އަންހެންކުދިން ބާރުވެރިކުރުވަން ރޯލް މޮޑެލްތަކެއް ތިބެންޖެހޭ ކަމަށާއި، ހުރިހާ ކަނބަލުންވެސް ކުރިއަރަމުން އަންނަ ދިވެހި ދަރިވަރުން ނަމޫނާ ލިބިގަންނާނެ ރޯލް މޮޑެލުންނަށް ވުމަށް އެޑިއުކޭޝަން މިނިސްޓަރ ޑރ.އާއިޝަތު އަލީ އެދިވަޑައިގަންނަވައިފިއެވެ.
ޑރ.އާއިޝަތު އަލީ މިކަމަށް އެދިވަޑައިގެންނެވީ މާލޭ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ޚިދުމަތަށް ދެ އަހަރު ފުރުމުގެ މުނާސަބަތުގައި ބޭއްވި ޚާއްސަ ޖަލްސާ ޝަރަފްވެރިކޮށްދެއްވައި ވާހަކަފުޅު ދައްކަވަމުންނެވެ.
ލޮނުޒިޔާރަތް ޕާކުގައި އަންގާރަދުވަހުގެ ރޭ ބޭއްވި މިޖަލްސާގައި މާލޭ ސިޓީ އަންހެނުންގެ ތަރައްގީއަށް މަސައްކަތްކުރާ ކޮމިޓީން އަންހެނުން ބާރުވެރިކޮށް އެކަނބަލުން ކުރައްވަމުން ގެންދަވާ އަގުހުރި މަސައްކަތަށް ހިތްވަރު ދިނުމަށްޓަކައި "ރަނި އެވޯޑް"ގެ ނަމުގައި އެވޯޑެއްވަނީ ދީފައެވެ. މިއެވޯޑް 13 ފަރާތަކަށް ވަނީ ދީފައެވެ.
މީގެއިތުރުން، މެއި 2022 އިން މެއި 2023ގެ ނިޔަލަށް ކޮމެޓީގެ މެމްބަރުންގެ ތެރެއިން ހުރިހާ ގޮތަކުން އެންމެ ރަނގަޅު ޕާފޯމަންސް ދައްކައިފާ 4 މެމްބަރުންނަށް ކޮމިޓީގެ ރައީސްގެ ފަރާތުން ޚާއްސަ އެވޯޑެއްވަނީ ދީފައެވެ. މިއެވޯޑް ހާސިލް ކުރީ
ގަލޮޅު ހުޅަނގު ދާއިރާގެ މެމްބަރު އައިމިނަތު އަބްދުލް ގައްޔޫމް އާއި، ގަލޮޅު މެދު ދާއިރާގެ މެމްބަރު ފާތިމަތު ޝިރްމީނާ އާއި
ހެންވޭރު އުތުރު ދާއިރާގެ މެމްބަރު ފާތިމަތު ލައިޒާ އާއި މައްޗަންގޯޅި އުތުރު ދާއިރާގެ މެމްބަރު ފާތިމަތު ބަދޫރާއެވެ.
އެވޯޑްތައް ހަވާލުކޮށްދެއްވުމަށްފަހޫ މިނިސްޓަރ އޮފް އެޑިއުކޭޝަން ޑރ.އާއިޝަތު އަލީ ދެއްކެވި ވާހަކަފުޅުގައި ވިދާޅުވީ، އެވޯޑް ލިބުނު ކަނބަލުންގެ މަސައްކަތްތެރިކަމުން ދިވެހި ކަނބަލުންނަކީ ހިތްވަރުގަދަ ކެރޭ ބައެއްކަން އެނގިގެން ހިނގައްޖެކަމަށެވެ. އަދި އިތުރު އަންހެން ކަނބަލުންވެސް އެބޭފުޅުންގެ ކިބައިން ނަމޫނާ ލިބިގަންނަ ބަޔަކަށް ވާނެކަމަށް އުއްމީދު ކުރައްވާ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، މިއަދު މިތަޖުރިބާކުރާ މިނިވަންކަމާއި ހައްގުތައް މާދަމާ ގޮސްދާނެކަމަށާއި، މިނިވަންކަން ދެމެހެއްޓުމަށް އެންމެ މުހިންމު ކަމަކީ އަންހެން ދަރިވަރުންނަށް ތައުލީމް ދިނުންކަމަށެވެ. އެގޮތުން އަންހެންކުދިން ބާރުވެރިކުރުވަން ރޯލް މޮޑެލްތަކެއް ތިބެންޖެހޭކަމަށާއި، ހުރިހާ ކަނބަލުންވެސް ކުރިއަރަމުން އަންނަ ދިވެހި ދަރިވަރުން ނަމޫނާ ލިބިގަންނާނެ ރޯލް މޮޑެލުންނަށް ވުމަށް މިނިސްޓަރު އެދިވަޑައިގެންނެވިއެވެ.
މިޖަލްސާގައި މާލޭ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުންނާއި، އެކިއެކި ދާއިރާތަކުން ފާހަގަކޮށްލެވޭ ހިދުމަތްތެރި ކަނބަލުންނާއި، މާލޭ ސިޓީގެ ގިނަ އަދަދެއްގެ ކަނބަލުން ބައިވެރިވިއެވެ.