އެމެރިކާއާއި ޗައިނާއާ ދެމެދު އުފެދިފައިވާ ނުތަނަވަސް ކަން ހައްލުކޮށް މަސްރަޙު ފިނިކުރަން ޗައިނާގެ ރައީސް ޝީ ޖިންޕިންގްއާއި އެމެރިކާގެ ޚާރިޖީ ވަޒީރު އެންތަނީ ބްލިންކަން އެއްބަސްވެ ވަޑައިގަންނަވައިފިއެވެ. ދެ ބޭފުޅުން މި ކަމާ ގުޅޭ ގޮތުން މަޝްވަރާ ކުރައްވާފައި ވަނީ ޗައިނާގެ ވެރިރަށް ބެއިޖިންގަށް ބްލިންކަން މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ޝީއާ އެކު ބޭއްވެވި ބައްދަލުވުމެއްގައެވެ.
ބްލިންކަންގެ މި ދަތުރުފުޅުގެ މައިގަނޑު މަޤުޞަދަކީ ވެސް ދެ ޤައުމުގެ ދެމެދުގައި އުފެދިފައި އޮތް ޚިޔާލު ތަފާތުވުންތަކުގެ ސަބަބުން އުފެދިފައި އޮތް ނުވަތަނަވަސް ކަން ހައްލުކުރެވޭނެ ގޮތްތަކެއް ހޯދައި، އެ ކަންކަމާ މެދު މަޝްވަރާ ކުރެއްވުމެވެ. އަދި، މަސްރަޙު އިތުރަށް ހޫނުވެ ހަމަނުޖެހުމަކަށް މަގުފަހިވުމުގެ ފުރުޞަތު ހަނިކުރުމެވެ.
ދެ ބޭފުޅުންގެ ދެމެދުގައި ކުރެއްވި މަޝްވަރާތަކުން ހޯދުނު ކުރިއެރުންތަކަށް ޝީ ވަނީ މަރުޙަބާ ވިދާޅުވެފައެވެ. އަދި، ދެ ބޭފުޅުން ވެސް ވަނީ ދެ ޤައުމުގެ ދެމެދުގައި އޮތް ގުޅުންތައް އިތުރަށް ބަދަހިކޮށް، ހަމަނުޖެހުންތައް ޖާގަ ނުދިނުމުގެ މުހިންމު ކަން ފާހަގަކުރައްވާފައެވެ.
ދެ ޤައުމުގެ އަސްކަރިއްޔާގެ މެދުގައި އަލުން މުވާސަލާތީ ރޮނގުތައް ހުޅުވަން ބްލިންކަން ވަނީ ޝީއަށް ހުށަހަޅުއްވާފައެވެ. ނަމަވެސް، އެ ކަމަށް ޗައިނާއިން އަދި އެއްބަސްވެފައެއް ނުވެއެވެ. ސަބަބެއް ކަމަށް ޗައިނާއިން ދައްކަނީ އެ ޤައުމާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކެވެ.
ދެ ޤައުމުގެ ދެމެދުގައި ޚިޔާލު ތަފާތުވުން އުފެދިފައިވާ އެހެން މައްސަލަތަކުގެ ތެރޭގައި ތައިވާނުގެ މިނިވަންކަމާ ގުޅޭ މައްސަލައާއި، ވިޔަފާރިއާއި، ޗައިނާގެ ކޮމްޕިޔުޓަރ ޗިޕް އުފައްދާ ސިނާޢަތަށް އެމެރިކާއިން ކުރިމަތިކުރަމުންދާ ހުރަސްތަކާއި، އިންސާނީ ހައްޤުތަކުގެ އިތުރުން ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައާ ގުޅޭ މައްސަލަ ހިމެނެއެވެ. ޝީއާއި ބްލިންކަންގެ ބައްދަލުވުމުގައި މި ކަންކަމާ ގުޅޭ ގޮތުން ވެސް ފުޅާ ދާއިރާއެއްގައި މަޝްވަރާ ކުރެއްވިއެވެ.
