އެމެރިކާއާއި ޗައިނާއާ ދެމެދު އުފެދިފައިވާ ނުތަނަވަސް ކަމަށް ހައްލެއް ހޯދުމާ ގުޅޭ ގޮތުން މަޝްވަރާ ކުރެއްވުމަށް އެމެރިކާގެ ޚާރިޖީ ވަޒީރު އެންތަނީ ބްލިންކަން ޗައިނާގެ ވެރިރަށް ބެއިޖިންގަށް ވަޑައިގަންނަވައިފިއެވެ. ދެ ޤައުމުގެ ދެމެދުގައި އޮތް ގުޅުންތައް ހީނަރުވެފައިވާ މި ދަނޑިވަޅުގައި ބްލިންކަން ބެއިޖިންގަށް ކުރައްވާ މި ދަތުރުފުޅަކީ ފާއިތުވި ފަސް އަހަރުގެ ތެރޭގައި އެމެރިކާގެ ޚާރިޖީ ވަޒީރަކު ޗައިނާއަށް ކުރައްވާ ފުރަތަމަ ދަތުރުފުޅެވެ.
އޭނާ އަކީ 2021 ވަނަ އަހަރު އެމެރިކާގެ ރައީސް ޖޯ ބައިޑަން އެ ޤައުމުގެ ރައީސް ކަމުގެ މަގާމާ ހަވާލުވެ ވަޑައިގެންނެވި ފަހުން ޗައިނާއަށް ދަތުރުފުޅެއް ކުރައްވާ އެމެރިކާ ސަރުކާރުގެ އެންމެ އިސް އޮފިޝަލެވެ. ބްލިންކަންގެ ދަތުރުފުޅު ކުރިން ރޭވިފައި އޮތީ ފެބުރުވަރީ މަހަށެވެ. ނަމަވެސް، ޗައިނާއިން އެމެރިކާގެ ސަރަޙައްދަށް ޖާސޫސީ ބެލޫނެއް ނުވަތަ ފުއްޕާހަމެއް ފޮނުވި މައްސަލައިގައި ބްލިންކަން ވަނީ އޭނާގެ ދަތުރުފުޅު ފަސް ކުރައްވާފައެވެ. އެމެރިކާއިން ވަނީ ޙަމަލާދީ އެ ބެލޫން ވައްޓައިލާފައެވެ.
ބެއިޖިންގަށް ކުރައްވާ މި ދަތުރުފުޅުގައި ބްލިންކަން ޗައިނާގެ ޚާރިޖީ ވަޒީރު ޗިން ގަންގާއި، ވެރިކަންކުރާ ކޮމިޔުނިސްޓު ޕާޓީގެ ޚާޜިޖީ ސިޔާސަތާ ބެހޭ އިސް އޮފިޝަލް ވޮންގް ޔީއާ ބައްދަލު ކުރައްވާނެއެވެ. އަދި، ޗައިނާގެ ރައީސް ޝީ ޖިންޕިންގާ އޭނާ ބައްދަލުކުރައްވާނެ ކަމަށް ވެސް ބެލެވޭއިރު، ޗައިނާއިން އެ ކަން ކަށަވަރު ކޮށްދީފައެއް ނުވެއެވެ.
ބްލިންކަންގެ މި ދަތުރުފުޅުގެ މައިގަނޑު ބޭނުމަކީ ދެ ޤައުމުގެ ދެމެދުގައި މަޝްވަރާތައް ބާއްވައި، މުވާސަލާތު ކުރުން މެދުކަނޑައިނުލާ ކުރިއަށް ގެންދިޔުމަށް ބާރު އެޅުއްވުމެވެ. ދެ ޤައުމުގެ ދެމެދުގައި މުވާސަލާތު ކުރުން މެދުކަނޑައިލާ ވާހަކަ ދެއްކުން ހުއްޓައިލައިފި ނަމަ، މަސްރަޙު އިތުރަށް ހޫނުވެ، ހަމަނުޖެހުމަކަށް މަގުފަހިވުމުގެ ފުރުޞަތު އޮތް ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
ބްލިންކަންގެ ދަތުރުފުޅާ އެކު ދެ ޤައުމުގެ ދެމެދުގައި އުފެދިފައި އޮތް ނުތަނަވަސް ކަން ހައްލުކޮށް، ގުޅުން ބަދަހިކުރުމުގެ މަޝްވަރާތައް ފެށިގެންދާނެ ކަމަށް ބެލެވެއެވެ. އަދި، ކުރިއަށް އޮތް ތަނުގައި އެމެރިކާގެ ޓްރެޜަރީ ސެކްރެޓަރީ ޖެނެޓް ޔެލެންއާއި ކޮމަރސް ސެކްރެޓަރީ ޖީނާ ރައިމޮންޑޯ ޗައިނާއަށް ދަތުރުފުޅެއް ކުރެއްވުމަށް ހަމަޖެހިފައިވާ ކަމުގައި އޮފިޝަލުން ވިދާޅުވެއެވެ.
އަދި، ބައިޑަންއާއި ޝީއާ ދެމެދު ބައްދަލުވުމެއް ބޭއްވުމަށް ވެސް ދެ ޤައުމުން މަޝްވަރާ ކުރަމުންދާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ކުރިއަށް އޮތް ދެ ތިން މަހެއްގެ ތެރޭގައި ޝީއާ ބައްދަލުކުރައްވައި، މަޝްވަރާ ކުރައްވަން ބޭނުންފުޅުވާ ކަމުގައި ދާދިފަހުން ބައިޑަން ވިދާޅުވެފައިވެއެވެ.
2022 ވަނަ އަހަރުގެ ނޮވެންބަރު މަހުގެ ތެރޭގައި އިންޑޮނީޝިޔާގެ ބާލީގައި ބޭއްވި ސަމިޓެއްގެ ހަވާސާގައި އެ ދެ ބޭފުޅުން ވަނީ ބައްދަލުކުރެއްވުމަށް ބާއްވަވާފައެވެ. އެ ބައްދަލުވުމާ އެކު ދެ ޤައުމުގެ ދެމެދުގައި އުފެދިފައި އޮތް ނުތަނަވަސް ކަމަށް ކޮންމެ ވެސް ވަރެއްގެ ފިނިކަމެއް ލިބުނު ނަމަވެސް، ޖާސޫސީ ބެލޫންގެ މައްސަލައިގައި ދެ ޤައުމުގެ ދެމެދުގައި އުފެދިފައި އޮތް ނުތަނަވަސް ކަން ވަނީ ބޮޑުވެފައެވެ.
އެމެރިކާއާއި ޗައިނާއާ ދެމެދު ޚިޔާލުތަފާތުވުން އުފެދިފައިވާ އެންމެ ބޮޑު އެއް މައްސަލައަކީ ތައިވާނުގެ މިނިވަންކަމާ ގުޅޭ މައްސަލައެވެ. އެމެރިކާއިން ގަބޫލުކުރާ ގޮތުގައި ތައިވާނަކީ މިނިވަން ދައުލަތެކެވެ. އަދި، ތައިވާނާ އެކު އަސްކަރީ ގޮތުންނާއި ސިޔާސީ ގޮތުން އެމެރިކާއިން ދަނީ ގުޅުންތައް ބަދަހި ކުރަމުންނެވެ. ނަމަވެސް، ޗައިނާއިން ގަބޫލުކުރާ ގޮތުގައި ތައިވާނަކީ ޗައިނާގެ ބައެކެވެ. އަދި، ކޮންމެ ވެސް ޒަމާނަކުން ޗައިނާއިން ތައިވާނަށް އަރައި އެ ރަށް ހިފާނެއެވެ.