ރަޝިޔާއާއި ޔޫކްރެއިނާ ދެމެދު ސުލްޙަ ގާއިމުކުރަން އެފްރިކާގެ ހަ ޤައުމަކުން ގުޅިގެން އެކުލަވައިލާފައިވާ ހުށަހެޅުންތަކަށް ރަޝިޔާގެ ރައީސް ވްލަޑިމިޔަރ ޕުޓިން ފާޑު ވިދާޅުވެއްޖެއެވެ. އެފްރިކާގެ ޤައުމުތަކުން ހުށަހަޅާފައިވާ ހުށަހެޅުންތަކަށް ޕުޓިން ފާޑު ވިދާޅުވެ ވާހަކަފުޅު ދައްކަވާފައި ވަނީ އެފްރިކާގެ ހަ ޤައުމެއްގެ އިސްވެރިންނާ އެކު ބޭއްވެވި ބައްދަލުވުމެއްގައެވެ. ރަޝިޔާ-ޔޫކްރެއިން ހަނގުރާމަ ނިމުމަކަށް ގެނައުމަށް ކުރަމުންދާ މަސައްކަތްތައް ކުރިއަރުވައި މެދިވެރިއެއްގެ ދައުރު އަދާކުރަން އެފްރިކާ ބައްރުގެ ހަ ޤައުމަކުން ގުޅިގެން ދަނީ މަސައްކަތް ކުރަމުންނެވެ.
މި ކަމާ ގުޅޭ ގޮތުން ޕުޓިންއާ މަޝްވަރާ ކުރުމަށް ސެއިންޓް ޕީޓަރސްބަރގަށް ވަޑައިގަންނަވާފައިވާ ބޭފުޅުންގެ ތެރޭގައި ދެކުނު އެފްރިކާގެ ރައީސް ސިރިލް ރަމަފޯސާއާއި، ސެނެގޯލްގެ ރައީސް މެކް ސޯލާއި، ޒެމްބިޔާގެ ރައީސް ހަކައިންދޭ ހިޗިމޭލާއާއި، ކޮމޮރޯސްގެ ރައީސް އަޒަލީ އަސުމަނީ ހިމެނި ވަޑައިގަންނަވެއެވެ. އަދި، މިޞްރުގެ ބޮޑުވަޒީރު މުޞްޠަފާ މަދްބޫލީއާއި ޑިމޮކްރެޓިކް ރިޕަބްލިކް އޮފް ކޮންގޯ ސަރުކާރުގެ އިސް އޮފިޝަލެއް ވެސް ހިމެނި ވަޑައިގަންނަވައެވެ.
މި ބައްދަލުވުން ފެއްޓެވުމުގެ ގޮތުން ވާހަކަފުޅު ދައްކަވަމުން ޕުޓިން ވަނީ އެފްރިކާ ބައްރުގެ ޤައުމުތަކަށް އެކި ދާއިރާތަކުން އެހީތެރިކަން ފޯރުކޮށްދިނުމުގައި ރަޝިޔާއިން ދެމިއޮންނާނެ ކަމުގައެވެ. ނަމަވެސް، އެފްރިކާގެ ވަފްދުގެ އިސްވެރިންގެ ރޭވުންތައް ހުށަހަޅަން ފެއްޓެވުމުން ޕުޓިން ވަނީ އެ ކަމަށް ހުރަސް އަޅުއްވާފައެވެ. އަދި، އެ ބޭފުޅުންގެ ހުށަހެޅުންތައް ކާމިޔާބު ނުވާނެ ސަބަބުތައް ވިދާޅުވެދެއްވާފައެވެ.
ޕުޓިން ވިދާޅުވީ ރަޝިޔާ ސިފައިން ޔޫކްރެއިނަށް ފޮނުވައިގެން ހަނގުރާމަ ފެށުމުގެ ކުރިން ވެސް ހުޅަނގާއި ޔޫކްރެއިނުން ގުޅިގެން ރަޝިޔާއާ ދެކޮޅަށް ހަނގުރާމަ ފަށާފައިވާ ކަމުގައެވެ. އަދި، ދުނިޔޭގެ ބާޒާރުގައި ކާބޯތަކެތީގެ އަގުތައް އުފުލުނީ ރަޝިޔާގެ އަމަލުތަކުގެ ސަބަބުން ނޫން ކަމަށާއި، އެ ކަމުގެ ޒިންމާ ހުޅަނގުގެ ބާރުތަކުން ނަގަން ޖެހޭނެ ކަމުގައެވެ.