ޝީއާއި ބްލިންކަންގެ ބައްދަލުވުމާ ގުޅޭ ގޮތުން ވާހަކަފުޅު ދައްކަވަމުން އެމެރިކާގެ ރައީސް ޖޯ ބައިޑަން ވިދާޅުވީ ދެ ޤައުމުގެ ދެމެދުގައި އޮތް ގުޅުން މި ވަގުތު ދަތުރުކުރަމުން ދަނީ ރަނގަޅު މަގަކުން ކަމަށް ގަބޫލުފުޅު ކުރައްވާ ކަމުގައެވެ. އަދި، ބްލިންކަންގެ ދަތުރުފުޅުގައި ކުރިއެރުންތަކެއް ހޯދިފައިވާ ކަމުގައެވެ. އެ ކަމަށް އޭނާ ވަނީ ބްލިންކަންއަށް ތަޢުރީފު ވެސް ކުރައްވާފައެވެ.
ބްލިންކަން އަކީ 2021 ވަނަ އަހަރު ބައިޑަން އެމެރިކާގެ ރައީސް ކަމުގެ މަގާމާ ހަވާލުވެ ވަޑައިގެންނެވި ފަހުން ޗައިނާއަށް ދަތުރުފުޅެއް ކުރައްވާ އެމެރިކާ ސަރުކާރުގެ އެންމެ އިސް އޮފިޝަލެވެ. ބްލިންކަންގެ ދަތުރުފުޅު ކުރިން ރޭވިފައި އޮތީ ފެބުރުވަރީ މަހަށެވެ. ނަމަވެސް، ޗައިނާއިން އެމެރިކާގެ ސަރަޙައްދަށް ޖާސޫސީ ބެލޫނެއް ނުވަތަ ފުއްޕާހަމެއް ފޮނުވި މައްސަލައިގައި ބްލިންކަން ވަނީ އޭނާގެ ދަތުރުފުޅު ފަސް ކުރައްވާފައެވެ. އެމެރިކާއިން ވަނީ ޙަމަލާދީ އެ ބެލޫން ވައްޓައިލާފައެވެ.
ބްލިންކަންގެ މި ދަތުރުފުޅުގައި އޭނާ ވަނީ ޗައިނާގެ ޚާރިޖީ ވަޒީރު ޗިން ގަންގާއި، ވެރިކަންކުރާ ކޮމިޔުނިސްޓު ޕާޓީގެ ޚާޜިޖީ ސިޔާސަތާ ބެހޭ އިސް އޮފިޝަލް ވޮންގް ޔީއާ ވެސް ބައްދަލުކުރައްވާފައެވެ. އޭނާގެ މި ދަތުރުފުޅަށް ފަހު އެމެރިކާގެ ޓްރެޜަރީ ސެކްރެޓަރީ ޖެނެޓް ޔެލެންއާއި ކޮމަރސް ސެކްރެޓަރީ ޖީނާ ރައިމޮންޑޯ ޗައިނާއަށް ދަތުރުފުޅެއް ކުރެއްވުމަށް ހަމަޖެހިފައިވާ ކަމުގައި އޮފިޝަލުން ވިދާޅުވެއެވެ.
2022 ވަނަ އަހަރުގެ ނޮވެންބަރު މަހުގެ ތެރޭގައި އިންޑޮނީޝިޔާގެ ބާލީގައި ބޭއްވި ސަމިޓެއްގެ ހަވާސާގައި ޝީއާއި ބައިޑަން ބައްދަލު ކުރައްވާފައިވެއެވެ. އެ ބައްދަލުވުމާ އެކު ދެ ޤައުމުގެ ދެމެދުގައި އުފެދިފައި އޮތް ނުތަނަވަސް ކަމަށް ކޮންމެ ވެސް ވަރެއްގެ ފިނިކަމެއް ލިބުނު ނަމަވެސް، ޖާސޫސީ ބެލޫންގެ މައްސަލައިގައި ދެ ޤައުމުގެ ދެމެދުގައި އުފެދިފައި އޮތް ނުތަނަވަސް ކަން ވަނީ ބޮޑުވެފައެވެ.