ނައިބުރައީސް ފައިސަލް: ޤައުމީ ޚިދުމަތްތަކުގެ ކުރީސަފަށް ނިކުންނެވުމުގައި މިޖީލަށް މިސާލެއް

އާއްމުކޮށް އަޅުގަނޑުމެންނަށް ފެނިގެންދަނީ، ވަކި ޚާއްސަ ދާއިރާއަކުން މުޖުތަމަޢަށް ފައިދާހުރި މަސައްކަތްތައް ކުރައްވާ ބޭފުޅުންނެވެ. ބައެއް ބޭފުޅުން ކުޅިވަރުގެ ދާއިރާއިންނެވެ. އަނެއްބައި ބޭފުޅުން ސިއްޙީ ދާއިރާ ނުވަތަ ތަޢުލީމީ ދާއިރާއިންނެވެ. އަނެއްބައި ބޭފުޅުން އިޖުތިމާޢީ ޚާއްސަ ދާއިރާތަކުންނެވެ.

ރާއްޖޭގެ ނައިބު ރައީސް ފައިސަލް ނަސީމް އިޖްތިމާޢީ ޚިދުމަތަށް ނިކުންނެވީ އުމުރުފުޅުން އެންމެ 13 އަހަރުފުޅުގައެވެ. އުފަން ރަށުން މާލެ ބަދަލުވެ ތަޢުލީމު ޙާސިލްކުރައްވަމުން ދިޔަ ދަރިވަރެއްގެ އިތުރުން، ކުޅިވަރަށް އުފެދުނު ލޯބީގައި ފުޓުބޯޅަ ކުރިއެރުވުމަށް މަސައްކަތްކުރެއްވުމަށް ނިކުންނެވިއެވެ.

ނައިބު ރައީސް ފައިސަލް ނަސީމް އެންމެ ކުޑައިރުއްސުރެއް ހާސިލްކުރައްވަން ބޭނުންވި އެއް ހުވަފެނަކީ ފަތުރުވެރިކަމުގެ ދާއިރާއަށް ނިކުންނަވާ ރިސޯޓެއްގެ މެނޭޖަރަކަށްވުމުގެ ހުވަފެނެވެ. ހުވަފެން ހަގީގަތަކަށް ހެއްދެވުމަށް އުމުރުން 18 އަހަރުގައި، ފަތުރުވެރިކަމުގެ ދާއިރާއަށް ވަޒީފާއަށް ނިކުންނެވިއެވެ. ކޮށްދެއްވި ޚިދުމަތާއި ދެއްކެވި ހިތްވަރުގެ ސަބަބުން، އޭގެ ދެ އަހަރު ފަހުން އުމުރުން 20 އަހަރުގައި، ހުވަފެން ހަޤީގަތަކަށް ހައްދަވާ ފަސްތަރީގެ ރިސޯޓެއްގެ މެނޭޖަރުކަމާއި ހަވާލުވެލެއްވިއެވެ. އޭގެ ފަހުން ރާއްޖޭގައި އެހާ އުމުރުން ހަގު ބޭފުޅަކު ފަސްތަރީގެ ރިސޯޓެއްގެ އެފަދަ މަޤާމެއް ފުރުއްވިކަން އިނގޭކަށް ނެތެވެ.

"އަޅުގަނޑު މަންމަކައިރީވެސް އެންމެ ކުޑައިރުވެސް އަބަދުވެސް ބުނަމުންދިޔައިން، ރިސޯޓެއްގެ މެނޭޖަރަކަށް ކޮންމެވެސް ދުވަހަކުން ވާނަމޭ." ނައިބު ރައީސް ވިދާޅުވިއެވެ.

