ފަލަސްޠީނުގެ ރައީސް މަޙްމޫދު އައްބާސް ހަތަރު ދުވަހުގެ ދަތުރުފުޅެއްގައި ޗައިނާއަށް ވަޑައިގަންނަވައިފިއެވެ. އޭނާ ޗައިނާއަށް ވަޑައިގަންނަވާފައި މި ވަނީ، ފަލަސްޠީނާއި ޔަހޫދީ އިސްރާޢީލާ ދެމެދު ސުލްޙަ ކުރުވަން މަސައްކަތް ކުރުމަށް ތައްޔާރަށް އޮތް ކަން ޗައިނާއިން ހާމަކޮށްފައިވާ ދަނޑިވަޅެއްގައެވެ.
މިއީ، އައްބާސް ޗައިނާއަށް ކުރައްވާ ފަސްވަނަ ދަތުރުފުޅެވެ. މި ދަތުރުފުޅުގައި އޭނާ ޗައިނާގެ ރައީސް ޝީ ޖިންޕިންގއާ ބައްދަލުކުރައްވައި، އެކި ކަންކަމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާނެ ކަމުގައި ފަލަސްޠީނުގެ ވަފާ ނޫސް އޭޖެންސީން ބުނެއެވެ. މީގެ ތެރޭގައި ފަލަސްޠީނުގެ މި ވަގުތުގެ ހާލަތާއި، ބައިނަލްއަޤުވާމީ މަސްރަޙާ ގުޅޭ ކަންތައްތައް ހިމެނޭ ކަމުގައި ވެސް އެ ނޫހުން ރިޕޯޓު ކުރެއެވެ.
އައްބާސްގެ މި ދަތުރުފުޅުގައި ޗައިނާގެ ބޮޑުވަޒީރު ލީ ޗިއަންގާ ވެސް ބައްދަލުކުރައްވާނެއެވެ. މި ދަތުރުފުޅާ ގުޅޭ ގޮތުން ޗައިނާގެ ޚާރިޖީ ވުޒާރާގެ ތަރުޖަމާނު ވޮންގ ވެންބިން ވިދާޅުވީ އައްބާހަކީ ޗައިނާގެ ރައްޔިތުންގެ ވަރަށް ގާތް އެކުވެރިއެއް ކަމުގައެވެ. އަދި، ފަލަސްޠީނުގެ މިނިވަން ދަޢުލަތެއް ގާއިމުކުރުމަށް ޗައިނާއިން އަބަދުވެސް ބާރުއަޅާނެ ކަމުގައި އޭނާ ވިދާޅުވިއެވެ.
އައްބާސް ޗައިނާއަށް ވަޑައިގަންނަވާފައި މި ވަނީ މެދުއިރުމަތީގައި ސުލްޙަ ކުރިއަރުވަން ޗައިނާއިން ގިނަގުނަ މަސައްކަތްތަކެއް ކުރަމުންދާ ދަނޑިވަޅެއްގައި ކަން ފާހަގަކުރެވެއެވެ. މެދުއިރުމަތީގެ ދެ ބާރު ކަމުގައިވާ ސަޢޫދީ ޢަރަބިއްޔާއާއި އީރާނާ ދެމެދު ސިޔާސީ ގުޅުން އަލުން ގާއިމުކުރުމުގައި މެދުވެރިއެއްގެ ދައުރު އަދާކޮށްފައި ވަނީ ޗައިނާއިންނެވެ. ހަތް އަހަރުގެ މެދުކެނޑުމަކަށް ފަހު އެ ދެ ޤައުމުގެ ދެމެދުގައި ސިޔާސީ ގުޅުން ރުޖޫޢަކޮށްފައި ވަނީ މާރިޗު މަހުގެ ތެރޭގައެވެ.
ހުސްވި އަހަރުގެ ޑިސެންބަރު މަހުގެ ތެރޭގައި ޝީ ވަނީ ސަޢޫދީ ޢަރަބިއްޔާއަށް ވެސް ދަތުރުފުޅެއް ކުރައްވާފައެވެ. އެ ދަތުރުފުޅުގެ ބޭނުމަކީ ޗައިނާއާއި ޢަރަބި ޤައުމުތަކާ ދެމެދު ފުރަތަމަ ފަހަރަށް ސަމިޓެއް ބޭއްވުމެވެ. އެ ސަމިޓުގެ ހަވާސާގައި ވެސް ޝީ ވަނީ އައްބާހާ ބައްދަލުކުރައްވާފައެވެ.
މެދުއިރުމަތީގެ ޤައުމުތަކާ ގުޅުން ބަދަހިކުރަން ޗައިނާއިން މަސައްކަތް ކުރަމުންދާ މި ދަނޑިވަޅުގައި އީރާނުގެ ރައީސް އިބްރާހީމް ރައީސީ ވެސް ވަނީ މި އަހަރުގެ ފެބުރުވަރީ މަހުގެ ތެރޭގައި ޗައިނާއަށް ދަތުރުފުޅެއް ކުރައްވާފައެވެ. އޭނާއަކީ ފާއިތުވި 30 އަހަރުގެ ތެރޭގައި ޗައިނާއަށް ދަތުރުފުޅެއް ކުރެއްވި އީރާނުގެ ފުރަތަމަ ރައީސެވެ.
އީރާނާއި ގަލްފް ކޯޕޮރޭޝަން ކައުންސިލް (ޖީ.ސީ.ސީ)ގެ މެންބަރު ޤައުމުތަކާ ދެމެދު ސަމިޓެއް ބޭއްވުމަށް ވެސް ޗައިނާއިން ދަނީ މަސައްކަތް ކުރަމުންނެވެ. މި އަހަރުގެ ފަހުކޮޅު އެ ސަމިޓު ބޭއްވުމަށް ތައްޔާރީތައް ދަނީ ކުރަމުންނެވެ. މެދުއިރުމަތީގެ ސުލްޙައަށް ޗައިނާއިން ކުރަމުންދާ މަސައްކަތްތަކާ ގުޅޭ ގޮތުން ފަލަސްޠީނުގެ އޮފިޝަލެއް ކަމުގައިވާ އައްބާސް ޒަކީ ވިދާޅުވީ ފަލަސްޠީނުން އެ މަސައްކަތްތައް ބަލައިގަންނަ ކަމުގައެވެ.
ޔަހޫދީ ޖައްބާރު އިސްރާޢީލާއި ފަލަސްޠީނާ ދެމެދު ސުލްޙަ ގާއިމުކުރަން އެމެރިކާއިން ވެސް މަސައްކަތްތަކެއް ކުރަމުންދާ ކަން ފާހަގަކުރެވެއެވެ. ނަމަވެސް، އެމެރިކާއަކީ ޔަހޫދީ ޓެރެރިސްޓު ދަޢުލަތުގެ އެންމެ ގާތް އެކުވެރިޔާއެވެ. އަދި، ބޮޑު ވާގިވެރިޔާއެވެ. ޔަހޫދީ ޓެރެރިސްޓުންނާއި ފަލަސްޠީނުގެ މުސްލިމުންނާ ދެމެދު ކުރިއަށްދިޔަ ސުލްޙައިގެ މަޝްވަރާތައް 2014 ވަނަ އަހަރުން ފެށިގެން އޮތީ ހުއްޓިފައެވެ.