ޢަރަބި ކަނޑުގައި އުފެދިފައިވާ ބާރުގަދަ ތޫފާން ބިޕޫރްޖޯއި އިންޑިޔާއާއި ޕާކިސްތާނުގެ ސަރަޙައްދުތަކާ ދިމާލަށް ދަތުރުކުރަމުންދިޔުމާ ގުޅިގެން، ތޫފާނުގެ އަސަރު ކުރާނެ ކަމަށް ބެލެވޭ ސަރަޙައްދުތަކުގައި ރައްކާތެރި ކަމުގެ ފިޔަވަޅުތައް އަޅަން ފަށައިފިއެވެ. މިއީ، މި އަހަރުގެ ތެރޭގައި އެ ދެ ޤައުމަށް އަރާ ފުރަތަމަ ތޫފާނެވެ.
ތޫފާން ބިޕޫރްޖޯއި މިހާރު އޮތީ އިންޑިޔާއާއި ޕާކިސްތާނުގެ ހުޅަނގު ފަރާތުން ޢަރަބި ކަނޑުގައެވެ. ތޫފާނުގެ ބާރު ގަދަވަމުންދާ ކަމުގައި މޫސުމާ ބެހޭ އިދާރާތަކުން ބުނެއެވެ. އަދި، ކުރިއަށް އޮތް ދެ ތިން ދުވަހެއްގެ ތެރޭގައި މި ތޫފާން ޕާކިސްތާނުގެ ދެކުނުގައިވާ ސިންދު ޕުރޮވިންސުގެ ސަރަޙައްދުތަކަށް އަރާނެ ކަމަށް ބެލެވެއެވެ. ތޫފާނުގެ އަސަރު އިންޑިޔާގެ ހުޅަނގު ފަރާތުގައި އޮންނަ ގުޖަރާތް ސްޓޭޓަށް ކުރާނެ ކަމަށް ވެސް މޫސުމީ އިދާރާތަކުން ބުނެއެވެ.
މި ތޫފާނުގެ އަސަރު އެންމެ ބޮޑަށް ކުރާނެ ކަމަށް ބެލެވޭ ރަށްތަކުގެ ތެރޭގައި ޕާކިސްތާނުގެ އެންމެ އާބާދީ ބޮޑު ރަށް ކަމުގައިވާ ކަރާޗީ ހިމެނެއެވެ. އެއީ، 20 މިލިޔަން މީހުންގެ އާބާދީއެއް ދިރިއުޅޭ ރަށެކެވެ. މީގެ އިތުރުން، އިނޑިޔާގެ ގުޖަރާތް ސްޓޭޓްގެ މުންދްރާ އެންޑް ކަންދްލާ ބަނދަރު ސަރަޙައްދަށް ވެސް އަސަރު ކުރާނެ ކަމަށް މޫސުމާ ބެހޭ އިދާރާތަކުން ބުނެއެވެ. ޖޫން 14 ވަނަ ދުވަހުގެ ހަވީރުގެ ވަގުތެއްގައި ތޫފާން ސިންދާއި ގުޖަރާތްގެ ސަރަޙައްދުތަކަށް ފޯރާނެ ކަމަށް އިންޑިޔާގެ މޫސުމާ ބެހޭ އިދާރާއިން ބުނެއެވެ.
މި ތޫފާނާ އެކު އެ ސަރަޙައްދަށް ގަޑިއަކު 125 އާއި 150 ކިލޯމީޓަރާ ދެމެދުގެ ބާރުމިނުގައި ވައިޖެހޭނެ ކަމަށް ބެލެވެއެވެ. މި ތޫފާނުގެ ސަބަބުން ރާޅު ބޮޑުވެ، ކަނޑު ގަދަވުމާ ގުޅިގެން މިހާރު ވެސް ބަޔަކު މަރުވެފައިވާ ކަމަށް ރިޕޯޓުތައް ބުނެއެވެ.
