ޔުގާންޑާގެ ހުޅަނގުގައި އޮންނަ އުމްޕޮންޑްވޭގެ ސްކޫލަކަށް ޙަމަލާދީ 37 މީހުން މަރައިލުމަށްފަހު، ހަ ދަރިވަރުން ރަހީނުކޮށްފިއެވެ. މިއީ ފަހުގެ ތާރީޚެއްގައި ޔުގާންޑާގައި ހިންގާފައިވާ މި ފަދަ އެންމެ ހިތާމަވެރި އެއް ހާދިސާއެވެ. އުމްޕޮންޑްވޭ އަކީ ޑިމޮކްރެޓިކް ރިޕަލްބްލިކް އޮފް ކޮންގޯގެ ސަރަޙައްދީ ރޮނގު ކައިރީގައި އޮންނަ ރަށެކެވެ. މި ޙަމަލާގައި މަރުވި މީހުންގެ ތެރޭގައި ހިމެނެނީ ކިތައް ދަރިވަރުންނަށް އަދި ސާފެއް ނޫނެވެ.
ސްކޫލަށް ޙަމަލާދީފައި ވަނީ ކޮންގޯގައި ހަރަކާތްތެރިވާ އެލައިޑް ޑިމޮކްރެޓިކް ފޯސަސް (އޭ.ޑީ.އެފް)ގެ ހަނގުރާމަވެރިން ކަމަށް ޔުގާންޑާގެ ފުލުހުންނާއި އަސްކަރިއްޔާއިން ތުހުމަތު ކުރެއެވެ. އެއީ އައި.އެސް ޖަމާޢަތާ ގުޅުން އޮންނަ ޓެރެރިސްޓު ޖަމާޢަތެކެވެ. އެ ގުރޫޕުން ޙަމަލާދީފައި ވަނީ އުމްޕޮންޑްވޭގައި ހުންނަ ލިޔުބިރިޔާ ސެކަންޑްރީ ސްކޫލަށެވެ. އެ ގުރޫޕުގެ މެންބަރުން ވަނީ ސްކޫލްގެ ޑޯމިޓަރީތަކުގެ ދޮރުތައް ބަންދު ކުރުމަށް ފަހު އެ ތަނުގައި ހުޅުޖަހާފައެވެ. އަދި، ސަލާމަތްވާން މަސައްކަތް ކުރި ކުދިންނަށް ވަޅިން ޙަމަލާދީފައެވެ.
މި ޙަމަލާގައި މަރައިލާފައިވާ 36 މީހުންގެ ހަށިގަނޑު ފެނިފައިވާއިރު، އިތުރު އަށް މީހަކު ޒަޚަމުވެފައިވާ ކަމުގައި ޔުގާންޑާގެ އަސްކަރިއްޔާގެ ތަރުޖަމާނު ފީލިކްސް ކުލިއީހަޔާ ވިދާޅުވިއެވެ. މަރުވެފައިވާ މީހުންގެ ހަށިތައް މިހާރު ވަނީ ބްވިއޭރާ ހޮސްޕިޓަލަށް ގެންގޮސްފައެވެ.
ރަހީނުކޮށްފައިވާ ހަ ދަރިވަރުންނާ އެކު އޭ.ޑީ.އެފްގެ ހަނގުރާމަވެރިން ފިލާފައި ވަނީ ވިރުންގާ ނޭޝަނަލް ޕާކަށް ކަމަށާއި، އެ ކުދިން ސަލާމަތް ކުރުމަށް މަސައްކަތް ކުރަމުންދާ ކަމުގައި ޔުގާންޑާގެ އޮފިޝަލުން ވިދާޅުވެއެވެ. އެ ޕާކަކީ ޔުގާންޑާގައި ރުވާންޑާ ގުޅޭ ސަރަޙައްދީ ރޮނގު ކައިރީގައި އޮންނަ ޖަންގަލީގެ ސަރަޙައްދެކެވެ. މަރުވި މީހުންގެ ހަށިތައް ވަރަށް ބޮޑަށް އަންދާފައިވާއިރު، އެއީ ކޮން ބަޔެއް ކަން ދެނެގަތުމަށް އޮފިޝަލުން ދަނީ މަސައްކަތް ކުރަމުންނެވެ.
އޭ.ޑީ.އެފަކީ 1990ގެ އަހަރުތަކުގެ ތެރޭގައި އުފެދިގެންދިޔަ ހަނގުރާމަވެރި ޖަމާޢަތެކެވެ. އެ ޖަމާޢަތް އެކުލެވިގެން ވަނީ ޔުގާންޑާގެ ސަރުކާރާ ދެކޮޅު ހަތިޔާރުއެޅި ގުރޫޕުތަކުގެ މައްޗަށެވެ. އެ ޖަމާޢަތުން 1990ގެ އަހަރުތަކުގެ ތެރޭގައި ކޮންގޯގެ އިރުމަތީގައިވާ ބައެއް ސަރަޙައްދުތަކަށް އަތްގަދަކުރިއެވެ. އަދި، 2019 ވަނަ އަހަރުން ފެށިގެން އެ ޖަމާޢަތުން އައި.އެސް. ޖަމާޢަތާ ގުޅިގެން ޓެރެރިސްޓު އަމަލުތައް ހިންގަން ފަށާފައިވާ ކަން ފާހަގަކުރެވެއެވެ.
އޭ.ޑީ.އެފުން ޔުގާންޑާއަށް އަރައި ޓެރެރިސްޓު ޙަމަލާތައް ދީފައި ވަނީ މަދު ފަހަރަކުއެވެ. ނަމަވެސް، 1998 ވަނަ އަހަރު އެ ޖަމާޢަތުގެ ހަނގުރާމަވެރިން ވަނީ ޔުގާންޑާގެ ކުޚްވަމްބާ ޓެކްނިކަލް އިސްޓިޓިއުޓަށް ޙަމަލާދީފައެވެ. އެ ޙަމަލާގައި ވެސް ހަނގުރާމަވެރިން ވަނީ ސްކޫލްގައި ހުޅުޖަހާފައެވެ. އެ ހާދިސާގައި 80 ދަރިވަރުން މަރުވިއެވެ.
ފަހުގެ ތާރީޚެއްގައި ޔުގާންޑާގައި މި ފަދަ އިތުރު ޙަމަލާއެއް ދީފައި ވަނީ 2010 ވަނަ އަހަރުއެވެ. އެ އަހަރުގެ ކަމްޕާލާގައި ދިން ބޮމުގެ ދެ ޙަމަލާއެއްގައި 76 މީހުން މަރުވިއެވެ. އެ ޙަމަލާގައި ޒިންމާ ވަނީ ސޮމާލިޔާގައި ހަރަކާތްތެރިވާ އަލް-ޝަބާބް ޖަމާޢަތުގެ ޓެރެރިސްޓުންނެވެ.