ޔަހޫދީ އިސްރާޢީލުގެ ސިފައިން ހުޅަނގު އައްސޭރިއަށް އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ ޒުވާނެއް ޝަހީދުކޮށްލައިފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޔަހޫދީ ޓެރެރިސްޓު ސިފައިންގެ ޝިކާރައަކަށްވެ ޝަހީދުވެފައި ވަނީ އުމުރުން 20 އަހަރުގެ ޚަލީލް ޔަޙްޔާ އަނީސް ކަމުގައެވެ. އޭނާ ޝަހީދުކޮށްލާފައި ވަނީ އޭނާގެ ބޮލަށް ބަޑި ޖަހައިގެންނެވެ.
ޔަހޫދީ އިސްރާޢީލުގެ ޖައްބާރު ސިފައިން ހުޅަނގު އައްސޭރީގެ އުތުރުގައިވާ ނާބުލުސްއަށް އަރާފައި ވަނީ ފަލަސްޠީނުގެ މިނިވަން ކަމަށް ޖިހާދު ކުރަމުންދާ މުޖާހިދުންގެ ޖަމާޢަތަކަށް ނިސްބަތްވާ މީހެއްގެ ގެއަށް ޙަމަލާދީ، އެ ތަން ސުންނާފަތިކޮށް، ބިމާ ހަމަކޮށްލުމުގެ ބޭނުމުގައެވެ. ފަލަސްޠީނުގެ މުޖާހިދުން ވަނީ އެ ކަމަށް ހުރަސްއަޅަން މަސައްކަތް ކޮށްފައެވެ.
ނާބުލުސްގައި ހުންނަ އަލް-ނަޖާހު ހޮސްޕިޓަލުން ބުނީ ޔަހޫދީ ސިފައިންގެ ޙަމަލާތަކުގައި ފަލަސްޠީނުގެ އިތުރު ދެ މީހެއްގެ ހަށިގަނޑަށް ވަޒަން އަރައި ޒަޚަމުވި ކަމުގައެވެ. 20 އަހަރުގެ ޔަނީސް ޝަހީދުކޮށްލުމަށް ފަހު، އަދި އިތުރު ދެ މީހުން ޒަޚަމުކޮށްލުމަށް ފަހު، ޔަހޫދީ ޓެރެރިސްޓު ސިފައިން ވަނީ ނާބުލުސްގައި ހުންނަ މުޖާހިދެއްގެ ގެ ސުންނާފަތިކޮށްލާފައެވެ. ފަލަސްޠީނުގެ ރައްޔިތުންގެ ގެދޮރަށް ގެއްލުންދީ، ގެދޮރު ސުންނާފަތިކޮށް، ބިމައިހަމަކުރުމަކީ ޢާންމުވެފައިވާ ލާއިންސާނީ ޖަރީމާއެކެވެ.
ޔަހޫދީ ސިފައިން ސުންނާފަތިކޮށްލާފައި ވަނީ ފަލަސްޠީނުގެ މިނިވަން ކަމަށް ޖިހާދު ކުރާ ދަ ލަޔަން ޑެން ޖަމާޢަތުގެ މެންބަރެއް ކަމުގައިވާ އުސާމާ ތަވީލާއި އޭނާގެ ޢާއިލާ ދިރިއުޅޭ ގެ ކަމުގައި ފަލަސްޠީނުގެ އޮފިޝަލުން ވިދާޅުވެއެވެ. ފެބުރުވަރީ މަހު ޔަހޫދީ ޖައްބާރު ސިފައިން ހިންގި އުދުވާންތަކެއްގައި ތަވީލް ވަނީ ހައްޔަރުކޮށްފައެވެ. ތަވީލް ހައްޔަރުކޮށްފައި ވަނީ ޔަހޫދީ ޓެރެރިސްޓު ސިފައިންގެ މީހަކަށް ޙަމަލާދީ މަރައިލި ކަމުގެ ތުހުމަތުގައެވެ.
އަނީސަކީ މުޖާހިދުންގެ ޖަމާޢަތަކަށް ނިސްބަތްވާ މީހެއް ކަމުގައި ބައެއް މަސްދަރުތަކުން ބުނާއިރު، އޭނާއަކީ ރައީސް މަޙްމޫދު އައްބާސްގެ ފަތަޙަ ޖަމާޢަތުގެ މެންބަރެއް ކަމުގައި ފަލަސްޠީނުގެ އޮފިޝަލުން ވިދާޅުވެއެވެ. އަނީސްގެ ޖަނާޒާގައި އެތަކެއް ސަތޭކަ މީހުން ބައިވެރިވިއެވެ.
މި ކަމާ ގުޅޭ ގޮތުން ފަލަސްޠީން ސަރުކާރުގެ ތަރުޖަމާނު ނަބީލް އަބޫ ރުދައިނާ ވިދާޅުވީ ފަލަސްޠީނުގެ ބިންތަކަށް އަރައި ޔަހޫދީ ސިފައިން ހިންގަމުންދާ ލާއިންސާނީ ގަތުލުއާންމުތަކުގެ ޢަދަދު އިތުރުކޮށްފައިވާ ކަމުގައެވެ. އަދި، ޔަހޫދީންގެ ލާއިންސާނީ އުދުވާންތަކާ އެކު ފަލަސްޠީނުގެ ސުލްޙައާއި ހަމަޖެހުން ނަގައިލާފައިވާ ކަމުގައެވެ.
ފަލަސްޠީނުގެ ބިންތަކަށް އަރައި ޔަހޫދީ އިސްރާޢީލުން މި އަހަރުގެ ތެރޭގައި ހިންގާފައިވާ ލާއިންސާނީ ގަތުލުއާންމުތަކުގައި ޝަހީދުކޮށްލާފައިވާ މީހުންގެ ޢަދަދު މިހާރު ވަނީ 159 އަށް އަރާފައެވެ. މީގެ ތެރޭގައި ގިނަ ޢަދަދެއްގެ އަންހެނުންނާއި ކުށެއް ނެތް ކުޑަކުދިން ވެސް ހިމެނެއެވެ. އުމުރުން ދުވަސްވީ މީހުން ވެސް ހިމެނެއެވެ. ޝަހީދުކޮށްލާފައިވާ މީހުންގެ ތެރެއިން 30 އަށްވުރެ ގިނަ މީހުންނަކީ މޭ މަހުގެ ތެރޭގައި ޔަހޫދީ ޖައްބާރު ސިފައިން ޢައްޒާގައި ހިންގާފައިވާ ލާއިންސާނީ އުދުވާންތަކުގައި ޝަހީދުކޮށްލާފައިވާ މީހުންނެވެ.