"ސުލްޙައާ ގުޅޭ ގޮތުން މަޝްވަރާ ކުރަން ރަޝިޔާއިން އަބަދުވެސް ތައްޔާރު. ނަމަވެސް، ހަމަހަމަކަން ދަމަހައްޓަން ޖެހޭނެ. އަދި، ހުރިހާ ފަރާތެއްގެ މަސްލަޙަތަށް އިޙުތިރާމު ކުރަން ޖެހޭނެ،" ޕުޓިން ވިދާޅުވިއެވެ.
ޔޫކްރެއިންގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުމުގެ ފުރުޞަތު ރަޝިޔާއިން ދެމުން ގޮސްފައިވާ ކަން ފާހަގަކޮށް ޕުޓިން ވިދާޅުވީ، އެފްރިކާ ބައްރުގެ ޤައުމުތަކަށް އެ ތަކެތި ފޯރުކޮށްދެވުނު ނަމަވެސް ކާބޯތަކެތީގެ އަގުތައް ދަށްވެފައި ނުވަނީ މުއްސަނދި ޤައުމުތަކުން އެ ތަކެތީގެ ނާޖާއިޒު ފައިދާ ނަގަމުންދާތީ ކަމުގައެވެ.
އަދި، ސުލްޙައިގެ މަޝްވަރާތަކަށް ރަޝިޔާއިން އެއްވެސް އިރެއްގައި ދެކޮޅު ހަދާފައި ނުވާނެ ކަމުގައި ވެސް ޕުޓިން ވިދާޅުވިއެވެ. ނަމަވެސް، ޔޫކްރެއިނުން ސުލްޙަވާން ބޭނުންނުވާ ކަމަށާއި، ޔޫކްރެއިނާ އެކު ސުލްޙަވެވޭނީ، ރަޝިޔާއިން ވެރިވެގަނެފައިވާ ސަރަޙައްދުތަކަކީ ރަޝިޔާގެ ބައެއްގެ ގޮތުގައި ގަބޫލުކުރުމުން ކަމުގައި ވެސް އޭނާ ވިދާޅުވިއެވެ.
ޕުޓިންއާ ބައްދަލުކުރެއްވުމުގެ ކުރިން އެފްރިކާގެ އިސްވެރިންގެ ވަފުދު ވަނީ ޔޫކްރެއިންގެ ވެރިރަށް ކީވަށް ވަޑައިގަންނަވައި އެ ޤައުމުގެ ރައީސް ވޮލޮޑޮމީރް ޒެލެންސްކީއާ ބައްދަލު ކުރައްވާފައެވެ. އެ ބޭފުޅުންނާ ވާހަކަފުޅު ދައްކަވަމުން ޒެލެންސްކީ ވިދާޅުވީ ރަޝިޔާއިން އަތްގަދަކޮށްފައިވާ ޔޫކްރެއިންގެ ބިންތަކުން ފައިބަން އެއްބަސްނުވާހާ ހިނދަކު ހިނދަކު ރަޝިޔާއާ އެކު ސުލްޙައިގެ މަޝްވަރާތައް ނުފަށާނެ ކަމުގައެވެ. ނަމަވެސް، ރަޝިޔާއިން މީގެ ކުރިން ވެސް ވަނީ ޔޫކްރެއިންގެ ރަށްތަކުން ނުފައިބާނެ ކަމަށް ބުނެފައެވެ.
އެފްރިކާގެ ޤައުމުތަކުގެ ހުށަހެޅުންތަކާ ގުޅޭ ގޮތުން ރަޝިޔާގެ ދިފާޢީ ވަޒީރު ސަރްގޭ ލެވްރޮފް ވިދާޅުވީ އެ ހުށަހެޅުންތަކުގެ މައިގަނޑު ބައިތައް ރަޝިޔާއިން ގަބޫލުކުރާ ކަމުގައެވެ. އަދި، ޒެލެންސްކީގެ ފަރާތުން އެއްވެސް މެސެޖެއް އެ ބޭފުޅުން ގެންނަވާފައި ނުވާ ކަމުގައި ވެސް ލެވްރޮފް ވިދާޅުވިއެވެ.
ރަޝިޔާގެ ރިޔާސީ ގަނޑުވަރު ކްރެމްލިންގެ ތަރުޖަމާނު ޑްމިޓްރީ ޕެސްކޮފް ވިދާޅުވީ އެފްރިކާގެ ހުށަހެޅުންތަކަކީ ހާސިލުކުރެވޭނެ ހުށަހެޅުންތަކެއް ނޫން ކަމުގައެވެ. ނަމަވެސް، މި ހުށަހެޅުންތައް ހަގީގަތަކަށް ހެދޭނެ ގޮތްތަކެއް އޮތްތޯ ބެއްލެވުމަށް ޕުޓިން އެފްރިކާގެ ޤައުމުތަކުގެ އިސްވެރިންނާ އެކު މަސައްކަތް ކުރައްވާނެ ކަމުގައި އޭނާ ވިދާޅުވިއެވެ.