އަމީނީ މަގުގެ 8 ވަނަ ސެގްމަންޓުގެ ތެރެއިން ސްކޫލްތައް ހިމެނޭ ސަރަޙައްދުގެ މަސައްކަތް، ސްކޫލް ހުޅުވެންވާއިރަށް ނިންމުމަކީ އަމާޒެއްކަމުގައި ރޯޑް ޑިވެލޮޕްމަންޓް ކޯޕަރޭޝަން، އާރްޑީސީގެ މެނޭޖިންގ ޑިރެކްޓަރ މޫސާ ޢަލީ މަނިކު ވިދާޅުވެއްޖެއެވެ.
އަމީނީ މަގުގެ 8 ވަނަ ސެގްމަންޓުގެ މަސައްކަތް ފަށާފައިވަނީ މިދިޔަ ހޮނިހިރު ދުވަހުގައެވެ. މިސެގްމަންޓުގައި ހިމެނެނީ އަމީނީ މަގުގެ އެންމެ ކާރޫބާރޫ ބޮޑު ސަރަޙައްދެވެ. އެގޮތުން ބިލަބޮންގ އިންޓަރނޭޝަނަލް ހައިސްކޫލާއި، ޣިޔާޘުއްދީން އިންޓަރނޭޝަނަލް ސްކޫލާއި، އަޙްމަދިއްޔާ އިންޓަރނޭޝަނަލް ސްކޫލް ހިމެނޭ މިސަރަޙައްދަކީ ސްކޫލް ގަޑިތަކާއި ދިމާކޮށް ޓްރެފިކް ބާރު ބޮޑުވާ ސަރަޙައްދުތަކެކެވެ.
މި ސެގްމަންޓްގެ މަސައްކަތްކުރިއަށް ގެންދިއުމަށް ރާވާފައިވާގޮތާއި ގުޅޭގޮތުން ޕީ.އެސް.އެމް ނިއުސްއާއި ވާހަކަދައްކަވަމުން އާރްޑީސީގެ މެނޭޖިންގ ޑިރެކްޓަރ މޫސާ ޢަލީ މަނިކު ވިދާޅުވީ އަމީނީ މަގުގެ 8 ވަނަ ސެގްމަންޓު ތެރޭގައި ހިމެނޭ ސްކޫލްތަކަށް ދަތިނުވާނެހެން މަސައްކަތްތައް ރާވާލާފައިވާކަމަށެވެ. އަދި ކުރިއަށް އޮތް ސްކޫލް ބަންދު ތެރޭގައި ސްކޫލްތައް ހިމެނޭ ސަރަޙައްދުގައި ތާރު އެޅުމުގެ ކުރިން ކުރަންޖެހޭ މަސައްކަތްތައް ނިންމާ، އެ ސަރަޙައްދު ސްކޫލްތައް ހުޅުވެންވާއިރަށް އާއްމުންނަށް ހުޅުވާލުމަށް މަސައްކަތް ކުރަމުންދާކަމަށް މޫސާ ޢަލީ މަނިކު ވިދާޅުވިއެވެ.
"ތާރު ނޭޅުނަސް، މައިގަނޑު އަޑީގައި އަޅާ ބައިތަކުގެ މަސައްކަތް ނިންމުމަށްފަހު، ގައު އެޅުމަށްފަހު ސްކޫލްތަކަށް ފަސޭހައިން ވަދެވޭނެހެން ހެދުމަށްފަހު އެހެން މަސައްކަތް ކުރިއަށްގެންދާނީ" އާރްޑީސީގެ މެނޭޖިންގ ޑިރެކްޓަރ ވިދާޅުވިއެވެ.
