ދުނިޔޭގެ އެކި ކަންކޮޅުތަކުގައި މޫސުން ގޯސްވެ، މޫސުމާ ގުޅޭ ހާދިސާތަކުގައި މަރުވި މީހުންގެ ޢަދަދުތައް އުފުލިއްޖެއެވެ. ޗައިނާގެ ބައެއް ސަރަޙައްދުތަކުގައި "ސަރފެސް ޓެމްޕެރޭޗަރ" 80 ޑިގްރީ ސެލްސިއެސްއަށް އުފުލިފައިވާއިރު، ދެކުނު ކޮރެޔާއަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި އެކި ހާދިސާތަކުގައި މަރުވި މީހުންގެ ޢަދަދު ވަނީ 44 އަށް އުފުލިފައެވެ.
ޗައިނާއަށް ބަލައިލާއިރު ފިނިހޫނުމިން އެންމެ ބޮޑަށް އުފުލިފައި ވަނީ ޝިންޖިއާންގައެވެ. އެ ސަރަޙައްދުގެ ތުލުފާން ޑިޕްރެޝަން ކިޔާ ސަރަޙައްދެއްގައި ވައިގެ ފިނިހޫނުމިން ވަނީ 52.2 ޑިގްރީ ސެލްސިއެސްގައި ރެކޯޑު ކުރެވިފައެވެ. އެއީ، ރެކޯޑު ޢަދަދެކެވެ. އެ ސަރަޙައްދުގެ ފިނިހޫމިން މިހާ މަތީ މިންވަރަކަށް އެންމެ ފަހުން އުފުލިފައި ވަނީ 2015 ވަނަ އަހަރުއެވެ. އެއީ، 50.3 ޑިގްރީ ސެލްސިއެސްއަށެވެ. ޗައިނާގެ ބައެއް ސަރަޙައްދުތަކުގައި ފިނިހޫނުމިން އިންތިހާއަށް އުފުލިފައިވާއިރު، އެ ޤައުމުގެ ދެކުނުގައިވާ ގުއަންޑޮންގަށް ބާރުގަދަ ތޫފާނެއް ކަމުގައި ތާލިމް އެރުމުގެ ސަބަބުން އެތަކެއް ހާސް ބަޔަކު ރައްކާތެރި ހިސާބުތަކަށް ބަދަލުކޮށްފައިވެއެވެ.
ޗައިނާގެ މޫސުން ގޯސްވެފައި މި ދަނޑިވަޅުގައި އެމެރިކާގެ ރައީސްގެ މޫސުމާ ބެހޭ އިސް މުޝީރު ޖޯން ކެރީއާއި ޗައިނާގެ އިސްވެރިން ގެންދަވަނީ މޫސުމީ ބަދަލުތަކުގެ އަސަރުތައް ކުޑަކުރުމާ ގުޅޭ ގޮތުން ބެއިޖިންގްގައި މުހިންމު މަޝްވަރާތަކެއް ކުރައްވަމުންނެވެ. މިއީ، ވިިދިވިދިގެން ބެއިޖިންގުގެ ފިނިހޫނުމިން 35 ޑިގްރީ ސެލްސިއަސްއަށް ވުރެ މަތިން ރެކޯޑު ކުރެވިފައިވާ 27 ވަނަ ދުވަހެވެ.
ދެކުނު ކޮރެޔާއަށް މޫސުން ގޯސްވުމުގެ އަސަރު އެންމެ ބޮޑަށް ކުރަމުން ދަނީ އިރުދެކުނުގައި އޮންނަ އުތުރު ޗުންގްޗޮންގް ޕުރޮވިންސަށެވެ. އެ ޕުރޮވިންސުގެ ރަށެއް ކަމުގައިވާ ޗޮންގްޖޫގެ ކޯރެއް ފުރިގެން ބަންޑުންވެ، ބޮޑު ސަރަޙައްދެއްގައި ވަނީ ފެންބޮޑުވެފައެވެ. ފެންބޮޑުވުމާއި ބިންގަނޑު ކެނޑި ކިސަޑު ފޭބުމުގެ ހާދިސާތަކުގައި އެ ރަށުން މަރުވި މީހުންގެ ޢަދަދު ވަނީ 22 އަށް އަރާފައެވެ.
