ފަހި ދިރިއުޅުން ކޯޕަރޭޝަން، އެފްޑީސީގެ "އަމާން އުދަރެސް" 32 ޓަވަރުގެ ތެރެއިން އެއް ޓަވަރުގެ ސްޓްރަކްޗަރގެ މަސައްކަތް އެއްކޮށް ނިމިފައިވާކަމަށާއި، ބައެއް ޓަވަރުތަކުގެ ސްޓްރަކްޗަރގައި 10 ފަންގިފިލައާއި ހަމައަށް މަސައްކަތް ނިމިފައިވާ ކަމަށް އެކޯޕަރޭޝަނުން ބުނެފިއެވެ.
އަމާން އުދަރެސްގެ މަސައްކަތް ކުރަނީ އިންޑިއާގެ ދެކުންފުންޏަކުންނެވެ. އެގޮތުން ޖޭއެމްސީގެ ދަށުން ތަރައްޤީކުރާ 2000 ހައުސިންގ ޔުނިޓުގެ 35 އިންސައްތަ މަސައްކަތް ނިމިފައިވާއިރު، އެންބީސީސީއާއި ޙަވާލުކޮށްގެން ތަރައްޤީކުރާ 2000 ހައުސިންގ ޔުނިޓުގެ 31 އިންސައްތަ މަސައްކަތް ނިމިފައިވާ ކަމަށް އެފްޑީސީން ބުނެއެވެ.
ފަހި ދިރިއުޅުން ކޯޕަރޭޝަންގެ "އަމާން އުދަރެސް" ފްލެޓުތަކުގައި ހިމެނޭ 32 ޓަވަރުގެ މަސައްކަތް މިހާރު ކުރިއަށް ގޮސްފައިވާ ހިސާބު ނޫސްވެރިންނަށްވަނީ ދައްކާލާފައެވެ. މިހުރިހާ ޓަވަރެއްގެ ފައުންޑޭޝަންގެ މަސައްކަތް ނިމި އިތުރު މަސައްކަތްތައްވަނީ ފަށާފައެވެ. އަދި އެއް ޓަވަރުގެ ސްޓްރަކްޗަރގެ މަސައްކަތް އެއްކޮށް ނިމިފައިވާއިރު، 6 ޓަވަރެއްގެ ސްޓްރަކްޗަރގައި 10 ފަންގިފިލައާއި ހިސާބަށް މަސައްކަތް ނިމިފައިވާ ކަމަށް ފަހި ދިރިއުޅުން ކޯޕަރޭޝަން، އެފްޑީސީން ބުނެއެވެ.
ނޫސްވެރިންނަށް މަޢުލޫމާތު ދެއްވަމުން އެފްޑީސީގެ ބިޒްނަސް ޑިވެލޮޕްމަންޓް އެންޑް ކޯޕަރޭޓް އެފެއާޒް މެނޭޖަރ، އަޙްމަދު ޝަމޫލް ޢަބްދުﷲ ވިދާޅުވީ މަސައްކަތުގެ ހަލުވި މިނެއްގައި ކުރިއަށްދާކަމަށެވެ.
"މިދިޔަ ހަފްތާގެ ތެރޭގައި އަޅުގަނޑުމެންނަށް އެއް ޓަވަރުގެ ސްޓްރަކްޗަރގެ މަސައްކަތް އެއްކޮށް ނިމި އެޓަވަރުގެ ފިނިޝިންގ މަސައްކަތް މިހާރު ކުރިއަށްދަނީ. އަޅުގަނޑުމެންގެ އަމާޒަކީ އެންމެ ފުރަތަމަވެސް ޕްރޮޖެކްޓްގެ ޓައިމްލައިނާއި އެއްގޮތަށް މަސައްކަތް ޑެލިވަރކުރުން." ޝަމޫލް ވިދާޅުވިއެވެ.
މި ފްލެޓުތަކުގެ މަސައްކަތް ކުރުމުމަށް ބޭނުންކުރަނީ އެންމެ ފަހުގެ ވަޞީލަތްތައް ކަމަށް އެފްޑީސީން ބުނެއެވެ. އެގޮތުން ކޮންކްރީޓް މަސައްކަތުގައި ބޭނުންކުރާ "ރީއިންފޯރސްޑް ސިމެންޓް' ނުވަތަ ކޮންކްރީޓްގެ ސަބަބުން ޢިމާރާތް ވަރުގަދަވާނެ ކަމަށް އެކޯޕަރޭޝަނުން ފާހަގަކުރެއެވެ.
