މޫދާއި ކަނޑަށް ކުނިއެޅުން ހުއްޓުވުމަށް ބާރު އެޅުމުގެ ގޮތުން މުޅި ރާއްޖޭގައި އައްސޭރިފަށް ސާފުކުރުމުގެ ބޮޑު ހަރަކާތެއް ރާއްޖޭގައި މިއަދު ފަށައިފިއެވެ.
"މޯލްޑިވްސް ފޯ ދި އޯޝަންސް" މި ނަމުގައި ކުރިއަށްގެންދާ މި ހަރަކާތަކީ ޕާލޭ މޯލްޑިވްސްއާއި މިނިސްޓްރީ އޮފް އެޑިޔުކޭޝަން އަދި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގުޅިގެން ކުރިއަށްގެންދާ ހަރަކާތެކެވެ. ދުނިޔޭގެ ކަނޑުތަކުގެ ދުވަހާގުޅުވައިގެން ކުރިއަށްގެންދާ މި ސާފުކުރުމުގެ ހަރަކާތް މިއަދު ހެނދުނު 6 އިން އިރުއޮއްސި 6 ޖެހުމާއި ހަމައަށް ރާއްޖޭގެ އެކި ހިސާބުތަކުގައި ކުރިއަށްދާނެއެވެ.
މާލޭ ސަރަޙައްދުގައި މި ހަރަކާތް ފަށްޓަވައިދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމެވެ. އެގޮތުން އެމަނިކުފާނު ވަނީ މާލޭގައި މި ހަރަކާތް ކުރިއަށްދާ ބައެއް ސަރަޙައްދުތަކަށް ވަޑައިގެން، ހަރަކާތުގެ ބައިވެރިންނާއެކު ސާފުކުރުމުގެ މަސައްކަތުގައި ޢަމަލީގޮތުން ބައިވެރިވެވަޑައިގެންފައެވެ.
ރިސޯޓްތައްވެސް ހިމެނޭހެން މި ހަރަކާތުގެ ތެރެއިން ރާއްޖޭގެ 250 އަށްވުރެ ގިނަ ރަށުގައި ބީޗްކްލީނަޕް ނުވަތަ އައްސޭރިފަށް ސާފުކުރުމުގެ ހަރަކާތްތައް މިއަދުގެ އެކި ވަގުތުތަކުގައި ހިންގުމަށް ވަނީ ހަމަޖެހިފައެވެ. އަދި މިކަންކަން ހިނގަމުންދާއިރު، ޕަބްލިކް ސަރވިސް މީޑިއާ، ޕީ.އެސް.އެމް ޓެލެވިޜަން މޯލްޑިވްސް އިން ހެނދުނު 6 އިން އިރުއޮއްސި 6 ގެންދާ ޚާއްސަ ކަވަރޭޖްގެ ތެރެއިން މި ހަރަކާތްތަކުގެ މަންޒަރުތަކާއި، މިކަންކަމާގުޅޭ މަޢުލޫމާތު އަންނަނީ ފޯރުކޮށްދެމުންނެވެ.
ޕާލޭ މޯލްޑިވްސްއިން ބުނިގޮތުގައި މި ހަރަކާތުގައި ކުރިއަށްދާ މައިގަނޑު 4 އިވެންޓުގައި ކަނޑުވެށި ރައްކާތެރިކުރުމާގުޅޭ އައު ރެކޯޑްތަކެއް ޤާއިމުކުރުމަށް ވަނީ އަމާޒުކޮށްފައެވެ. އަދި މި އަމާޒުތަކަށް ވާޞިލުވަމުންދާ މިންވަރު ޓީވީ އާއި ސޯޝަލް މީޑިއާގައި ވަގުތުން ހިއްސާކުރަމުންދާނެކަމަށްވެސް މިކަން އިންތިޒާމްކުރާ ފަރާތުން ބުނެއެވެ.
"މޯލްޑިވްސް ފޯ ދި އޯޝަންސް" ގައި ހިމެނޭ މައިގަނޑު ބައިތަކުގެ ތެރޭގައި، ތިމާވެއްޓާއި ކަނޑުފަޅު ޚިމާޔަތްކުރުމަށް ފަރުދީ ފެންވަރުގައި މަސައްކަތް ކުރުމަށް "އޯޝަން ޕްލެޖް" ވައުދުގައި ބައިވެރިވުން، އައްސޭރިފަށް ސާފުކުރުން، މާކަނޑުތަކާބެހޭ ގޮތުން މަޢުލޫމާތު ހިއްސާކުރުމަށް ބާއްވާ "އޯޝަން ލެސަން"ގެ އިތުރުން، ކަނޑުއަޑި، ފަޅުތެރެ އަދި ފަރުމަތި ސާފުކުރުމަށް ހިންގާ "އަންޑަރވޯޓަރ ކްލީނަޕް" ހަރަކާތް ހިމެނެއެވެ.
"އޯޝަން ޕްލެޖް" ހަރަކާތުގެ އަމާޒަކީ ރާއްޖެއާއި ރާއްޖޭން ބޭރުން 10،000 އަށްވުރެ ގިނަ މީހުން ވައުދުގައި ބައިވެރިވުމެވެ. "ބީޗް ކްލީނަޕް"ގެ އަމާޒަކީ ރާއްޖޭގައި 50،000 އަށްވުރެ ގިނަ މީހުން އައްސޭރިފަށް ސާފުކުރުމުގައި ބައިވެރިވުމެވެ. އަދި "އަންޑަރވޯޓަރ ކްލީނަޕް" ހަރަކާތުގައި އަމާޒުކުރާ ރިކޯޓަކީ އެއްފަހަރާ 1000 އަށްވުރެ ގިނަ މީހުން ފީނައިގެން 1000 އަށްވުރެ ގިނަ މީހުން ސްނޯކަލްކޮށްގެން ސާފުކުރުމުގެ މި ހަރަކާތުގައި ބައިވެރިވުންކަމަށްވެސް ޕާލޭ މޯލްޑިވްސްއިން ބުނެއެވެ.
މި ހަރަކާތުގެ މައިގަނޑު މަޤްޞަދަކީ ރާއްޖޭގައި އުކާލެވޭ ޕްލާސްޓިކް މަދުކުރުމަށް ބާރުއެޅުންކަމަށާއި، އިވެންޓުގެ މައިގަނޑު ހަރަކާތްތައް ވެގެންދާނީ ރާއްޖޭގެ ކަނޑުތަކަށް އުކާލެވޭ ޕްލާސްޓިކް މަދުކުރުމަށް ފަރުދުން އަމިއްލައަށް ވިސްނައިގަނެ ބާރުއަޅަން ހިތްވަރު ލިބޭނެ ހަރަކާތްތަކަކަށްކަމަށް މިކަން އިންތިޒާމްކުރާ ފަރާތުން ބުނެއެވެ.