ޖަޕާނުގެ ބޮޑުވަޒީރު ފުމިޔޯ ކިޝިދާ އެކުވެރި ޢަރަބި ޢިމާރާތް (ޔޫ.އޭ.އީ)އަށް ވަޑައިގަންނަވައި އެ ޤައުމުގެ ރައީސް ޝައިޚް މުޙައްމަދު ބިން ޒައިދު އަލް-ނަޙްޔާނާ ބައްދަލުކުރައްވައިފިއެވެ. ކިޝިދާ ޔޫ.އޭ.އީއަށް ވަޑައިގަންނަވާފައި މި ވަނީ އ.ދގެ މޫސުމީ ބަދަލުތަކާ ބެހޭ 28 ވަނަ ބައްދަލުވުން – ކްލައިމެޓް ޗޭންޖް ކޮންފަރެންސް (ކޮޕް28) ބޭއްވުމުގެ ތައްޔާރީތައް ޔޫ.އޭ.އީން ކުރަމުންދާ ދަނޑިވަޅެއްގައެވެ. އެ ބައްދަލުވުން އޮންނާނީ މި އަހަރުގެ ފަހުކޮޅު ނޮވެންބަރާއި ޑިސެންބަރު މަހުގެ ތެރޭގައި ދުބާއީގައެވެ.
ކިޝިދާގެ މި ދަތުރުފުޅަކީ ޖަޕާނުގެ ކުރީގެ ބޮޑުވަޒީރު ޝިންޒޯ އަބޭ 2020 ވަނަ އަހަރުގެ ގަލްފުގެ ޤައުމުތަކަށް ކުރެއްވި ދަތުރުފުޅަށް ފަހު އެ ޤައުމުގެ ބޮޑުވަޒީރަކު ގަލްފަށް ކުރައްވާ ފުރަތަމަ ދަތުރުފުޅެވެ. ޖަޕާނަކީ ގަލްފުގެ ޤައުމުތައް ކަމުގައިވާ ސަޢޫދީ ޢަރަބިއްޔާއާއި، ޔޫ.އޭ.އީގެ އިތުރުން ޤަޠަރުން އިމްޕޯޓުކުރާ ތެލަށް ބަރޯސާވާ ޤައުމެއް ކަން ފާހަގަކުރެވެއެވެ.
ތެލަށް ބަރޯސާވާ މިންވަރު ކުޑަކޮށް، ތިމާވެއްޓާ ރަޙުމަތްތެރި ހަކަތަ ބޭނުންކުރުން އިތުރުކުރަން ޖަޕާނުން މަސައްކަތް ކުރަމުންދާ މި ދަނޑިވަޅުގައި ގަލްފުގެ ޤައުމުތަކުން ވެސް ދަނީ އެ މިސްރާބަށް މަސައްކަތްތަކެއް ކުރަމުންނެވެ. ޝައިޚް މުޙައްމަދާ އެކު ބޭއްވެވި ބައްދަލުވުމުގައި ކިޝިދާ ވަނީ ހައިޑްރިޖަން ތެލާއި، އެމޯނިޔާގެ އިތުރުން ރީސައިކަލްކޮށްފައިވާ ކާބަން ބޭނުންކޮށްގެން އުފައްދާ ތެލާ ގުޅޭ ގޮތުން މަޝްވަރާ ކުރައްވާފައެވެ.
ކިޝިދާ ޔޫ.އޭ.އީއަށް ވަޑައިގަތުމުގެ ކުރިން ސަޢޫދީ ޢަރަބިއްޔާއަށް ދަތުރުފުޅެއް ކުރައްވައި، އެ ޤައުމުގެ ވަލީއަޙުދު މުޙައްމަދު ބިން ސަލްމާނާ ވެސް ބައްދަލުކުރެއްވިއެވެ. މި ބައްދަލުވުމުގައި "ލައިޓްހައުސް އިނީޝިއެޓިވް ފޯ ކްލީން އެނަރޖީ ކޯޕޮރޭޝަން"ގެ ނަމުގައި ތިމާވެއްޓާ ރަޙުމަތްތެރި ހަކަތަ އުފެއްދުމަށް ގުޅިގެން މަސައްކަތް ކުރުމާ ގުޅޭ ގޮތުން ދެ ޤައުމުގެ މެދުގައި އެއްބަސްވުމެއް އެކުލަވައިލާފައިވެއެވެ.
