ނައިޖީރިޔާގައި ހުންނަ އެމެރިކާގެ ކޮންސިޔުލޭޓްގެ މުވައްޒަފުންނަށް ޙަމަލާދީ ދެ މީހުން މަރާލައިފި

ނައިޖީރިޔާގައި ހުންނަ އެމެރިކާގެ ކޮންސިޔުލޭޓްގައި މަސައްކަތް ކުރާ މުވައްޒަފުން ދަތުރުކުރަމުން ދިޔަ އުޅަނދުތަކަކަށް ބަޑީގެ ޙަމަލާތަކެއްދީ، އެ ތަނުގައި މަސައްކަތްކުރާ ދެ މުވައްޒަފުން މަރައިލައިފިއެވެ. ނައިޖީރިޔާގެ އިރުދެކުނުގައިވާ އަނަންބްރާ ސްޓޭޓްގައި ދިން މި ޙަމަލާގައި ފުލުހުންގެ ދެ މީހުން ވެސް މަރުވިއެވެ. އަދި، ހަތިޔާރު އެޅި މީހުން ވަނީ އިތުރު ތިން މީހަކު ރަހީނުކޮށްގެން ގެންގޮސްފައެވެ.

އަނަންބްރާ ސްޓޭޓްގެ އަތާނީގައި ދިން މި ޙަމަލާއަށް ފަހު ރަހީނުކޮށްފައި ވަނީ ކޮންސިޔުލޭޓްގެ ޑްރައިވަރަކާއި އިތުރު ދެ ފުލުހުންނެވެ. އެ މީހުން ހޯދައި، ސަލާމަތް ކުރުމަށް މަސައްކަތް ކުރަމުންދާ ކަމުގައި ނައިޖީރިޔާގެ އޮފިޝަލުން ވިދާޅުވެއެވެ. ބަޑިން ޙަމަލާ ދިނުމަށް ފަހު ހަތިޔާރުއެޅި މީހުން ވަނީ ކޮންސިޔުލޭޓްގެ މުވައްޒަފުން ދަތުރުކުރަމުންދިޔަ އުޅަނދުތަކުގައި ހުޅު ޖަހާފައެވެ.

މި ހާދިސާގައި އެމެރިކާ ކޮންސިޔުލޭޓްގައި މަސައްކަތްކުރާ ދެ މުވައްޒަފުން މަރުވި ނަމަވެސް، އޭގެ ތެރޭގައި އެމެރިކާގެ ރައްޔިތެއް ނުހިމެނޭ ކަމުގައި އެ ޤައުމުގެ ޤައުމީ ސަލާމަތާ ބެހޭ ކައުންސިލްގެ ތަރުޖަމާނު ޖޯން ކަރބީ ވިދާޅުވިއެވެ. އަދި، އެމެރިކާ ރައްޔިތަކަށް މި ޙަމަލާގައި އަނިޔާވެފައި ނުވާ ކަމަށް ވެސް އޭނާ ވިދާޅުވިއެވެ. އެމެރިކާގެ ޚާރިޖީ ދާއިރާއާއި ނައިޖީރިޔާގެ އިދާރާތައް ގުޅިގެން މި ހާދިސާ ތަހުޤީޤު ކުރުމުގެ މަސައްކަތް ވަނީ ފަށާފައެވެ.

މި ޙަމަލާގެ ފަހަތުގައި ވަނީ ނައިޖީރިޔާގެ ސަރުކާރާ ދެކޮޅު ހަތިޔާރުއެޅި ޖަމާޢަތެއް ކަމަށް އެ ޤައުމުގެ ފުލުހުން ބުނެއެވެ. އަދި، އިންޑިޖިނަސް ޕީޕަލް އޮފް ބިޔަފްރާ (އައި.ޕީ.އޯ.ބީ)ގެ ކޮނޑުގައި ފުލުހުން ވަނީ މި ޙަމަލާތަކުގެ ޒިންމާ އަޅުވާފައެވެ. ނައިޖީރިޔާގައި ހަރަކާތްތެރިވާ ހަތިޔާރު ޖަމާޢަތްތަކުން ދެމުންދާ ޙަމަލާތައް ފަހަކަށް އައިސް ވަނީ އިތުރުކޮށްފައެވެ.

