އިނގިރޭސި ޕްރިމިއަރ ލީގުގެ ލިވަޕޫލަށް ކުޅެމުން އައި ބްރެޒިލުގެ ފޯވާދް ރޮބާޓޯ ފިރްމީނޯ، ސައުދީ ޕްރޯ ލީގުގެ އަލް-އަހްލީއަށް ސޮއިކޮށްފިއެވެ.
އުމުރުން 31 އަހަރުގެ ފިރްމީނޯ އަލް އަހްލީއަށް ސޮއިކޮށްފައިވަނީ ފްރީ އެޖެންޓެއްގެ ގޮތުގައެވެ. 2015 ވަނަ އަހަރު ލިވަޕޫލާއި ގުޅުނު ފިރްމީނޯ އެކްލަބާއެކު ހަދާފައިވި އެއްބަސްވުން ވަނީ މިދިޔަ ސީޒަނާއެކު ހަމަވެގެން ގޮސްފައެވެ. އޭނާވަނީ ލިވަޕޫލްގައި ހޭދަކުރި އަށް ސީޒަންގައި 362 މެޗް ކުޅެދީ 111 ލަނޑު ޖަހާދީފައެވެ.
މައުލޫމާތު ލިބިފައިވާގޮތިގައި ފިރްމީނޯ އަލް އަހްލީ އާއެކު ސޮއިކޮށްފައިވަނީ ތިން އަހަރު ދުވަހުގެ އެއްބަސްވުމެކެވެ. ފިރްމީނޯ ވެފައިމިވަނީ ސައުދީ ޕްރޯ ލީގުގެ ކްލަބްތަކުން ފަހަކަށް އައިސް އެލީގަށް ގެންގޮސްފައިވާ ފާހަގަކޮށްލެވޭ ކުޅުންތެރިންގެ ލިސްޓަށް އިތުރުވެގެން ދިޔަ އާ ކުޅުންތެރިއަކަށެވެ. އަދި އަލް އަހްލީއިން ވަރަށް ފަހުން ވަނީ ޗެލްސީއަށް ކުޅޭ ސެނެގާލްގެ ގޯލްކީޕަރ އެޑުއާޑް މެންޑީ ވެސް އެކްލަބަށް ގެނެސްފައެވެ.
ސައުދީ ޕްރޯ ލީގަށް މިހާރު ބަދަލުވެފައިވާ ފާހަގަކޮށްލެވޭ ކުޅުންތެރިންގެ ތެރޭގައި ކްރިސްޓިއާނޯ ރޮނާލްޑޯ، ކަރީމް ބެންޒީމާ، ކަލީޑޫ ކޯލީބާލީ، އެންގޮލޯ ކާންޓޭ، ރުބެން ނެވޭޒް، މާސެލޯ ބްރޮޒޮވިޗް ފާހަގަކޮށްލެވެ އެވެ. އަދި އިންގްލަންޑްގެ ކުރީގެ ކުޅުންތެރިޔާ ސްޓީވެން ޖެރާޑް ވަރަށް ފަހުން ވަނީ އަލް އިއްތިފާގްގެ ކޯޗުކަމާވެސް ހަވާލުވެފައެވެ.