ފަލަސްޠީނުގެ މުސްލިމުންގެ ދިފާޢުގައި ތެދުވަން ހިޒްބުاللهއިން ފަސްނުޖެހޭނެ ކަމުގައި ބުނެ، އެ ޖަމާޢަތުގެ އިސްވެރިޔާ ޙަސަން ނަޞްރުالله ޔަހޫދީ އިސްރާޢީލަށް ނުރައްކާތެރި އިންޒާރެއް ދީފިއެވެ. ހިޒްބުاللهއަކީ މެދުއިރުމަތީގެ ދެ ބާރުގެ ތެރެއިން އެއް ބާރުގެ ގޮތުގައި ބެލެވޭ އީރާނާ ގާތް ގުޅުމެއް އޮންނަ، ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތެކެވެ.
ނަޞްރުالله ޔަހޫދީ އިސްރާޢީލަށް ނުރައްކާތެރި އިންޒާރެއް ދީފައި މި ވަނީ މޭ 9 ވަނަ ދުވަހު އިސްރާޢީލުން ޣައްޒާގައި ދިރިއުޅޭ މުސްލިމުންނާ ދެކޮޅަށް ފަށާފައިވާ ފަނާކުރަނިވި ލާއިންސާނީ އުދުވާންތަކާއި ލޭއޮހޮރުވުންތަކާ ގުޅިގެންނެވެ. އިސްރާޢީލުގެ ޖައްބާރު އަސްކަރިއްޔާގެ މަތިންދާބޯޓުތަކުން ދަނީ މެދުކެނޑުމެއް ނެތި ޣައްޒާއަށް ބޮން އަޅަމުންނެވެ. މި ޙަމަލާގައި ޝަހީދުކޮށްލާފައިވާ މީހުންގެ ޢަދަދު މިހާރު ވަނީ 33 އަށް އަރާފައެވެ. އަދި، 110 އަށްވުރެ ގިނަ މީހުން ވަނީ ޒަޚަމުކޮށްލާފައެވެ. ގިނައީ ޢާންމުންނާއި ކުޑަކުދިންނެވެ.
ފަލަސްޠީނުގެ މިނިވަން ކަމުގެ ދިފާޢުގައި ޖިހާދުކުރަމުންދާ މުޖާހިދުންގެ ޖަމާޢަތްތަކާ ހިޒްބުاللهއިން ވާހަކަ ދައްކަމުންދާ ކަމުގައި ނަޞްރުالله ބުންޏެވެ. އަދި، ފަލަސްޠީނުގެ ރައްޔިތުންގެ ދިފާޢުގައި، ޔަހޫދީ އިސްރާޢީލުގެ ޓެރެރިސްޓު އަސްކަރިއްޔާއާ ދެކޮޅަށް ތެދުވަން ހިޒްބުاللهއިން ފަސްނުޖެހޭނެ ކަމުގައި އޭނާ ބުންޏެވެ.
ޔަހޫދީ އިސްރާޢީލުން ޣައްޒާގައި ހިންގަމުންދާ ލޭއޮހޮރުވުންތައް ހުއްޓުވަން ދުނިޔޭގެ ބާރުތަކާއި ޢަރަބި ދުނިޔެއިން ދަނީ މަސައްކަތް ކުރަމުންނެވެ. މި ކަމުގައި އެންމެ އިސްކޮށް ހަރަކާތްތެރި ވަނީ ވިލާތުގެ އިއްތިހާދު (އީ.ޔޫ)އާއި ޢަރަބި ޤައުމުތަކެވެ. ޙަމަލާތައް ހުއްޓައިލުމާ ގުޅޭ ގޮތުން މަޝްވަރާ ކުރުމަށް މިޞްރުގައި ދަނީ މަޝްވަރާ ކުރަމުންނެވެ. ނަމަވެސް، ލޭއޮހޮރުވުންތައް ހުއްޓައިލުމުގެ ވިސްނުމެއް ވެސް ނިޔަތެއް ވެސް އިސްރާޢީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ނުގެންގުޅެއެވެ. އަދި، އިސްރާޢީލުން ދަނީ އެ މަސައްކަތްތަކަށް ހުރަސް އަޅަމުންނެވެ.
