ލޭބަރ ރިލޭޝަންސް އޮތޯރިޓީގެ ޚިދުމަތް ހއ.އަތޮޅަށް

ލޭބަރ ރިލޭޝަންސް އޮތޯރިޓީގެ ޔުނިޓެއް ހއ.އަތޮޅުގައި ޤާއިމްކޮށް، ޚިދުމަތް ދޭން ފަށްޓަވައިފިއެވެ. މި ޔުނިޓަކީ އެ ސަރަޙައްދުގެ ރަށްރަށުގެ ރައްޔިތުން، ވަޒީފާއާއި ގުޅޭ މައްސަލަތައް ހުށައެޅުމަށް ފަސޭހަކުރުމަށް ޤާއިމުކުރި ޔުނިޓެކެވެ.

ހއ. އަތޮޅުގެ ލޭބަރ ރިލޭޝަންސްގެ ޔުނިޓް ގާއިމުކޮށްފައިވަނީ ހއ.ދިއްދޫ، އަތޮޅު ކައުންސިލް އިދާރާގައެވެ. މިކަމަށްޓަކާ ބޭއްވި ރަސްމިއްޔާތެއްގައި މި ޔުނިޓް ހުޅުވައިދެއްވީ ތިލަދުންމަތީ އުތުރުބުރީ އަތޮޅު ކައުންސިލްގެ ރައީސް މޫސާ ޝަފީޤެވެ.

ހއ.އަތޮޅުގައި ހުޅުވި ލޭބަރ ރިލޭޝަންސް އޮތޯރިޓީގެ ޔުނިޓަކީ، އެ އޮތޯރިޓީން އަތޮޅުތަކުގައި ޤާއިމްކުރި މިފަދަ ހަތަރުވަނަ ޔުނިޓެވެ. ލޭބަރ ރިލޭޝަންސް އޮތޯރިޓީގެ މަޤުޞަދަކީ، ވަޒީފާދޭ ފަރާތްތަކާއި ވަޒީފާ އަދާކުރާ ފަރާތްތަކުގެ ޙައްޤުތައް ޙިމާޔަތްކޮށްދިނުމަށްޓަކައި، ހުށަހެޅޭ މައްސަލަތައް ބެލުމުގެ އިތުރުން، މުޅި އަތޮޅުގެ ވަޒީފާއާގުޅޭ މައްސަލަތައް ބެލުމުގެ މަސައްކަތް ކުރިއަށްގެންދިއުމެވެ.

އަތޮޅުތެރޭގައި ޤާއިމްކުރާ ލޭބަރ ރިލޭޝަންސް އޮތޯރިޓީގެ ޔުނިޓްތަކާއިގުޅިގެން ލިބޭނެ އެންމެބޮޑު ފަސޭހައަކީ، މާލޭގައި ހުންނަ އެ އިދާރާގެ އޮފީހަށް ބަރޯސާ ނުވެ އަމިއްލަ ރަށުގައި ނުވަތަ އެ ސަރަޙައްދުގައި ހުރި ޔުނިޓަކަށް މައްސަލަ ހުށައަޅައި، މައްސަލަ ބެލުމުގެ ފުރުޞަތު ލިބިގެންދިއުމެވެ. އަދި އެ މައްސަލައެއް ބަލާނީވެސް، އެ ސަރަޙައްދެއްގެ އެލްއާރްއޭގެ ޔުނިޓަކުންނެވެ. މިއާއެކު މިފަދަ މައްސަލަތައް ތަޙުޤީޤުކޮށް، ޙައްލު ހޯދުމަށްވެސް އަވަސްވެގެންދާނެއެވެ.

ޔުނިޓްގެ މަސައްކަތްތަކުގެ ތެރޭގައި ވަޒީފާއާ ބެހޭ ޤާނޫނަށް ޢަމަލުކުރާ މިންވަރު ބެލުމަށް ތަންތަން އިންސްޕެކްޓްކޮށް، ވަޒީފާއާއި ގުޅޭ ޤާނުނީ ލަފައާއި މައުލޫމާތު ފޯރުކޮށްދިނުންވެސް ހިމެނެއެވެ.

ވަޒީފާއާބެހޭ އެކިއެކި މައްސަލަތައް ހުށަހެޅޭ މިންވަރު ދުވަހެއް ދުވަހަކަށް އިތުރުވަމުން އަންނަކަމަށް އެލްއާރުއޭއިން ފާހަގަކުރެއެވެ. އެހެންކަމުން ސަރުކާރުގެ ސިޔާސަތާ އެއްގޮތައް މިފަދަ ގޮފިތަކެއް އަތޮޅުތެރޭގައި ޤާއިމްކޮށް ޚިދުމަތް ދޭން ފެށުމުން ޚިދުމަތް އަވަސްވުމާއި މައްސަލަތައް ހުށައެޅުމަށް ފަސޭހަވެގެން ދާނެއެވެ.

ހއ.އަތޮޅުގެ އިތުރުން ބ.އަތޮޅު، ރ.އަތޮޅު އަދި ށ.އަތޮޅުގައިވެސް ވަނީ މި ޚިދުމަތް ދޭން ފަށާފައެވެ.