އާރްޓީއެލްއަށް ފައިސާ ދައްކާއިރު އެކައުންޓް މަޢުލޫމާތު ރައްކާކޮށްފައެއް ނުބަހައްޓާނެ: އެމްޓީސީސީ

އާރްޓީއެލްގެ ޚިދުމަތުގައި އެއްވެސް ކަސްޓަމަރެއްގެ ބޭންކު ކާޑުގެ މަޢުލޫމާތު ބޭނުންކޮށްގެން ނާޖާއިޒު ފައިދާއެއް ނެގޭފަދަ މަޢުލޫމާތެއް، ކުންފުނީގެ ސިސްޓަމްތަކުގައި ރައްކާކޮށްފައި ނުހުންނާނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީން ވިދާޅުވެއްޖެއެވެ.

އެމްޓީސީސީން ވިދާޅުވީ މިއީ އަލަށް ފަށާފައިވާ ޚިދުމަތަކަށްވާތީ، ރަނގަޅުކުރަންޖެހޭ ކަންކަމުގެ ޚިޔާލު ކުންފުންޏަށް ލިބޭކަމަށާއި އެކަންކަމަށް ރިޢާޔަތްކޮށް ޚިދުމަތުގެ ފެންވަރު ރަނގަޅުކުރަމުންދާކަމަށެވެ. އެގޮތުން އާރް.ޓީ.އެލް އެޕްގައި ސެކިޔުރިޓީ މައްސަލައެއް އުޅޭކަމުގެ ރިޕޯޓެއް މިމަހު ކުރީކޮޅު އެ ކުންފުންޏަށް ލިބުނުކަމަާއި އެ މައްސަލަ އިތުރަށް ބެލުމަށްފަހު ބޭނުންވާ ރައްކާތެރިކަމުގެ ފިޔަވަޅުތައް އަޅައި، ވަގުތުން ހައްލުކޮށްފައިވާކަމަށް އެމްޓީސީސީން ބުނެއެވެ. އަދި، ސިސްޓަމް ސެކިޔުރިޓީ އިތުރަށް ވަރުގަދަ ކުރުމުގެ މަސައްކަތްތައްވެސް ކުރަމުންދާކަމަށް ބުނެއެވެ.

އެމްޓީސީސީން ބުނީ ކުންފުނިން އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރެއިން، ކަސްޓަމަރުންގެ ބޭންކިންގ މަޢުލޫމާތު ސެކުޔަރ ޕޭމަންޓްއެއް ހަދަން ބޭނުންވާ މިންވަރަށް އަދި މިންގަނޑަށް މެނުވީ ރައްކާކޮށްފައި ނުބަހައްޓާކަމަށެވެ. މިގޮތުން އާރްޓީއެލް ސިސްޓަމްގައި ބޭންކު ކާޑު ބޭނުންކުރެވޭނީ ޕާޓްނަރިންގ ބޭންކުގެ ސެކިޔުރިޓީ ސްޓެންޑަރޑްތަކާއި އެއްގޮތަށް ކަމުގައިވެސް ވަނީ ބުނެފައެވެ. އެމްޓީސީސީން ބުނީ އާރްޓީއެލް ސިސްޓަމްގައި ކާޑު ޓްރާންސެކްޝަން ހެދުމަށް ބޭނުންކުރާ ޑިޖިޓަލް އާލަތްތަކަކީ ބައިނަލްއަޤްވާމީ ޕޭމަންޓް ކާޑު އިންޑަސްޓްރީގެ ސްޓޭންޑަޑްއަށް ސަރޓިފައި ކޮށްފައިވާ ވަސީލަތްތަކެއްކަމަށެވެ.

އަދި ފައިސާ ބަލައިގަތުމަށްވެސް އެ ކުންފުނިން ބޭނުންކުރަމުން ދަނީ ބޭންކް އޮފް މޯލްޑިވްސްގެ ޕޭމަންޓް ގޭޓްވޭކަމުން، ކަސްޓަމަރުންގެ ހުރިހާ ބޭންކިން މަޢުލޫމާތެއް ހިއްސާކުރާނީ ބީ.އެމް.އެލްގެ ސެކުޔަރ ޕްލެޓްފޯރމްއެއްގަކަމަށެވެ.

އާރްޓީއެލްގެ ތެރެއިން ފެރީއާއި ބަހުގެ ޚިދުމަތް އަންނަނީ ދެމުންނެވެ. އެގޮތުން އާރްޓީއެލް އެޕްލިކޭޝަން މެދުވެރިކޮށް އޮންލައިންކޮށް ފައިސާ ދައްކައިގެން ޓިކެޓް ނެގެއެވެ. އަދި އާރްޓީއެލް ބަސްތަކުގައި ކޮންޓެކްޓްލެސް ކޭޝް ކަރޑް ބޭނުންކޮށްގެންވެސް ފައިސާ ދެއްކެއެވެ.