އަމާން އުދަރެސް ފްލެޓުތަކަކީ، މިހާތަނަށް ސަރުކާރުން ހިންގި ހައުސިންގ މަޝްރޫޢެއްގައި އެންމެ ޖާގަ ތަނަވަސްކޮށް ތަރައްޤީކުރާ މަޝްރޫޢުކަން އެފްޑީސީން ފާހަގަކުރެއެވެ. އަދި މީގެކުރީގެ ހައުސިންގ ސްކީމްތަކުގައި ދިމާވި ބައެއް މައްސަލަތައް މިފްލެޓުތަކުގައި ދިމާނުވާނޭހެން މަސައްކަތް ފަރުމާކޮށްފައިވާ ކަމަށް އެފްޑީސީން ބުނެއެވެ.
"އެގޮތުން އަޅުގަނޑުމެންނަށް ފާހަގަކުރެވުނު އެއްކަންތައް އެއީ، ބަލި މީހުން އުފުލާ ބޭލުން. މިގޮތުން އެއް ސްޓްރެޗަރ ލިފްޓް ކޮންމެ ޓަވަރެއްގައިވެސް ހުންނާނެ ޤާއިމުކުރެވިފައި. އަދި ކޮންމެ ސިޑި ގޮޅިއެއްގައިވެސް އެކަމަށް ބޭނުންވާ ޖާގަ އެކުލެވިގެންވާނެ." ޝަމޫލް ވިދާޅުވިއެވެ.
އެފްޑީސީން ބުނީ، އެހެން މަޝްރޫޢުތަކާއި ޚިލާފަށް ސަލާމަތީ ގޮތުންވެސް މުހިއްމުކަންކަން މިފެލްޓުތަކުގައި ޤާއިމުކުރެވިފައިވާކަމަށެވެ. އެގޮތުން ކޮންމެ އެޕާޓްމަންޓެއް ޢާއްމުންނާއި ޙަވާލުކުރާއިރު، ފަޔަރ ބްލޭންކެޓަކާއި، އަލިފާން ނިއްވާ ފުޅިއެއް ހުންނާނެއެވެ. އަދި މިއެޕާޓްމަންޓްތަކުގެ ދޮރުތަކަކީ، ފަޔަރ ރޭޓެޑް ދޮރުތަކެއް ކަމަށް އެކޯޕަރޭޝަނުން ބުނެއެވެ.
ރާއްޖޭގައި ހައުސިންގ ސްކީމެއްގައި ފުރަތަމަ ފަހަރަށް މިޓެކްނޮލޮޖީ ބޭނުންކޮށްފައިވާއިރު، އަލިފާނުގެ ޙާދިސާއެއްގައި މިޓަވަރުތަކުގެ މައި ދޮރުގައި އަލިފާން ހިފުމަށް ގާތްގަނޑަކަށް 30 މިނިޓު އަދި ސިޑި ގޮޅީގައި ހުންނަ ދޮރުތަކުގައި އަލިފާން ހިފުމަށް ގާތްގަނޑަކަށް 90 މިނިޓު ނަގާނެ ކަމަށް އެފްޑީސީން ބުނެއެވެ. މީގެ ސަބަބުން ޓަވަރުތަކުގައި އަލިފާނުގެ ޙާދިސާއެއް ހިނގައިފިނަމަ، ރައްކާތެރިކަމާއެކު މީހުން ނިކުތުމަށް އެކަށީގެންވާ ވަގުތު ލިބޭނެކަން އެކޯޕަރޭޝަނުން ފާހަގަކުރެއެވެ.
ފަހި އުދަރެސްގެ ޓަވަރުތަކުގެ ތެރެއިން 8 ޓަވަރެއްގެ މަސައްކަތް މިއަހަރު ނިމޭއިރު އެއްކޮށް ނިމޭނެކަމަށް ފަހިދިރިއުޅުން ކޯޕަރޭޝަނުން ބުނެއެވެ. އަދި މުޅި މަޝްރޫޢުގެ މަސައްކަތް އަންނަ 2024 ވަނަ އަހަރުގެ ފަހުކޮޅު ނުވަތަ 2025 ވަނަ އަހަރުގެ ކުރީކޮޅު އެއްކޮށް ނިމޭނެކަމަށް އެކޯޕަރޭޝަނުން ލަފާކުރެއެވެ.