މުދާ ކްލިއަރ ކުރުން އަވަސްކުރުމަށް ދިރާސާއެއް، އަންނަ އަހަރު ބަދަލު ފެންނާނެ: ކަސްޓަމްސް

ރާއްޖެ ގެންނަ މުދާ ކްލިއަރ ކުރުމުގެ ޚިދުމަތް އަވަސްކުރުމަށް ޓައިމް ރިލީޒް ސްޑަޑީޒްއެއް މިހާރު ހަދާފައިވާކަމަށާއި، އަންނަ އަހަރުގެ ތެރޭގައި ހެޔޮ ބަދަލެއް ފެންނާނެކަމަށް ކޮމިޝަނަރ ޖެނެރަލް އޮފް ކަސްޓަމްސް ޢަބްދުﷲ ޝަރީފް ވިދާޅުވެއްޖެއެވެ.

ކަސްޓަމްސްއިން ދެމުންދާ ޚިދުމަތަކީ ވިޔަފާރިތަކާއި ވަރަށް ބޮޑަށް ގުޅިފައިވާ ޚިދުމަތެކެވެ. އަދި ބައެއް ފަހަރު ކަސްޓަމްސްއިން މުދާ ކްލިއަރ ކުރުމަށް ލަސްތަކެއް ދިމާވާކަމުގެ ކަންބޮޑުވުންވެސް ވިޔަފާރިވެރިން ފާޅުކުރެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް ޢަބްދުﷲ ޝަރީފް ވިދާޅުވީ، ކަސްޓަމްސްގެ މަސައްކަތަކީ ވަރަށް ގިނަ މުއައްސަސާތަކާއި ގުޅިގެން ކުރާ މަސައްކަތެއްކަމަށެވެ. އެހެންކަމުން އެހެން މުއައްސަސާއެއްގައި ލަސްތަކެއް ދިމާވާނަމަ މުޅި ޕްރޮސެސްއަށް ލަސްތަކެއް ކުރިމަތިވާކަން ޝަރީފް ފާހަގަކުރެއްވިއެވެ.

ވޯލްޑް ކަސްޓަމްސް އޯގަނައިޒޭޝަނާއި ގުޅިގެން މިހާރު ޓައިމް ރިލީޒް ސްޓަޑީއެއް ހަދާފައިވާކަމަށާއި، މި ސްޓަޑީގެ ސަބަބުން އެހެން މުއައްސަސާއަކުން ލަސްތަކެއް އުޅޭނަމަ އެކަން އެނގި ރަނގަޅުކުރަންޖެހޭ ހިސާބުތައް ދެނެގަނެވޭނެކަމަށް ޝަރީފް ފާހަގަކުރެއްވިއެވެ.

"އަޅުގަނޑުމެން މިހާރު އެބަ ކުރިއަށްގެންދަން ޓައިމް ރިލީޒް ސްޓަޑީއެއް. މިއީ ރާއްޖެއަށް މުދަލެއް އިމްޕޯޓްކުރާ މަރުހަލާއިން ފެށިގެން މި ޕްރޮސެސް ތެރޭގައި މި ހޭދަވާ ވަގުތު ދެނެގަންނަން އެއީ ހަމަ ވޯލްޑް ކަސްޓަމްސް އޯގަނައިޒޭޝަންގެ ޓައިމް ރިލީޒް ގައިޑްލައިންއާއި އެއްގޮތަށް އަޅުގަނޑުމެން އެ މަސައްކަތް މިކުރަނީ... މީގެއިން އަޅުގަނޑުމެންނަށް އެނގިގެންދާނެ ކޮން ހިސާބަކުންކަން މި ޓައިމްތަކެއް މިނަގަނީ. ސްޓެޓިސްޓިކަލީ އެނގޭނެ ވަކި އޭރިއާއަކުން މިސާލަކަށް ޑޮކިއުމަންޓް ޕޮރޮސެސިންގެ ނޫނީ އަގު ނިންމުމުގައި ނޫނީ ފިޒިކަލް އެގްޒަމިނޭޝަންގައި މިއިން ހިސާބެއްގައި ލަސްތަކެއް އުޅޭނަމަ" ޝަރީފް ވިދާޅުވިއެވެ.

ޝަރީފް ވިދާޅުވީ، މި ސްޓަޑީޒްއަށް ބެލުމަށްފަހުގައި ޚިދުމަތް އަވަސް ކުރުމަށް ކުރެވެމުންދާ މަސައްކަތްތަކަށް އަންނަ އަހަރުގެ ތެރޭގައި އެދެވޭ ހެޔޮ ބަދަލެއް ގެނެވިގެންދާނެކަމަށެވެ.

މި ޚިދުމަތް އަވަސް ވެގެންދިއުމަކީ ވިޔަފާރިވެރިން މުދާ ގެނައުމަށް ކުރަންޖެހޭ ޚަރަދު ބޮޑުތަނުން ކުޑަކުރެވިގެންދާނެ ކަމެއްކަން ކަސްޓަމްސްއިން ފާހަގަކުރައްވައެވެ. އެހެންކަމުން މީގެ އެންމެ ބޮޑު ބޭނުމަކީ ވަގުތު ކުޑަކޮށް މުދަލުގެ އަގު ހެޔޮކުރުންކަމަށް ކަސްޓަމްސްއިން ވަނީ ވިދާޅުވެފައެވެ.