އިންޑިޔާގެ ހުޅަނގުގައިވާ މަހަރާޝްތްރާ ސްޓޭޓްގައި ހިނގި ނުރައްކާތެރި ބިންގަނޑު ކެނޑުމާއި ކިސަޑު ފޭބުމުގެ ހާދިސާގައި ގެއްލުނު ކަމަށް ބެލެވޭ 100 އެއްހާ މީހުންގެ ތެރެއިން ގިނަ މީހުން އަދިވެސް ނުފެންނަ ކަމަށާއި، ދިރިތިއްބާ އެ މީހުން ސަލާމަތް ކުރެވޭނެ ކަމުގެ އުންމީދު ފަނޑުވަމުންދާ ކަމުގައި އޮފިޝަލުން ވިދާޅުވެއްޖެއެވެ. ބިންގަނޑު ކެނޑުމުގެ ހާދިސާ ހިނގާފައި ވަނީ މަހަރާޝްތްރާ ސްޓޭޓްގެ އިރްޝާލްވާދީގެ ފަރުބަދަމަތީ ހިސާބެއް ކަމުގައިވާ ރާއިގަރުގައެވެ.
ބިންގަނޑު ކެނޑުމާއި ކިސަޑު ފޭބުމުގެ ހާދިސާގައި މަރުވި މީހުންގެ ޢަދަދު މިހާރު ވަނީ 22 އަށް އަރާފައެވެ. އޭގެ ތެރޭގައި އެއް ޢާއިލާއަކަށް ނިސްބަތްވާ 10 މެންބަރުން ހިމެނެއެވެ. އެ ސަރަޙައްދަކީ 225 ވަރަކަށް މީހުން ދިރިއުޅޭ 50 އެއްހާ ގެ ހުންނަ ހިސާބެކެވެ. ބިންގަނޑު ކެނޑި، އެ ސަރަޙައްދުގައި ހުންނަ 17 އެއްހާ ގެ ވަނީ ކިސަޑުތަކުގެ ދަށުވެފައެވެ. އެ ޢިމާރާތްތަކުގެ ދަށުގައި ގިނަ ޢަދަދެއްގެ ބަޔަކު ތާށިވެފައިވާ ކަމަށް ބެލެވޭ ކަމުގައި މަހަރާޝްތްރާގެ އޮފިޝަލުން ވިދާޅުވެއެވެ.
ކިސަޑުތަކުގެ ދަށުގައި ތާށިވެފައިވާ މީހުން ސަލާމަތް ކުރުމުގެ މަސައްކަތް ކުރަމުންދާއިރު، ބޯކޮށް ވާރޭވެހުމާ ގުޅިގެން އެ މަސައްކަތަށް ދަނީ ހުރަސް އެޅެމުންނެވެ. އަދި، އެއީ ފަރުބަދަމަތީ ސަރަޙައްދަކަށް ވުމުގެ ސަބަބުން އެ ސަރަޙައްދަށް އެކްސްކަވޭޓަރު ފަދަ ވަސީލަތްތައް ގެންދަން ދަތިވެފައިވާ ކަމުގައި އެ ޤައުމުގެ ނޭޝަނަލް ޑިޒާސްޓަރ ރެސްޕޮންސް ފޯސްއިން ބުނެއެވެ.
އިރްޝާލްވާދީގައި ބިންގަނޑު ކެނޑިފައި ވަނީ ރޭގަނޑުގެ ވަގުތު ގިނަ މީހުން ނިދާފައި ތިއްބައެވެ. ކިސަޑުތަކުގެ ދަށުގައި ތާށިވެފައިވާ މީހުން ސަލާމަތް ކުރުމަށް ކުރަމުންދާ މަސައްކަތުގައި އެހީތެރިކަން ފޯރުކޮށްދެއްވުމަށް މަހަރާޝްތްރާގެ ޗީފް މިނިސްޓަރު އޭކްނާތް ޝިންދޭ ވަނީ އެ ސަރަޙައްދަށް ޒިޔާރަތް ކުރައްވާފައެވެ. އިރްޝާލްވާދީއަކީ މުމްބާއީއާ 60 ކިލޯމީޓަރު ދުރުގައި އޮންނަ ހިސާބެކެވެ.
މީހުން ސަލާމަތް ކުރުމުގެ މަސައްކަތުގައި އެހީތެރިކަން ފޯރުކޮށްދޭން މުމްބާއީން ވެސް ޓީމުތައް ވަނީ އެ ސަރަޙައްދަށް ދަތުރުކޮށްފައެވެ. އިންޑިޔާގެ މޫސުމާ ބެހޭ އިދާރާއިން ބުނީ ކުރިއަށް އޮތް ދުވަސްތަކުގައި ވެސް މަހަރާޝްތްރާއާއި ގުޖަރާތު ސްޓޭޓުގެ ސަރަޙައްދުތަކަށް މޫސުން ގޯސްވެ، ބޯކޮށް ވާރޭވެހޭނެ ކަމަށް ލަފާކުރެވޭ ކަމުގައެވެ. ފެންބޮޑުވުމާ ގުޅިގެން އެ ދެ ސްޓޭޓްގެ ސްކޫލްތައް ބަންދުކޮށްފައިވާއިރު، ދަތުރުފަތުރަށް ވެސް ވަނީ ހުރަސް އެޅިފައެވެ.
މޫސުމީ ބަދަލުތަކުގެ ސަބަބުން ޤައުމުތަކަށް ކުރިމަތިވާ ޤުދުރަތީ ކާރިސާތަކުގެ ނުރައްކާތެރިކަން އިތުރުވެފައިވާ ކަމަށާއި، މަރުވާ މީހުންގެ ޢަދަދުތައް އިތުރުވެ، ލިބޭ ގެއްލުމުގެ އަގު އިތުރުވަމުންދާ ކަމުގައި މޫސުމީ ބަދަލުތަކާ ބެހޭ މާހިރުން ބުނެއެވެ. އިންޑިޔާގެ އިތުރުން އޭޝިޔާގެ ބައެއް ސަރަޙައްދުތަކަށް ވެސް ދަނީ މޫސުން ގޯސްވެ، ވިއްސާރަ ކުރަމުންނެވެ. ބޯކޮށް ވާރޭވެހުމުގެ ސަބަބުން ފެންބޮޑުވުމާ ކުރިމަތިވެފައިވާ ބައެއް ޤައުމުތަކުގެ ތެރޭގައި ޖަޕާނާއި ދެކުނު ކޮރެޔާ ވެސް ހިމެނެއެވެ.