ރަޝިޔާއާއި ޔޫކްރެއިނާ ދެމެދު ސުލްޙަ ޤާއިމްކޮށް ހަނގުރާމަ ހުއްޓައިލަން ބާރުއެޅުމާގުޅޭ މަޝްވަރާތައް ކުރުމަށް ޔޫކްރެއިންގެ ވެރިރަށް ކީވަށް ދަތުރުކުރި އެފްރިކާގެ ހަ ޤައުމެއްގެ އިސްވެރިން ހިމެނޭ ވަފުދުގެ ދަތުރާ ދިމާކޮށް ރަޝިޔާއިން ކީވަށް މިސައިލް ޙަމަލާތަކެއް ދީފިއެވެ. އެފްރިކާގެ ވަފުދުގެ ބޭފުޅުން ކީވަށް ވަޑައިގަންނަވާފައި ވަނީ ޕޮލެންޑު މަގުން ރޭލުގައެވެ.
މި ދަތުރުފުޅުގައި ބައިވެރިވެ ވަޑައިގަންނަ ވަނީ ދެކުނު އެފްރިކާގެ ރައީސް ސިރިލް ރަމަފޯސާއާއި، ސެނެގޯލްގެ ރައީސް މެކް ސޯލާއި، ޒެމްބިޔާގެ ރައީސް ހަކައިންދޭ ހިޗިމޭލާއާއި، ކޮމޮރޯސްގެ ރައީސް އަޒަލީ އަސުމަނީއެވެ. މީގެ އިތުރުން މިޞްރާއި ޑިމޮކްރެޓިކް ރިޕަބްލިކް އޮފް ކޮންގޯގެ އިސްވެރިން ވެސް އެ ވަފުދުގައި ހިމެނި ވަޑައިގަންނަވައެވެ.
އެ ހަ ޤައުމަކީ ޔޫކްރެއިނުން އެކްސްޕޯޓްކުރާ ގޮވާމުގެ ބާވަތްތައް ވަރަށް ބޮޑަށް ބަރޯސާވާ ޤައުމުތަކެއްކަން ފާހަގަކުރެވެއެވެ. ރަޝިޔާ-ޔޫކްރެއިން ހަނގުރާމައާ ގުޅިގެން ކާބޯތަކެތީގެ ރައްކާތެރިކަން ކަށަވަރު ކުރުމަށް އެ ޤައުމުތަކަށް ބޮޑެތި ގޮންޖެހުންތަކާ ކުރިމަތިވިއެވެ.
އެފްރިކާ ބައްރުގެ ހަ ޤައުމެއްގެ އިސްވެރިންގެ ދަތުރުފުޅުގެ މައިގަނޑު މަޤުޞަދަކީ ރަޝިޔާއާއި ޔޫކްރެއިނާ ދެމެދު ސުލްޙައިގެ މަޝްވަރާތައް ފެށުމަށް ހިތްވަރުދީ، އެ ކަމުގައި މެދުވެރިއެއްގެ ދައުރު އަދާކުރުމެވެ. އެ ހަތަރު ބޭފުޅުންގެ ދަތުރުފުޅާ ދިމާކޮށް ރަޝިޔާއިން ކީވަށް މިސައިލް ޙަމަލާތަކެއް ދިނުމާ ގުޅިގެން ޔޫކްރެއިންގެ ޚާރިޖީ ވަޒީރު ޑްމިތްރޯ ކުލެބާ ވަނީ ރަޝިޔާއަށް ފާޑުވިދާޅުވެފައެވެ.
"އެ ވަފްދުގެ ދަތުރާ ދިމާކޮށް ރަޝިޔާއިން ކީވަށް ދީފައިވާ މިސައިލް ޙަމަލާތަކަކީ ވަފުދުގެ ބޭފުޅުންނަށް ރަޝިޔާއިން ދިން ނުރައްކާތެރި މެސެޖެއް. މާނައަކީ، ރަޝިޔާއިން ސުލްޙަވާން ބޭނުން ނުވާ ކަން. އަދި، ހަނގުރާމަ ނޫން މަގެއް އިޚުތިޔާރު ނުކުރާނެ ކަން،" ކުލެބާ ވިދާޅުވިއެވެ.
