ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ބަދަލުކުރަމުންދާ ޙަމަލާތަކުގެ ތެރެއިން ވެރިރަށް ޚަރްތޫމަށް ދިން ވައިގެ ޙަމަލާތަކެއްގައި 17 މީހުން މަރުވެއްޖެއެވެ. ޙަމަލާތަކުގައި މަރުވި މީހުންގެ ތެރޭގައި ފަސް ކުޑަކުދިން ވެސް ހިމެނެއެވެ.
ޙަމަލާތައް އަމާޒުކޮށްފައި ވަނީ ޢާންމުންގެ ގިނަ ޢަދަދެއްގެ ބަޔަކު ދިރިއުޅޭ ޔަރްމޫކް ޑިސްޓްރިކްޓަށް ކަމުގައި ރިޕޯޓުތައް ބުނެއެވެ. މި ޙަމަލާތަކުގައި ޢާންމުން ދިރިއުޅޭ 25 އަށްވުރެ ގިނަ ގެ ސުންނާފަތިކޮށްލާފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ޔަރްމޫކްގެ އިތުރުން އެ ސަރަޙައްދުގައި އޮންނަ މާޔޯ އަދި މަންޑެލާ ޑިސްޓްރިކްޓަށް ވެސް ވައިގެ ޙަމަލާތައް އަމާޒުކޮށްފައިވެއެވެ.
ޚަރްތޫމަށް ވަރުގަދަ ވައިގެ ޙަމަލާތަކެއް ދީފައި މި ވަނީ، އާރް.އެސް.އެފްގެ ފައުޖުތަކަށް އަމާޒުކޮށް ދެމުންދާ ޙަމަލާތައް އިތުރުކުރާނެ ކަމަށް ބުނެ، އެ ޤައުމުގެ އަސްކަރިއްޔާއިން އިންޒާރުދީފައިވާ ދަނޑިވަޅެއްގައެވެ. އޭޕްރިލް މަހުގެ 15 ވަނަ ދުވަހު ސޫދާންގައި ފެށި ހަމަނުޖެހުންތަކުގައި މިހާތަނަށް މަރުވެފައިވާ ޢާންމުންގެ ޢަދަދު 1,000 އަށްވުރެ މައްޗަށް އުފުލިފައިވާ ކަމުގައި ޑޮކްޓަރުންގެ ބައިނަލްއަޤުވާމީ ޖަމުޢިއްޔާއަކުން ބުންޏެވެ.
ޙަމަލާ ބަދަލުކުރުން މެދުކަނޑައިލަން އަސްކަރިއްޔާއާއި އާރް.އެސް.އެފުން އެތަކެއް ފަހަރެއް މަތިން ވަނީ އެއްބަސްވެފައެވެ. ނަމަވެސް، އެ އެއްބަސްވުމަށް ދެ ފަރާތުން ވެސް އަމަލުކޮށްފައި ނުވާ ކަން ފާހަގަ ކުރެވެއެވެ. މި ހަމަނުޖެހުންތަކާ ގުޅިގެން އެތަކެއް ސަތޭކަ ބަޔަކު މަރުވެފައިވާއިރު، ޚަރްތޫމްގައި ދިރިއުޅޭ 1.2 މިލިޔަނަށް ވުރެ ގިނަ މީހުން ވަނީ އެ ރަށް ދޫކޮށް ރައްކާތެރި ހިސާބުތަކަށް ބަދަލުވެފައެވެ. އަދި، ސޫދާން ދޫކޮށް އަވައްޓެރި ޤައުމުތަކަށް ހިޖުރަކޮށްފައިވާ އެ ޤައުމުގެ ރެފިއުޖީންގެ ޢަދަދު މިހާރު ވަނީ 400,000 އަށްވުރެ މައްޗަށް އަރާފައެވެ.
މި ހަމަނުޖެހުންތަކާ އެކު ޚަރްތޫމްގައި ލޫޓުވުން ވެސް ވަނީ އިތުރުވެފައެވެ. އެ ރަށުގެ ރައްޔިތުން ބުނީ، އާރް.އެސް.އެފަށް ނިސްބަތްވާ މީހުން ޢާންމުންގެ ގެދޮރަށް ވަދެ، ތިޖޫރީތައް ފަޅައިލާ، ލޫޓުވަމުންދާ ކަމުގައެވެ. އަދި ކާރު ފަދަ ދުއްވާ އުޅަނދުފަހަރު ވަގަށް ނަގަމުންދާ ކަމަށާއި، ބައެއް ގެތަކަށް އާރް.އެސް.އެފްގެ މެންބަރުން ވެރިވެގަނެފައިވާ ކަމުގައި ވެސް ޚަރްތޫމްގެ ރައްޔިތުން ބުނެއެވެ.
ޚަރްތޫމްގެ ބޮޑު ސަރަޙައްދަކުން ކަރަންޓުގެ ޚިދުމަތް ވެސް ވަނީ މެދުކެނޑިފައެވެ. އަދި، ފިހާރަތަކުން މުދާ ހުސްވެފައިވާއިރު ބޭސްފިހާރަތަކުން ބޭހުގެ ބާވަތްތައް ވެސް ވަނީ ހުސްވެފައެވެ. ސޫދާންގައި ހިނގަމުންދާ ދާޚިލީ ހަމަނުޖެހުންތަކާ ގުޅިގެން ހާލުގައި ޖެހި އިންސާނީ އެހީއަށް ބޭނުން ޖެހިފައިވާ އެތަކެއް މިލިޔަން ރައްޔިތުންނަށް އެހީގެ ސާމާނު ފޯރުކޮށްދޭން އެހީދޭ ޖަމާޢަތްތަކުން ދަނީ މަސައްކަތް ކުރަމުންނެވެ. ނަމަވެސް، ޙަމަލާ ބަދަލުކުރުމަށް ހުއްޓުމެއް ގެނެވިފައި ނުވާތީ، އެ ކަމަށް ވަނީ ބޮޑެތި ހުރަސްތައް ކުރިމަތިވެފައެވެ.