ރާއްޖެއާއި މިޞްރުގައި ޑިޕްލޮމެޓިކް މިޝަން ޤާއިމުކުރުމާއި ގުޅޭގޮތުން މަޝްވަރާކުރައްވައިފި

ދިވެހިރާއްޖެއާއި މިޞްރާ ދެމެދު އޮތް ގުޅުން ބަދަހިކުރުމަށް، ދެ ޤައުމުގައި ޑިޕްލޮމެޓިކް މިޝަން ޤާއިމުކުރެއްވުމާއި ގުޅޭގޮތުން މަޝްވަރާކުރައްވައިފިއެވެ.

މި މަޝްވަރާތައް ބާއްވާފައިވަނީ މިދިޔަ އާދީއްތަދުވަހު މިސްރާއި ދިވެހިރާއްޖެއާ ދެމެދު ބޭއްވެވި ބައިލެޓަރަލް ޕޮލިޓިކަލް ކޮންސަލްޓޭޝަންސްގެ ދެވަނަ ބުރުގައެވެ. ގިނަ ދައިރާތަކަކުން މުހިއްމު މަޝްވަރާތަކެއް ކުރިއަށްގެންދިޔަ މި ބައްދަލުވުން ބޭއްވީ ފޮރިން މިނިސްޓްރީގައެވެ.

މި މަޝްވަރާތަކުގައި ދިވެހި ސަރުކާރުގެ ފަރާތުން އިސް ބޭފުޅެއްގެ ގޮތުގައި ބައިވެރިވެވަޑައިގަތީ މިނިސްޓަރ އޮފް ސްޓޭޓް ފޯ ފޮރިން އެފެއާޒް، އަޙްމަދު ޚަލީލެވެ. އަދި މިޞްރުން ވަޑައިގެންނެވި ވަފުދުގައި އިސްކޮށް ހުންނެވީ މިޞްރުގެ މިނިސްޓްރީ އޮފް ފޮރިން އެފެއާޒްގެ އެސިސްޓަންޓް މިނިސްޓަރ ފޯ އޭޝިއަން އެފެއާޒް، ހިޒް އެކްސަލަންސީ އައިމަން ކާމިލްއެވެ.

މި މަޝްވަރާތަަކަށްފަހު ނެރުނު ގުޅިފައިވާ ބަޔާނުގައި ވިދާޅުވީ ދިވެހިރާއްޖެއާއި މިޞްރާ ދެމެދުގައިވާ ތާރީޚީ ރަޙުމަތްތެރިކަމުގެ ގުޅުން ބިނާވެފައި ވަނީ އިސްލާމީ އަޚްވަންތަކަމާއި، އެއްގޮތް ޘަޤާފަތާއި، އެއްބަޔަކު އަނެއްބަޔަކަށް ކުރާ އިތުބާރާއި އިޙްތިރާމުގެ މައްޗަށްކަމަށެވެ. އަދި މި މަޝްވަރާތަކުގައި އިޤްތިޞާދާއި ވިޔަފާރި އަދި ފަންނީ އެހީތެރިކަމާއި ފަތުރުވެރިކަން، ތާރީޚާއި ޘަޤާފަތް، ޞިއްޙަތާއި ތަޢުލީމް، ޒުވާނުންނާއި ކުޅިވަރު އަދި މޫސުމަށް އަންނަ ބަދަލުތަކާއި ތިމާވެށީގެ ދާއިރާއިން ދެ ޤައުމުގެ ގުޅިގެން ކުރެވޭނެ މަސައްކަތްތަކާއި ގުޅޭގޮތުން ވާހަކަދެއްކެވިކަމަށް ބަޔާނުގައިވެއެވެ. މީގެއިތުރުން ނިރުބަވެރިކަމާއި ދެކޮޅަށް މަސައްކަތްކުރުމާއި، ސަލާމަތާއި ބައިނަލްއަޤުވާމީ ފެންވަރުގައި ދެ ޤައުމަށްވެސް ޙައްސާސް އެހެނިހެން ދާއިރާތަކުގައި ދެ ޤައުމުން ގުޅިގެން ކުރާ މަސައްކަތްތައް އިތުރަށް ހަރުދަނާކުރުމަށް މި މަޝްވަރާތަކުގައި ވަނީ އެއްބަސްވެފައިކަމަށްވެސް ޚާރިޖިއްޔާއިން ނެރުނު ބަޔާނުގައިވެއެވެ.