ރަޝިޔާގެ ޙަމަލާތަކާ ގުޅިގެން ޔޫކްރެއިންގެ ރިޔާސީ ގަނޑުވަރުގެ ތަރުޖަމާނު އަންދްރީ ޔަރްމަކް ވެސް ވަނީ ރަޝިޔާއަށް ފާޑުވިދާޅުވެފައެވެ. "ބޭރު ޤައުމުތަކުގެ ލީޑަރުންގެ ސަލާމަތަށް ނުރައްކާވާ ފަދަ އަމަލުތައް ހިންގަން ޕުޓިން ފަސް ނުޖެހޭނެ ކަން އެ ދަނީ ފެންނަމުން. އޭނާ އެއްވެސް ކަމަކާ މެދު އަޅައެއް ނުލާނެ. ހީކުރާ ކަހަލަ، އޭނާ ބޭނުން ކޮންމެ ކަމެއް ކުރެވޭނެއޭ. އެމެރިކާގެ ރައީސް ޖޯ ބައިޑަންގެ އިތުރުން އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝްގެ ދަތުރުފުޅާ ދިމާކޮށް ވެސް ކީވަށް މިސައިލް ޙަމަލާތައް ދީފައިވޭ،" ޔަރްމަކް ވިދާޅުވިއެވެ.
ވަފުދުގެ ބޭފުޅުންގެ ދަތުރުފުޅުގައި އެ ބޭފުޅުން ވަނީ ޔޫކްރެއިންގެ ރައީސް ވޮލޮޑޮމީރް ޒެލެންސްކީއާ ބައްދަލުކުރައްވާފައެވެ. އެ ބޭފުޅުންގެ ދަތުރުފުޅާ ދިމާކޮށް ރަޝިޔާއިން ދިން މިސައިލް ޙަމަލާތަކުގެ ތެރެއިން 12 މިސައިލެއް ދިފާޢުކޮށްފައިވާނެ ކަމުގައި ޔޫކްރެއިނުން ބުނެއެވެ. އޭގެ ތެރޭގައި ކިންޒާލް މަރުކާގެ ހައިޕަރސޮނިކް ހަ މިސައިލް ހިމެނޭ ކަމުގައި ވެސް ޔޫކްރެއިނުން ބުނެއެވެ. އެ ޙަމަލާތަކުގައި ތިން މީހަކު ޒަޚަމުވި ކަމުގައި އެ ޤައުމުގެ ދާޚިލީ ވުޒާރާއިން ބުނެއެވެ.
ޔޫކްރެއިނަށް ކުރައްވަމުން ގެންދަވާ ދަތުރުފުޅަށް ފަހު ވަފުދުގެ ބޭފުޅުން ރަޝިޔާގެ ސެއިންޓް ޕީޓަރސްބަރގަށް ޒިޔާރަތް ކުރައްވައި، އެ ޤައުމުގެ ރައީސް ވްލަޑިމިޔަރ ޕުޓިންއާ ބައްދަލުކުރައްވާނެއެވެ. އަދި، ޞުލްޙައިގެ މަޝްވަރާތަކުގައި ބައިވެރިވުމަށް ދަޢުވަތު އަރުވާނެއެވެ. ރަޝިޔާ އާއި ޔޫކްރެއިނާ ދެމެދު ސުލްޙަކުރުވަން އެފްރިކާގެ ހަ ޤައުމަކުން އިސްނަގައިގެން ކުރަމުންދާ މަސައްކަތްތައް ކާމިޔާބު ކުރެވޭނެކަމާމެދު މަސްރަޙު ދިރާސާކުރާ ފަރާތްތަކުން ދަނީ ސުވާލު އުފައްދަމުންނެވެ. އެއް ސަބަބަކީ، ޕުޓިންގެ ޒަޢާމަތުގައި ރަޝިޔާއާއެކު އެއްވެސް މަޝްވަރާއެއް ކުރަން ޔޫކްރެއިނުން ދެކޮޅު ހެދުމެވެ.