގެ ސަލާމަތީ މަޖިލީހާ އެކު މަސައްކަތް ކުރާނެ ކަމަށް އ.ދގައި ހުންނަ އެމެރިކާގެ މިޝަނުން ވެސް ބުނެފައިވެއެވެ.
އެފްރިކާގެ އިއްތިހާދު (އޭ.ޔޫ) ކޮމިޝަނުގެ ރައީސް މޫސާ ފަޤީ މުޙައްމަދު ވިދާޅުވީ ރައީސް ބަޒޫމާ ފޯނުން ގުޅުއްވައި ވާހަކަފުޅު ދެއްކެވުމުގެ ފުރުޞަތު ލިބިވަޑައިގެންނެވި ކަމުގައެވެ. އަދި، ބަޒޫމްގެ ހާލުކޮޅު ރަނގަޅު ކަމުގައި ވެސް އޭނާ ވިދާޅުވިއެވެ.
ނީޜޭގެ ރައީސް ބަޒޫމާ ދެކޮޅަށް ބަޣާވާތް ފަށާފައި ވަނީ އޭނާގެ ޕްރެޒިޑެންޝަލް ގާޑުންނެވެ. އެއަށް ފަހު އެ ޤައުމުގެ އަސްކަރިއްޔާއިން ވަނީ ބަޣާވާތުގައި ބައިވެރިވެފައެވެ. މިއީ، 2020 ވަނަ އަހަރަށް ފަހު ހުޅަނގާއި މެދުތެރޭ އެފްރިކާގެ ޤައުމުތަކުގެ ސަރުކާރުތައް ބަޣާވާތްކޮށް ވައްޓައިލާފައިވާ ހަތްވަނަ ފަހަރެވެ. ނީޜޭގެ ސަރުކާރަކީ އެމެރިކާއާ އެކު ގާތް ގުޅުމެއް ބާއްވަމުން ދިޔަ ސަރުކާރެއް ކަން ފާހަގަކުރެއެވެ.
އަސްކަރީ ބަޣާވާތަކުން ބަޒޫމްގެ ސަރުކާރު ވައްޓައިލުމާ ގުޅިގެން އޭނާގެ ސަރުކާރާ ދެކޮޅު ފަރާތްތަކުން ވަނީ ވެރިރަށް ނިޔަމޭގެ މަގުތަކަށް ނިކުމެ އުފާފާޅުކޮށްފައެވެ. އަދި، ވެރިކަން ކުރާ ޕާޓީގެ މައި އޮފީހަށް ގެއްލުންދީ، އެ ތަނުގައި ހުޅު ޖަހާފައެވެ. މުޒާހަރާ ކުރާ މީހުން އެ ޤައުމުގެ ޤާނޫނު ހަދާ މަޖިލީހުގެ އިދާރާ ކައިރިއަށް ވެސް ޖަމާވިއެވެ. ނަމަވެސް، އަސްކަރިއްޔާއިން މިހާރު ވަނީ ކަރފިޔު ހިންގައި، އެއްވުންތައް ރޫޅައިލާފައެވެ.