މިސްރާއި ދިވެހިރާއްޖެއާ ދެމެދު މަޝްވަރާކުރެވުނު އެހެން ދާއިރާތަކުގެ ތެރޭގައި ކޮންސިއުލަރ އެފެއާޒްގެ ދާއިރާއިން ގުޅުން ބަދަހިކުރުމާއި ކޮންސިއުލަރ މައްސަލަތަކުގައި ދެ ޤައުމުގެ މެދުގައި ވިލަރެސްކުރާނެ ކޮންސިއުލަރ ފޯކަލް ޕޮއިންޓުތަކެއް ކަނޑައެޅުން ހިމެނެއެވެ. އަދި ދެ ޤައުމުގެ ވެރިރަށުގައި ޑިޕްލޮމެޓިކް މިޝަން އޮފީހެއް އެއް ހުޅުވުމުގެ މުހިއްމުކަމާއި ވިޔަފާރީގެ ޖަމިއްޔާތަކާއި ޕާލިމަންޓަރީ ފްރެންޑްޝިޕް ގްރޫޕްތަކާއި އެކުވެރިކަމުގެ ޖަމިއްޔާތައް ރާއްޖެއާއި މިޞްރާ ދެމެދު ޤާއިމުކުރުމާއި ގުޅޭގޮތުންވެސް މި ބައްދަލުވުމުގައި ވަނީ މަޝްވަރާކޮށްފައެވެ.

މީގެއިތުރުން ނިރުބަވެރިކަމާއި ދެކޮޅަށް ކުރާ މަސައްކަތުގައި އެއްބާރުލުން ދިނުމުގެ ދަށުން، "އިސްލާމްދީނުގައި ސަމާޙަތު" މި މައުޟޫޢާއި ގުޅޭގޮތުން ކޮންފަރެންސެއް ބޭއްވުމަށާއި ނިރުބަވެރިކަމާއި ހައްދު ފަހަނައެޅުމާއި ދެކޮޅަށް ގުޅިގެން މަސައްކަތްކުރުމާއި ބެހޭގޮތުންވެސް ދެ ޤައުމުން މަޝްވަރާކުރިކަމަށް ދެ ޤައުމުން ނެރުނު ގުޅިފައިވާ ބަޔާނުގައިވެއެވެ.

މި ބައްދަލުވުމުގައި ދިވެހި ސަރުކާރުން ވަނީ، ދިވެހި ދަރިވަރުންނަށް މިސްރުގައި ތަޢުލީމު ޙާސިލުކުރުމާއި، ތަމްރީންވުމަށްދޭ ފުރުޞަތުތައް ފާހަގަކުރައްވާ އެކަމަށް ޝުކުރު އަދާކުރައްވާފައެވެ. އަދި ދިވެހި ރާއްޖެއާއި މިސްރާއި ދެމެދު ބާއްވާ ބައިލެޓަރަލް ޕޮލިޓިކަލް ކޮންސަލްޓޭޝަންސްގެ ތިންވަނަ ބުރު މިޞްރުގެ ވެރިރަށް ޤާހިރާގައި ބޭއްވުމަށްވެސް ދެ ޤައުމުން ވަނީ އެއްބަސްވެފައެވެ.

ދިވެހިރާއްޖެއާއި މިޞްރާ ދެމެދު ސިޔާސީ ގުޅުން ޤާއިމުކުރައްވާފައިވަނީ 1969 ވަނަ އަހަރުއެވެ. އަންނަ އަހަރަކީ ދެ ޤައުމުގެ ގުޅުމަށް 55 އަހަރު ފުރޭ އަހަރެވެ.