ސްކޫލް ހުޅުވެންވާއިރަށް އަމީނީމަގުގެ 8 ވަނަ ސެގްމަންޓުގެ މަސައްކަތް ނިންމުމަށް މަސައްކަތް ކުރަމުން އަންނައިރު، އަންނަ ހަފްތާ ބުރާސްފަތި ދުވަހު މިއަހަރުގެ ދިރާއީ އައު އަހަރުގެ ކިޔެވުން ނިމޭނެއެވެ. އަދި އަންނަ ދިރާސީ އައު އަހަރުގެ ކިޔެވުން ފެށެނީ އޯގަސްޓް ފުރަތަމަ ހަފްތާގައެވެ.
އާރްޑީސީގެ މެނޭޖިންގ ޑިރެކްޓަރ މޫސާ ޢަލީ މަނިކު ވިދާޅުވީ، ސެޕްޓެމްބަރު މަހަށް މަސައްކަތް ނިންމުމަށް ޙަވާލުކޮށްފައިވީނަމަވެސް މޫސުން ގޯސްވެ ދިގު މުއްދަތަކަށް މަސައްކަތް ޑިލޭ ނުވާނަމަ ސެޕްޓެމްބަރު މަހުގެ ކުރިން މުޅި އަމީނީމަގު މަޝްރޫޢު ނިންމުމަށް މަސައްކަތް ކުރަމުން އަންނަކަމަށެވެ.
އާރްޑީސީން ބުނީ އޮޑިގައްލާ ކެފޭ ހިމެނޭ ޖަކްޝަންގެ ހުރިހާ ނެޓްވޯކެއްގެ މަސައްކަތް ނިންމުމަށްފަހު ގައު އަޅާ ޢާއްމުންނަށް ހުޅުވާލާނެކަމަށެވެ. އަދި އެސެގްމަންޓުގެ އެހެނިހެން ބައިތަކުގެ މަސައްކަތް ކުރިއަށްގެންދާނީ ޢާއްމުންނަށާއި، ސްކޫލްތަކަށް އަދި އެސަރަޙައްދުގައި ހުރި އޮފީސްތަކަށް ވީހާވެސް ބޮޑަކަށް ދަތިނުވާނެހެންކަމަށް އާރްޑީސީން ބުނެއެވެ.
އަމީނީ މަގުގެ މަސައްކަތް ކުރަމުން އަންނަނީ ޖުމްލަ 13 ސެގްމަންޓަކަށް ބަހާލައިގެންނެވެ. މިގޮތުން 7 ވަނަ ސެގްމަންޓާއި ހަމައަށް ހުރިހާ މަސައްކަތެއް ނިންމާ، ޢާއްމުންނަށް ވަނީ ހުޅުވާލާފައެވެ.
އަމީނީ މަގަކީ މަސައްކަތްކުރުމަށް އެމަގުގައި ހުރި ގަސްތައް ކަނޑާލުމުގެ ކުރިން މާލޭގައި އެންމެ ހިޔާދޭ އެންމެ ހިތްގައިމު ފެހި އެއްމަގެވެ. އެހެންކަމުން މަގުގެ މަސައްކަތް ނިމެމުންދާވަރަކަށް އަމީނީ މަގުގައި ޖެހުމަށް އެންމެ ރަނގަޅު ބޮޑެތި ގަސްތައް އެމަގުގައި އިންދަމުންދާނެކަމަށް އާރްޑީސީން ބުނެއެވެ.
ޒަމާނީ ފެންވަރަށް އަމީނީ މަގު ތަރައްޤީކުރުމަށް އާރްޑީސީއާއި ޙަވާލުކޮށްފައިވަނީ 84.4 މިލިއަން ރުފިޔާއަށެވެ. މި މަޝްރޫޢުގެ ދަށުން އަމީނީމަގުގެ ހެންވޭރު ކޮޅުން ފެށިގެން މާފަންނު ކޮޅާއިހަމައަށް ޖުމްލަ 1.79 ކިލޯމީޓަރުގެ ސަރަޙައްދެއްގައި ތާރުއަޅައިގެން ތަރައްޤީކުރުމަށްވަނީ ހަމަޖެހިފައެވެ.