ގަދަ ވަޔާ އެކު ބޯކޮށް ވާރޭވެހުމާ ގުޅިގެން އިންޑިޔާގެ ގުރަޖަރާތް ސްޓޭޓްގައި ފާރެއް ވެއްޓި، އޭގެ ދަށުވެގެން ތިން މީހުން މަރުވެފައިވާ ކަމަށް އެ ސްޓޭޓްގެ އޮފިޝަލުން ވިދާޅުވެއެވެ. މި ހާދިސާ ހިނގާފައި ވަނީ ކުޗް އެންޑް ރާޖްކޮތް ޑިސްޓްރިކްޓުގައެވެ. އަދި، މޫދަށް އެރި އުޅުނު ހަތަރު ކުޑަކުދިން ވެސް ވަނީ ގެނބިގެން މަރުވެފައެވެ. އެ ހާދިސާ ހިނގާފައި ވަނީ ގުޖަރާތް ސްޓޭޓްގެ ދެކުނުގެ ރަށެއްގައެވެ.
ތޫފާން ބިޕޫރްޖޯއީއާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން އިންޑިޔާއިން ވަނީ އެ ޤައުމުގެ ހުޅަނގު ފަރާތު އައްސޭރިފަށުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް ފަށާފައެވެ. އަދި، މަސްވެރިކަން ކުރާ ފަރާތްތަކުން ކަނޑު މައްޗަށް ނުނިކުތުމަށް އިރުޝާދުދީ، ބައެއް ހިސާބުތަކުގެ ސްކޫލްތައް ވެސް ބަންދުކޮށްފައެވެ.
ގުޖަރާތްގެ އައްސޭރިފަށުގައި އޮންނަ ތެޔޮ ސާފުކުރާ ކާރުޚާނާތަކާއި ބަނދަރުތައް ވެސް ވަނީ ވަގުތީ ގޮތުން ބަންދުކޮށްފައެވެ. އަދި، ކުއްލި ހާލަތްތަކުގައި ހަރަކާތްތެރިވާ ޓީމުތައް ވަނީ ތައްޔާރީ ހާލަތަކަށް ގެނެސް، އެންމެ ބޮޑަށް ގެއްލުން ލިބޭނެ ކަމަށް ބެލެވޭ ސަރަޙައްދުތަކަށް ފޮނުވާފައެވެ. އިންޑިޔާގެ ކޯސްޓްގާޑު ވެސް ވަނީ ތައްޔާރީ ހާލަތަކަށް ގެނެސްފައެވެ.
މި ތޫފާނާ އެކު ޕާކިސްތާނުގެ ދެކުނުގައި އޮންނަ ސިންދު ޕުރޮވިންސުގެ އައްސޭރިފަށުގެ ސަރަޙައްދުތަކަށް އުދައަރާނެ ކަމަށް ބެލެވެއެވެ. އެ ސަރަޙައްދުތަކުގައި ދިރިއުޅޭ ޢާންމުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް އެ ޤައުމުން ވެސް ވަނީ ފަށާފައެވެ.
އާދައިގެ ގޮތަށް ބިނާކޮށްފައިވާ ގެދޮރުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުވުމަށް އެ ޤައުމުގެ މޫސުމާ ބެހޭ އިދާރާއިން ވަނީ އިރުޝާދު ދީފައެވެ. މިހާތަނަށް 80,000 އެއްހާ މީހުން ރައްކާތެރި ހިސާބުތަކަށް ބަދަލުކުރުމަށް މަސައްކަތް ކުރަމުންދާ ކަމުގައި އެ ޤައުމުން އޮފިޝަލުން ވިދާޅުވެއެވެ. އެ ޤައުމުން ވެސް ވަނީ ކުއްލި ހާލަތްތަކުގައި ހަރަކާތްތެރިވާ ޓީމުތައް ތައްޔާރީ ހާލަތަކަށް ގެނެސްފައެވެ.