ފެންބޮޑުވުމާ ގުޅިގެން ލިބޭ ގެއްލުމާއި މީހުންގެ ފުރާނައަށް ނުރައްކާވާ މިންވަރު ކުޑަ ކުރަން ދެކުނު ކޮރެޔާއިން މަސައްކަތްތަކެއް ކުރަމުންދިޔަ ނަމަވެސް، ހުސްވި 2022 ވަނަ އަހަރު ވެސް އެ ޤައުމުގައި މޫސުން ގޯސްވެ ގިނަ ޢަދަދެއްގެ ބަޔަކު މަރުވި ކަން ފާހަގަކުރެވެއެވެ. އެ އަހަރު މޫސުން ގޯސްވުމާ ގުޅިގެން ހިނގި ފެންބޮޑުވުމާއި ބިންގަނޑު ކެނޑުން ފަދަ ހާދިސާތަކުގައި 115 މީހުން މަރުވިއެވެ.
ވިލާތަށް ބަލައިލާއިރު އާދަޔާ ޚިލާފަށް ހޫނުގަދަވެ، ގްރީސްގެ ވެރިރަށް އެތެންސް ކައިރީގައިވާ ޖަންގަލިތަކުގައި ވަނީ ރޯވެފައެވެ. އެތެންސްގެ އައްސޭރިފަށުގައިވާ ކާރުޚާނާތަކަށް އަލިފާންގަނޑު ފޯރުމުގެ ކުރިން އަލިފާންގަނޑުތައް ނިއްވައިލަން ގްރީސުން ދަނީ ފެންޖަހާ މަތިންދާބޯޓުތަކުގެ އެހީގައި މަސައްކަތް ކުރަމުންނެވެ.
ވިލާތާއި އޭޝިޔާގެ އިތުރުން އެމެރިކާގައި ވެސް މޫސުން ވަނީ އާދަޔާ ޚިލާފަށް ގޯސްވެފައެވެ. ދުނިޔޭގެ މޫސުމާ ބެހޭ ޖަމުޢިއްޔާ – ވޯލްޑް މީޓިއޮރޮލޮޖިކަލް އޮގަނައިޒޭޝަން (ޑަބްލިޔު.އެމް.އޯ)އިން ބުނީ ދުނިޔޭގެ އެކި ކަންކޮޅުތަކުގައި އާދަޔާ ޚިލާފަށް ފިނިހޫނުމިން އުފުލުމާ ގުޅިގެން އެތަކެއް ސަތޭކަ ބަޔެއްގެ ފުރާނައަށް ނުރައްކާވެފައިވާ ކަމުގައެވެ. އަދި، މޫސުމާ ގުޅޭ ހާދިސާތަކުގައި މަރުވާ މީހުންގެ ޢަދަދުތައް އިތުރުވާނެ ކަމަށް ބެލެވޭ ކަމުގައެވެ.
އެމެރިކާއަށް ބަލައިލާއިރު، ހަވާއީގައި ދަނީ ބާރުގަދަ ތޫފާނެއް ކަމުގައިވާ ކެލްވިންއަށް ތައްޔާރުވުމުގެ ގޮތުން ރައްކާތެރި ކަމުގެ ފިޔަވަޅުތައް އަޅަމުންނެވެ. ތޫފާން ކެލްވިނާ އެކު ހަވާއީގެ ސަރަޙައްދުތަކަށް 203 މިލިމީޓަރުގެ ވާރޭ ވެހޭނެ ކަމަށް އެމެރިކާގެ މޫސުމާ ބެހޭ އިދާރާ – ނޭޝަނަލް ވެދަރ ސަރވިސް (އެން.ޑަބްލިޔު.އެސް)އިން ލަފާކުރެއެވެ. އަދި، އާދަޔާ ޚިލާފަށް ވައިބާރުވާނެ ކަމުގެ އިންޒާރު ވެސް އެ އިދާރާއިން ދީފައިވެއެވެ.