މީގެ 111 އަހަރު ކުރިން ފެތުނު ޓައިޓޭނިކް އޮތް ސަރަޙައްދަށް ފަތުރުވެރިން ގޮވައިގެން ފީނި ކުޑަ ސަބްމެރިނެއް ގެއްލިގެން ހޯދަން ފަށައިފިއެވެ. އަމިއްލަ ކުންފުންޏެއް ކަމުގައިވާ އޯޝަންގޭޓް އެކްސްޕެޑިޝަންސްގެ "ޓައިޓަން"ގެ ނަން ދީފައިވާ ސަބްމެރިން ފެތިފައި ވަނީ ކެނެޑާގެ އިރުދެކުނު ފަރާތަށެވެ. ސަބްމެރިން ވީނުވީއެއް ނޭނގި ގެއްލުނުއިރު އޭގައި ޕައިލެޓުގެ އިތުރުން ހަތަރު ފަތުރުވެރިން ތިބި ކަމުގައި، އެ އުޅަނދު ހޯދުމުގެ މަސައްކަތް ކުރަމުންދާ އެމެރިކާގެ ކޯސްޓްގާޑުން ބުނެއެވެ.
ސަބްމެރިން ހޯދުމަށް ކުރަމުންދާ މަސައްކަތުގައި ކޯސްޓްގާޑުގެ އުޅަނދުފަހަރުގެ އިތުރުން މަތިންދާބޯޓުތައް ވެސް ދަނީ ބޭނުން ކުރަމުންނެވެ. އެ އުޅަނދަކީ ކަނޑުއަޑީގައި 96 ގަޑިއިރު ދަތުރުކުރުމުގެ ގާބިލުކަން ލިބިފައިވާ އުޅަނދެއް ނަމަވެސް، އެ އުޅަނދާ މުވާސަލާތު ކުރުމަށް ކުރަމުންދާ މަސައްކަތް އަދި ކާމިޔާބުވެފައި ނުވާ ކަމުގައި އޮފިޝަލުން ވިދާޅުވެއެވެ. އަދި، އުޅަނދު ފެން މައްޗަށް އަރާފައި ނުވާ ކަމަށް ވެސް އޮފިޝަލުން ވިދާޅުވެއެވެ.
ޓައިޓަން ހޯދުމަށް އެމެރިކާގެ މެސެޗުސެޓްސްގެ ކޭޕް ކޮޑްގެ އިރުމަތީ ފަރާތުން 1,450 ކިލޯމީޓަރުގެ ސަރަޙައްދެއް ބަލައިހޯދުމުގެ މަސައްކަތް މިހާރު ދަނީ ކުރަމުންނެވެ. އެ އުޅަނދު ހޯދުމަށް ސޯނާ ބޭނުންކޮށްގެން ކަނޑުގެ 13,000 ފޫޓު ފުނުގެ ސަރަޙައްދެއް ބަލަމުންދާ ކަމުގައި އޮފިޝަލުން ވިދާޅުވިއެވެ.
"ސަބްމެރިން ހޯދަން މަސައްކަތް ކުރަމުން ދަނީ ވަރަށް ދަތި ސަރަޙައްދެއްގައި،" އެމެރިކާގެ ކޯސްޓްގާޑުގެ ރިޔަރ އެޑްމިރަލް ޖޯން މޯގަރ ވިދާޅުވިއެވެ. ސަބްމެރިންނާ އެކު ދަތުރުކުރަމުންދިޔަ ޕޯލާ ޕްރިންސް ނަމަކަށް ކިޔާ ބޯޓާ ދެމެދު މުވާސަލާތު ކެނޑިފައި ވަނީ، ސަބްމެރިން ކަނޑުގެ އަޑިއަށް ފީނައިގަތްތާ އެއް ގަޑިއިރާ 45 ވަރަކަށް މިނެޓު ފަހުން ކަމުގައި ވެސް ކޯސްޓްގާޑުން ބުނެއެވެ.
މި މަސައްކަތުގައި ޓައިޓަން އޮޕަރޭޓް ކުރާ އޯޝަންގޭޓް އެކްސްޕެޑަޝަން ކުންފުނިން ވެސް ދަނީ މަސައްކަތް ކުރަމުންނެވެ. މި ހާދިސާ ހިނގި ވަގުތު އުޅަނދުގައި ތިބި ފަތުރުވެރިންގެ ތެރޭގައި އިނގިރޭސިވިލާތުގެ ބިލިޔަނަރެއް ކަމުގައިވާ ހޭމިޝް ހާޑިންގް ހިމެނޭ ކަމުގައި އޭނާގެ ޢާއިލާއިން ސޯޝަލް މީޑިޔާގައި ރިޕޯޓުކޮށްފައިވެއެވެ.
އައިސްބަރގެއްގައި ޖެހިގެން ޓައިޓޭނިކް ކަނޑުގެ އަޑިއަށް ފެތިފައި ވަނީ 1912 ވަނަ އަހަރުގެ އޭޕްރިލް މަހުގެ 15 ވަނަ ދުވަހުއެވެ. އެ ހާދިސާގައި ބޯޓުގައި ދަތުރުކުރި 1,500 އެއްހާ ފަސިންޖަރުންނާއި ފަޅުވެރިން މަރުވިއެވެ. އޯޝަންގޭޓް އެކްސެޑިޝަންސަކީ އެ އުޅަނދުގެ ބައިތައް ބަލައިލުމުގެ ފުރުޞަތު ފަތުރުވެރިންނަށް ފޯރުކޮށްދޭ ކުންފުންޏެކެވެ.
ސަބްމެރިނެއްގައި ޓައިޓޭނިކް ފެތިފައިވާ ސަރަޙައްދަށް ފަތުރުވެރިން ގެންދިޔުމަށް އެ ކުންފުނިން 250,000 އެމެރިކާގެ ޑޮލަރުގެ އަގެއް ނަގައެވެ. އެ ސަބްމެރިނަށް ޓައިޓޭނިކް އޮންނަ ސަރަޙައްދަށް ފީނާފައި ދަތުރުކުރަން ދެ ގަޑިއިރު ހޭދަވެއެވެ. ޓައިޓޭނިކްގެ ބައިތައް ފެތިފައި އޮތީ ކަނޑުގެ 12,500 ފޫޓު އަޑީގައެވެ.