މި މަހުގެ ފަހުކޮޅު މެލޭޝިއާގައި ބާއްވާ އޭޝިއަން ކްރިކެޓް ކައުންސިލުގެ 16 އަހަރުން ދަށުގެ އީސްޓް ޒޯނުގެ މުބާރާތުގައި ވާދަކުރާ ދިވެހި ޓީމާ ބައްދަލުކުރައްވައި ރައީސުލްޖުމްހޫރިއްޔާގެ ނައިބު ފައިސަލް ނަސީމް ހިތްވަރުދެއްވައިފިއެވެ.
މުބާރާތުގައި ރާއްޖެއާއެކު ވާދަކުރާ ޤައުމުތަކަކީ މުބާރާތް ބާއްވާ މެލޭޝިއާގެ އިތުރުން ސިންގަޕޫރު، ހޮންގް ކޮންގް، ނޭޕާލް، ތައިލޭންޑް އަދި އިންޑޮނޭޝިއާ އެވެ. މި މުބާރާތް ކުރިޔަށްދާނީ މެލޭޝިއާގެ ވެރިރަށް ކުއާލަ ލަމްޕޫރުގައި ޖޫން 24 އިން ޖުލައި 4 ގެ ނިޔަލަށެވެ. މިއީ 2019 ވަނަ އަހަރުގެ ފަހުން ރާއްޖޭގެ 16 އަހަރުންދަށުގެ ޓީމެއް ބައިނަލްއަޤްވާމީ މުބާރާތެއްގައި ވާދަކުރާ ފުރަތަމަ ފަހަރެވެ.
ނައިބު ރައީސް ފައިސަލް ނަސީމާއެކު ބޭއްވެވި މި ބައްދަލުވުމުގައި ޓީމުގެ 14 ކުޅުންތެރިންގެ އިތުރުން ކޯޗު ރިޔާޒް ރަޝީދާއި ކްރިކެޓް ބޯޑުގެ ރައީސް މުޙައްމަދު ފައިސަލް އަދި ނައިބު ރައީސް އަޙްމަދު ހުސެއިން ބައިވެރިވެވަޑައިގެންނެވި އެވެ.
ބައްދަލުވުމުގައި ނައިބު ރައީސް ވަނީ ޓީމުގެ ކުލުންތެރިންނަށް ހިތްވަރުދެއްވާފައެވެ. އަދި ކާމިޔާބީ ހޯދުމަށް ގަދައަޅާ މަސައްކަތްކުރުމަށް ނައިބު ރައީސް ވަނީ ޓީމުގެ ކުޅުންތެރިންގެ ކިބައިން އެދިވަޑައިގެންފައެވެ.