ރާއްޖޭގެ ރިސޯޓުތަކުގެ މެދުގައި ކުރިއަށްދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގު 2023 ގެ ނޯތު މާލޭ ޒޯނުގެ ކުއާޓާ ފައިނަލުން މޮޅުވެ ސެމީ ފައިނަލަށް ބަންޑޮހާއި ފޯ ސީޒަންސް ކުޑަހުރާ ދަތުރުކޮށްފިއެވެ.
މުބާރާތުގެ ސެމީ ފައިނަލަށް ބަނޑޮސް ދަތުރުކުރީ ކުއާޓާ ފައިނަލުގައި ކޮއްދިއްޕަރު 4-1 އިން ބަލިކޮށްގެންނެވެ. އަދި ކުޑަހުރާ ސެމީ ފައިނަލަށް ދަތުރުކުރީ ކުއާޓާ ފައިނަލުގައި ހިލްޓަންއާއި ވާދަކުރި މެޗު 2-2 ގެ ނަތީޖާއަކުން އެއްވަރުވެ ޕެނަލްޓީގައި 5-7 ގެ ނަތީޖާއަކުން މޮޅުވެގެންނެވެ.
ބަނޑޮހުން ސެމީ ފައިނަލަށް ދިޔަ މެޗުގެ ފުރަތަަމަ ހާފުގައި ގާތްގާތުގައި ދެލަނޑު ކާމިޔާބުކޮށް ބަނޑޮހުން މެޗުގެ ލީޑު ހޯދިއިރު، އެޓީމުގެ ފުރަތަމަ ލަނޑު 09 ވަނަ މިނެޓުގައި ކާމިޔާބުކޮށްދިނީ އަހުމަދު ފިރާޝް އެވެ. އަދި އޭގެ މިނެޓެއް ފިރާޝް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މި މެޗުގައި ކޮއްދިއްޕަރުން ކާމިޔާބުކުރި ހަމައެކަނި ލަނޑު ފުރަތަަމަ ހާފުގެ 19 ވަނަ މިނެޓުގައި ކާމިޔާބުކޮށްދިނީ އެޓީމުގެ އަބްދުﷲ ޒުހައިރު އެވެ.
މެޗުގެ އެންމެ ފަހު މިނެޓުކޮޅުގެ ތެރޭގައި ބަނޑޮހުން ވަނީ އިތުރު ދެ ލަނޑު ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިގޮތުން ދެވަނަ ހާފުގެ 40 ވަނަ މިނެޓުގައި އެޓީމުގެ ތިންވަނަ ލަނޑު ކާމިޔާބުކޮށް އަހުމަދު ފިރާޝް މި މެޗުގައި އޭނާގެ ހެޓްރިކް ފުރިހަމަކުރި އިރު، އެޓީމުގެ ހަތަރުވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އަލީ ސައީދެވެ.
ކުޑަހުރާ އާއި ހިލްޓަން ބައްދަލުކުރި މެޗުގެ ފުރިހަމަ ވަގުތު ހަމަވިއިރު ދެ ޓީމު އޮތީ 2-2 ގެ ނަތީޖާއަކުން އެއްވަރުވެގެންނެވެ. މެޗުގެ ނަތީޖާ ނެރުމަށްޓަކައި ޖެހި ޕެނަލްޓީގައި ކުޑަހުރާ އިން ފޮނުވާލި ފަސް ޕެނަލްޓީ، އެޓީމުން ކާމިޔާބުކުރިއިރު، ހިލްޓަން އިން ޖެހި ހަތަރު ޕެނަލްޓީގެ ތެރެއިިން އެޓީމަށް ކާމިޔާބު ކުރެވުނީ ތިން ޕެނަލްޓީ އެވެ.