ރިސޯޓުގައި ވަޒީފާ އަދާކުރަމުންދިޔައީ ހަމައެކަނި ވަޒީފާއެއް އަދާކުރުމުގެ ނިޔަތަކު ނޫންނެވެ. ފަތުރުވެރިކަމަށް ޒުވާނުން އަހުލުވެރިކޮށް، ހިންގުމުގެ ދާއިރާއަށް މުހިންމު ބަދަލުތައް ގެންނެވުމަށް އިސްނަގާ މަސައްކަތްކުރެއްވިއެވެ.

ނައިބު ރައީސް ފައިސަލް ނަސީމް އެންމެ ގިނަ ބަޔަކަށް އިނގިގެން ދިޔައީ އުފަން ރަށް ފުވައްމުލަކުގައި އިޖްތިމާޢީ ޚިދުމަތްތައް ދެއްވުމަށް ފެއްޓެވި "ފައިސަލް ފައުންޑޭޝަން"އާއި އެކުއެވެ. 1997ވަނަ އަހަރު އުފެއްދެވި އެ ޖަމުޢިއްޔާގެ އެންމެ ބޮޑު މަގުޞަދަކީ، ރަށުގައި ދީނީ ލޯބި އިތުރުކުރުމާއި، ނުކުޅެދުންތެރިކަން ހުންނަ މީހުންނަށް އެހީވުމާއި، އެކިކަހަލަ ހުނަރާއި ތަމްރީން ފޯރުކޮށްދިނުމާއި އިޖުތިމާޢީ ރޫޙު ރަށުގައި އާލާކުރުމެވެ. ފައިސަލްގެ ޚިދުމަތުގެ އަގު ވަޒަންކުރައްވާ، އޭރުގެ ރައީސުލްޖުމްހޫރިއްޔާ އަލްއުސްތާޛު މަޢުމޫނު އަބްދުލް ޤައްޔޫމްދެއްވާ ޒުވާނުންގެ ޢިނާމު 1999ވަނަ އަހަރު ލިބިލެއްވިއެވެ.

އިޖްތިމާޢީ ޚިދުމަތުގައި އުޅުއްވަމުން އެމަނިކުފާނުގެ ސިޔާސީ ޙަޔާތް ފެއްޓެވީ 2004ވަނަ އަހަރުއެވެ. ޏ.އަތޮޅު ތަމްސީލްކުރާ މަޖިލީސް މެންބަރުގެ ގޮތުގައި ޚިދުމަތްކުރެއްވުމަށްފަހު، 2014ވަނަ އަހަރު ކާށިދޫ ދާއިރާގެ މެންބަރުގެ ގޮތުގައި މަސައްކަތްކުރެއްވިއެވެ.

ނައިބު ރައީސް ފައިސަލް ނަސީމްގެ 50ވަނަ އުފަންދުވަސް ފާހަގަކުރެއްވުމާއި، ނައިބުރައީސްގެ ހަޔާތްޕުޅާއި ބެހޭގޮތުން ނޫސްވެރިޔާ ސާއިލް އަލީ ތައްޔާރުކުރެއްވި ބަޔޮގްރަފީ ނެރުއްވި ހަފްލާއަށްފަހު، ޕީއެސްއެމްއަށް ދެއްވި ޚާއްސަ އިންޓަވިއުގައި ނައިބުރައީސް ވިދާޅުވީ، މުޅި ގަޢުމަށް ޚިދުމަތެއް ކޮށްދެވޭނެ ފުރުޞަތަކީ އަބަދުވެސް އެންމެ އުންމީދުކުރެއްވި ދުވަސްކަމަށެވެ.

"ރައްޔިތުންނާއި ޤައުމަށް ފައިދާވާނެ ކަމެއް ދުލެއް ނުކުރާނަން. އަޅުގަނޑު އަބަދުވެސް މަސައްކަތް ކުރާނީ ރައްޔިތުންގެ މީހެއްގެ ގޮތުގައި. ޝައުގު އަބަދުވެސް އޮތީ ރައްޔިތުންނަށް ޚިދުމަތްކުރެވޭނެ ފުރުޞަތަކަށް." ނައިބު ރައީސް ފާހަގަކުރެއްވިއެވެ.

