ދެ ކޮރެޔާގެ ސަރަޙައްދީ ރޮނގު ހުރަސްކޮށް އުތުރު ކޮރެޔާއަށް އެތެރެވި އެމެރިކާގެ އަސްކަރިއްޔާގެ ސިފައިންގެ މީހަކު ހައްޔަރުކޮށްފިއެވެ. އުތުރު ކޮރެޔާއަށް އެތެރެވެފައި ވަނީ ދެ ކޮރެޔާގެ ސަރަޙައްދީ ރޮނގު ބަލަހައްޓާ ފައުޖުގައި ހިމެނޭ އެމެރިކާގެ އަސްކަރިއްޔާގެ ސިފައިންގެ މީހެއް ކަމުގައިވާ ޕްރައިވެޓް (ސެކަންޑް ކްލާސް) ޓްރެވިސް ކިންގު ކަމުގައި އެމެރިކާގެ ދިފާޢީ އިދާރާ ޕެންޓެގަނުން ބުނެއެވެ.
ކިންގް އުތުރު ކޮރެޔާއަށް އެތެރެވީ ދެ ކޮރެޔާ ދެމެދުގައި އޮންނަ ހަތިޔާރު ގެންގުޅުން މަނާ ސަރަޙައްދު – ޑީމިލިޓަރައިޒްޑް ޒޯން (ޑީ.އެމް.ޒީ)އަށް ކުރި ދަތުރެއްގެ ތެރެއިންނެވެ. އެއްވެސް ފަރާތެއްގެ ހުއްދައަކާ ނުލައި ކިންގް އުތުރު ކޮރެޔާއަށް ވަދެފައި މި ވަނީ އުތުރު ކޮރެޔާއާއި އެމެރިކާއާ ދެމެދު އޮތް ނުތަނަވަސް ގުޅުންތައް ވަރަށް ބޮޑަށް ހީނަރުވެފައިވާ ދަނޑިވަޅެއްގައެވެ.
ކިންގް މި ވަގުތު ހުރީ އުތުރު ކޮރެޔާގެ އަސްކަރިއްޔާގެ ހައްޔަރުގައި ކަމަށް ބެލެވެއެވެ. އުތުރު ކޮރެޔާއަކީ ދުނިޔޭގައިވާ އެންމެ ބޮޑަށް އެކަހެރިވެފައިވާ ޤައުމެވެ. އަދި، އެ ޤައުމަށް ދަތުރުނުކުރުން އެމެރިކާގެ ރައްޔިތުންނަށް އޮންނަނީ އަންގާފައެވެ.
ކިންގްގެ އަމަލުތަކާ ގުޅޭ ގޮތުން އެމެރިކާގެ އަސްކަރިއްޔާގެ އިންޑޯ-ޕެސިފިކް ކޮމާންޑުގެ ކޮމާންޑަރު އެޑްމިރަލް ޖޯން އެކުއިލީނޯ ވިދާޅުވީ، މި ހާދިސާއަށް ފަހު ކިންގާ އެއްވެސް ވަރަކަށް ވާހަކަ ދެކެވިފައި ނުވާ ކަމަށާއި، އޭނާ ހައްޔަރުކުރުމާ ގުޅޭ ގޮތުން އުތުރު ކޮރެޔާއާ އެކު ދައްކަމުންދާ އެއްވެސް މަޝްވަރާއެއްގެ މަޢުލޫމާތު ލިބިވަޑައިގަންނަވާފައި ނުވާ ކަމުގައެވެ.
ނަމަވެސް، ކިންގް އުތުރު ކޮރެޔާއަށް އެތެރެވެފައި ވަނީ އެމެރިކާގެ އަސްކަރިއްޔާގެ އަމުރެއް ނުވަތަ އިރުޝާދަކާ ނުލައި ކަމަށް އެޑްމިރަލް އެކުއިލީނޯ ވިދާޅުވިއެވެ. އެމެރިކާގެ އިންޑޯ-ޕެސިފިކް ކޮމާންޑުން މިހާރު ދަނީ މި ހާދިސާ ތަހުޤީޤު ކުރަމުންނެވެ.