ކިޝިދާގެ ދަތުރުފުޅުގައި މީގެ އިތުރުން އިތުރު 26 އެއްބަސްވުމެއްގައި ދެ ޤައުމުގެ ދެމެދުގައި ސޮއިކޮށްފައިވާ ކަމުގައި ޖަޕާނުން ބުނެއެވެ. މީގެ ތެރެއިން ގިނަ އެއްބަސްވުންތަކަކީ ހަކަތައިގެ ދާއިރާއިން ގުޅުން ބަދަހިކުރުމާ ގުޅޭ އެއްބަސްވުންތަކެވެ. ޖަޕާނުން ބޭނުންކުރާ ތެލުގެ 40 އިންސައްތަ ފޯރުކޮށްދެނީ ސަޢޫދީ ޢަރަބިއްޔާއިންނެވެ.
މެދުއިރުމަތީގެ ޤައުމުތަކުން ތަންފީޒު ކުރަން މަސައްކަތް ކުރަމުންދާ ގްރީން ނުވަތަ ތިމާވެއްޓާއި ރަޙުމަތްތެރި ސިޔާސަތުތަކުގައި ޖަޕާނުން އުފައްދާފައިވާ ތިމާވެއްޓާ ރަޙުމަތްތެރި "ޑީކާބަނައިޒޭޝަން" ޓެކްނޮލޮޖީތަކުގެ ބައިވެރިވުން ފުޅާކުރަން ކިޝިދާ ބޭނުންފުޅުވެ ވަޑައިގަންނަވާ ކަމުގައި ޖަޕާނުން ބުނެއެވެ. އަދި، އެ ކަމާ ގުޅޭ ގޮތުން ހުށަހެޅުންތަކެއް ސަޢޫދީ ވަލީއަޙުދާއި ޔޫ.އޭ.އީގެ ރައީސްގެ އިތުރުން ގަލްފާއި މެދުއިރުމަތީގެ އެހެން ޤައުމުތަކަށް އޭނާ ހުށަހަޅުއްވާފައިވާ ކަމުގައި ރިޕޯޓުތައް ބުނެއެވެ.
ކިޝިދާގެ ހުށަހެޅުމުގެ ދަށުން ޖަޕާނާއި ޔޫ.އޭ.އީ ގުޅިގެން ހައިޑްރިޖަން ތެލާއި އެމޯނިޔާ އުފެއްދުން އިތުރުކޮށް، ކާބަން މަދުކުރުމަށް މަސައްކަތްތަކެއް ކުރުމަށް ދެ ޤައުމުގެ ދެމެދުގައި އެއްބަސްވުމެއް އެކުލަވައިލާފައިވާ ކަމުގައި އޭނާ ވިދާޅުވިއެވެ. އަދި، ކޮޕް28 ބައްދަލުވުމަކީ ކާމިޔާބީއަކަށް ހެދުމަށް ޔޫ.އޭ.އީން ކުރަމުންދާ މަސައްކަތްތަކަށް ޖަޕާނުގެ އެހީތެރިކަމާއި އެއްބާރުލުން ދެއްވާނެ ކަމުގައި ވެސް އޭނާ ވިދާޅުވިއެވެ. މީގެ އިތުރުން ދެ ޤައުމުގެ ދޭދޭ ގުޅުންތައް ހަރުދަނާ ކުރުމާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރައްވާފައިވެއެވެ. ޔޫ.އޭ.އީއަށް ފަހު ކިޝިދާ ދެން ވަޑައިގަންނަވާފައި ވަނީ ޤަޠަރަށެވެ.