ނައިބުރައީސް ފައިސަލް ނަސީމަކީ، ޤައުމީ ޚިދުމަތުގައި މިއަދުގެ ޖީލަށް ހުރި ފުރިހަމަ ނަމޫނާއެކެވެ. އެމަނިކުފާނު ވިދާޅުވީ ކޮންމެ ޒުވާނަކުވެސް ޢަޒުމު ކަނޑައަޅަންވީ ޤައުމީ ޚިދުމަތުގެ ކޮންމެވެސް މަސައްކަތެއްގައި ޙިއްސާވުމަށްކަމަށެވެ. ނައިބު ރައީސް ވިދާޅުވީ ކޮންމެ މީހެއްގެވެސް ހުނަރެއް ހުންނާނެކަމަށާއި، އެކަން އިތުރަށް ތަރައްޤީކޮށް ޤައުމަށް ޚިދުމަތްކުރުމަކީ އުފަލަކަށް ހަދަންޖެހޭކަމަށެވެ.

"ޒުވާނުންގެ ވަރުގަދަ ޖީލެއް ބިނާކުރަންޖެހޭ. އޭރުން ޤައުމު ހެސްކިޔާފަ ބާރަށް ކުރިއަރައިގެންދާނީ. ރިސޯޓް ހުރިނަމަވެސް، އޭގެ ބޭނުން ހިފާ ޤައުމު ކުރިއެރުވޭނީ އެންމެން އެކަތިގަނޑަކަށްވެ، ޒުވާނުން މަސައްކަތެރި ވަރުގަދަ ބަޔަކަށްވެގެން." ނައިބު ރައީސް ވިދާޅުވިއެވެ.

ނައިބު ރައީސް ފައިސަލް ނަސީމް ވިދާޅުވީ، ކުރިމަގުގައިވެސް އެމަނިކުފާނު ފެނިގެންދާނީ ޤަޢުމީ ޚިދުމަތްތެރިއެއްގެ ގޮތުގައިކަމަށެވެ. ރައީސުލްޖުމްހޫރިއްޔާ ޢިބްރާޙިމް މުޙައްމަދު ޞާލިޙުގެ އިތުބާރާއެކު، ނައިބު ރައީސްގެ ޙައިސިއްޔަތުން ޚިދުމަތް ކުރެއްވުމަށް ލިބުނު ފުރުޞަތަކީވެސް ލިބުނު ވަރަށް ބޮޑު ފަޚުރެއްކަމަށް ނައިބު ރައީސް ވިދާޅުވިއެވެ.

"ރައްޔިތުންނަށް ޚިދުމަތްކުރަން ޖެހިލުމެއް ނުވާނަން. އިޚްލާސްތެރި ތެދުވެރިކަމާއެކު ޚިދުމަތް ކުރާނީ. ރައްޔިތުންގެ އުއްމީދަށްވުރެވެސް ބޮޑަށް އެ މަސައްކަތް ކުރައްވަނީ." ނައިބު ރައީސް ވިދާޅުވިއެވެ.

ނައިބު ރައީސް ފައިސަލް ނަސީމް، އަމިއްލަ ޚިދުމަތުގެ ޙަޔާތްޕުޅުގައިވެސް އެތައް ރިކޯޑެއް މުގުރައްވައިފިއެވެ. އަދި އެމަނިކުފާނުގެ ސިޔާސީ ޙަޔާތަށް ބަލާއިރު، ފައިސަލް ނަސީމްއަކީ ރައީސުލްޖުމްހޫރިއްޔާގެ ނައިބުގެ މަޤާމުގެ ދަޢުރު ފުރިހަމަކުރައްވާ ފުރަތަމަ ނައިބު ރައީސްވެސްމެއެވެ. މިވެސް ރާއްޖޭގެ ތާރީޚުގައި ލިޔެވޭނެ، މުހިންމު ޞަފުޙާއެކެވެ.