ކިންގް ހައްޔަރުކުރިތާ ގިނަ އިރުތަކެއް ނުވެ އުތުރު ކޮރެޔާއިން ދެ މިސައިލް ޓެސްޓެއް ހަދާފައިވާ ކަމުގައި ދެކުނު ކޮރެޔާއިން ބުނެއެވެ. އުތުރު ކޮރެޔާއިން އަޖުމަ ބަލާފައި ވަނީ ބެލިސްޓިކް މިސައިލްތަކެކެވެ. އެ މިސައިލްތައް އުތުރު ކޮރެޔާގެ ކަނޑުގެ ސަރަޙައްދަށް ވެއްޓިފައިވާ ކަމުގައި ދެކުނުން ބުނެއެވެ. ނަމަވެސް، މިސައިލް ޓެސްޓުތަކާއި ކިންގްގެ އަމަލުތަކާ އެއްވެސް ގުޅުމެއްވާ ކަން އަދި ކަށަވަރު ކުރެވިފައެއް ނުވެއެވެ.
ޕެންޓެގަންގެ ތަރުޖަމާނެއް ވިދާޅުވީ އެމެރިކާގެ އަސްކަރިއްޔާއާ ކިންގް ގުޅިފައި ވަނީ 2021 ވަނަ އަހަރުގެ ޖަނަވަރީ މަހު ކަމުގައެވެ. އަދި، އޭނާއަކީ ދެކުނު ކޮރެޔާގައި ގާއިމުކޮށްފައިވާ އެމެރިކާގެ އަސްކަރިއްޔާގެ ފައުޖުގެ ފަސްޓް އާމަރޑް ޑިވިޜަންގައި "ކެވެލްރީ ސްކައުޓެއްގެ" މަޤާމުގައި މަސައްކަތް ކުރާ މީހެއް ކަމަށާއި، އޭނާއަކީ ޖާސޫސް ކުރުމުގެ ދާއިރާގެ މާހިރެއް ކަމުގައެވެ.
ޑީ.އެމް.ޒީއަށް ކުރި ދަތުރުގައި ކިންގް ބައިވެރިވެފައި ވަނީ މާރާމާރީއެއްގެ މައްސަލައެއްގައި އަދަބު ދިނުމުގެ ގޮތުން އޭނާއާ ދެކޮޅަށް ފިޔަވަޅުތަކެއް އަޅާފައި ހުރި ވަގުތެއްގައި ކަމަށް މީޑިޔޯ ރިޕޯޓުތައް ބުނެއެވެ. އޭނާ ފިލައިގެން އުތުރު ކޮރެޔާއަށް ވަދެފައި ވަނީ ޑީ.އެމް.ޒީގައި އޮންނަ އަވަށެއް ކަމުގައިވާ ޕަންމުންޖޮމްއާ ހިސާބުން ކަމަށް އެ ދަތުރުގައި ބައިވެރިވި އެހެން މީހުންނާ ހަވާލާދީ މީޑިޔާ ރިޕޯޓުތައް ބުނެއެވެ.
ޑީ.އެމް.ޒީ ބަލަހައްޓާ އ.ދގެ ކޮމާންޑުން ބުނީ ކިންގް މިނިވަން ކުރުމާ ގުޅޭ ގޮތުން އުތުރު ކޮރެޔާގެ އަސްކަރިއްޔާއާ މިހާރު މަޝްވަރާ ކުރަމުންދާ ކަމުގައެވެ. އަދި، އޭނާ މި ވަގުތު ހުރީ އުތުރު ކޮރެޔާގެ އަސްކަރިއްޔާގެ ބެލުމުގެ ދަށުގައި ކަމަށް ބެލެވޭ ކަމަށާއި، އޭނާގެ ހާލަތާ މެދު އެއްވެސް މަޢުލޫމާތެއް ލިބިފައި ނުވާ ކަމުގައި ވެސް އ.ދގެ ކޮމާންޑުން ބުނެއެވެ.