އުތުރު އެފްރިކާގެ ޤައުމެއް ކަމުގައިވާ އަލްޖަޒާއިރުގައި ހިނގި ނުރައްކާތެރި ބަސް އެކްސިޑެންޓެއްގައި 34 މީހުން މަރުވެއްޖެއެވެ. މި ހާދިސާ ހިނގާފައި ވަނީ އެ ޤައުމުގެ ދެކުނު ސަހަރާ ސަރަޙައްދުގައެވެ. އެކްސިޑެންޓު ހިނގާފައި ވަނީ ފަސިންޖަރުން އުފުލާ ބަހެއް އެހެން އުޅަނދެއްގައި ޖެހިގެންނެވެ.
މިއީ، އަލްޖަޒާއިރުގައި މިހާތަނަށް ހިނގާފައިވާ މި ފަދަ އެންމެ ނުރައްކާތެރި ހާދިސާ ކަމަށާއި، މި ހާދިސާގައި އިތުރު 12 މީހަކު ޒަޚަމުވެފައިވާ ކަމުގައި އެ ޤައުމުގެ ސިވިލް ޑިފެންސް އޭޖެންސީން ބުނެއެވެ. އޭގެ ތެރެއިން ގިނަ ޢަދަދެއްގެ މީހުން ވަރަށް ބޮޑަށް ފިހިފައިވާ ކަމަށް ވެސް އެ އިދާރާއިން ބުންޏެވެ.
ބަސް އެކްސިޑެންޓު ހިނގާފައި ވަނީ އަލްޖަޒާއިރުގެ ވެރިރަށުގެ ދެކުނުން 2,000 ކިލޯމީޓަރު ދުރުގައި އޮންނަ ތިމިންރާސަތު ކިޔާ ސަރަޙައްދެއްގައެވެ. މި ހާދިސާގައި ބަހުގައި ތިބި ގިނަ މީހުން މަރުވީ ފިހިގެން ކަމަށް އެ ޤައުމުގެ މީޑިޔާތަކުން ރިޕޯޓު ކުރެއެވެ. އެކްސިޑެންޓު ހިނގާފައި ވަނީ ތިމިންސާރަތުން ފުރައިގެން އަދްރާރަށް ބަސް ދަތުރުކުރި މަގުމަތީގައެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށް ސިވިލް ޑިފެންސް އޭޖެންސީން ތަހުޤީޤު ފަށާފައިވީ ނަމަވެސް، އެ ކަން އަދި ސާފުވެފައެއް ނުވެއެވެ. ނަމަވެސް، ބާރު ދުވެލީގައި ދުއްވުމަކީ އެންމެ ގިނަ އެކްސިޑެންޓުތައް ހިނގަން މެދުވެރިވާ ސަބަބު ކަމަށް އަލްޖީރިޔާގެ ސަރުކާރުން ބުނެއެވެ. މި ހާދިސާ ހިނގާފައި ވަނީ އަލްޖަޒާއިރުގެ ރައީސް ޢަބްދުލްމަޖީދު ތަބޫން ފުރަމާނަ ދަތުރުފުޅެއްގައި ޗައިނާއަށް ވަޑައިގަންނަވައިގެން އުޅުއްވާ ދަނޑިވަޅެއްގައެވެ.
އަލްޖަޒާއިރަކީ މި ފަދަ މަގުމަތީގެ އެކްސިޑެންޓުތައް ގިނަ ޤައުމެއް ކަން ފާހަގަކުރެއެވެ. 2022 ވަނަ އަހަރު އެ ޤައުމުގައި 23,000 އަށްވުރެ ގިނަ އެކްސިޑެންޓު ހިނގާފައިވެއެވެ. އަދި، އެކްސިޑެންޓުތަކުގައި 3,409 މީހުން މަރުވެ، އިތުރު 30,000 އަށްވުރެ ގިނަ މީހުން ވަނީ ޒަޚަމުވެފައެވެ. 2020 ވަނަ އަހަރުގެ ޑިސެންބަރު މަހު ހިނގި މި ފަދަ ނުރައްކާތެރި ހާދިސާއެއްގައި 20 މީހުން މަރުވެ އިތުރު 11 މީހަކު ޒަޚަމުވިއެވެ.