2020 ވަނަ އަހަރު އައި.ޕީ.އޯ.ބީން ވަނީ އެ ޤައުމުގެ ދަނޑުވެރިންނާއި ޢާންމު ރައްޔިތުންނަށް ހިމާޔަތް ދިނުމަށް ހަތިޔާރު އެޅި ގޮތްޕެއް އެކުލަވައިލާފައެވެ. ނަމަވެސް، އެމެރިކާ އެމްބަސީގެ މުވައްޒަފުންނަށް އަމާޒުކޮށް ދިން ޙަމަލާގައި އެ ޖަމާޢަތުން ބައިވެރިވެފައި ނުވާ ކަމުގައި އެ މީހުން ބުނެއެވެ.

ނަމަވެސް، 2021 ވަނަ އަހަރު ފުލުހުން އެ ގުރޫޕުގެ އިސްވެރިޔާ އެންނަމްޑީ ކާނޫ ހައްޔަރު ކުރުމާ ގުޅިގެން، އެ ޖަމާޢަތުން ހިންގާފައިވާ ޓެރެރިސްޓު ޙަމަލާތައް އިތުރުކޮށްފައިވާ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ. ކާނޫގެ މައްޗަށް ޣައްދާރުވުމާއި ޓެރެރިޒަމްގެ ދަޢުވާ ވަނީ އުފުލާފައެވެ. ނައިޖީރިޔާގެ ކޯޓަކުން ވަނީ އޭނާއާ ދެކޮޅަށް އުފުލާފައިވާ ޓެރެރިޒަމްގެ ދަޢުވާތައް ބޭރުކޮށްލާފައެވެ.

1967 ވަނަ އަހަރު ނައިޖީރިޔާގެ ސަރުކާރާ ދެކޮޅު ފަރާތްތަކުން ވަނީ ރިޕަބްލިކް އޮފް ބިޔަފްރާގެ ނަމުގައި ވަކި ދަޢުލަތެއް ހަދަން މަސައްކަތް ކޮށްފައެވެ. އެ ކަމާ ގުޅިގެން ފެށި ދާޚިލީ ހަނގުރާމަ ތިން އަހަރަށް ދެމިގެން ގޮސް، އެތަކެއް ހާސް ބަޔަކު މަރުވިއެވެ.

ނައިޖީރިޔާގެ ސިޔާސީ މަސްރަޙަށް މި ވަގުތު ކުރިމަތިވެފައި އޮތް އެންމެ ބޮޑު މައްސަލައަކީ، އެ ޤައުމުގެ ޤާނޫނުއަސާސީއަށް ބަދަލުގެނައުމާ ގުޅޭ ގޮތުން ފެންނަ ނުފެންނަ ވޯޓެއް ނެގުމަށް ރައީސް މުޙައްމަދު ބުހާރީ ދެކޮޅު ހެއްދެވުމެވެ. އެ ޤައުމުގެ ޤާނޫނުއަސާސީއަކީ 1999 ވަނަ އަހަރު އަސްކަރިއްޔާއިން ނެރެފައިވާ ޤަރާރެއްގެ ގޮތުގައި އިދިކޮޅު ފަރާތްތަކުން ސިފަކުރެއެވެ. ބުހާރީގެ ވެރިކަން ކުރިއަށް ދެ މަސް ދުވަހުގެ ތެރޭގައި ނިމުމަކަށް އަންނައިރު، އޭނާއަށް ފަހު އެ ޤައުމުގެ ރައީސް ކަމުގެ މަޤާމާ ދެން ހަވާލުވެ ވަޑައިގަންނަވާނީ އިންތިޚާބީ ރައީސް ބޯލާ ޓިނޫބޫއެވެ.