އެންމެ ފަހުގެ ޙަމަލާތައް ފަށާފައި ވަނީ ޔަހޫދީ ޖައްބާރު ނަތަންޔާހޫއެވެ. އޭނާގެ އަމުރަށް ޔަހޫދީ ޓެރެރިސްޓު އަސްކަރިއްޔާއިން ވަނީ ފަލަސްޠީނުގެ މިނިވަން ކަމުގެ ދިފާޢުގައި ޖިހާދު ކުރަމުންދާ އިސްލާމިކް ޖިހާދު (ޕީ.އައި.ޖޭ)ގެ ތިން އިސްވެރިން ޝަހީދުކޮށްލާފައެވެ. އެއީ، މޭ 9 ވަނަ ދުވަހުއެވެ. އެ މީހުން ޝަހީދުކޮށްލަން ދިން ޙަމަލާތަކުގައި އެ މީހުންގެ ޢާއިލާގެ ގިނަ މެންބަރުންތަކެއް ވެސް ޝަހީދުކޮށްލިއެވެ.
ޔަހޫދީ ޖައްބާރު އަސްކަރިއްޔާގެ ޝިކާރައަކަށް ވެ، ގިނަ ޢަދަދެއްގެ އަންހެނުންނާއި ކުޑަކުދިންގެ ފުރާނަ ގެއްލުނެވެ. ޔަހޫދީ އިސްރާޢީލުން އެންމެ ފަހުން ދިން ޙަމަލާތަކުގައި ޝަހީދުކޮށްލާފައިވާ މީހުންގެ ތެރޭގައި އެއް ޢާއިލާއަކަށް ނިސްބަތްވާ ދެ ކުޑަކުދިން ކަމުގައިވާ މާޔާރް ޢިއްޒުންދީނާއި ޢަލީ ޢިއްޒުއްދީން ހިމެނެއެވެ. އެ ޙަމަލާގައި އެ ކުދިންގެ ބައްޕަ ވެސް ވަނީ ޝަހީދުކޮށްލާފައެވެ.
މި އުދުވާންތަކުގެ ބަދަލު ހިފުމުގެ ގޮތުން ޕީ.އައި.ޖޭގެ މުޖާހިދުން ވަނީ އިސްރާޢީލަށް އަމާޒުކޮށް ނުރައްކާތެރި ރޮކެޓް ޙަމަލާތަކެއް ދީފައެވެ. ޕީ.އައި.ޖޭން އެތަކެއް ސަތޭކަ ރޮކެޓް އިސްރާޢީލުގެ ރަށްތަކަށް އަމާޒުކޮށް ފޮނުވައިލާފައިވާއިރު، މި ޙަމަލާތަކުގައި ޔަހޫދީންގެ އެކަކު ވަނީ މަރުވެފައެވެ. އަދި، ފަސް މީހުން ވަނީ ޒަޚަމުވެފައެވެ.
ފާއިތުވި ހަތަރު ދުވަހުގެ ތެރޭގައި ޔަހޫދީ އިސްރާޢީލުން ވަނީ 170 ފަހަރު ޣައްޒާއަށް ބޮން އަޅާފައެވެ. މި ޙަމަލާތަކުގައި އެތަކެއް ސަތޭކަ ބަޔެއްގެ ގެދޮރު ސުންނާފަތިކޮށްލައި، އެ މީހުން ވަނީ މަގުމަތި ކޮށްލާފައެވެ. މި ޙަމަލާތަކުގެ ބަދަލުގައި ޕީ.އައި.ޖޭން ވަނީ އިސްރާޢީލުގެ ރަށްތަކަށް އަމާޒުކޮށް 860 އަށްވުރެ ގިނަ ރޮކެޓް ޙަމަލާދީފައެވެ. ނަމަވެސް، އިސްރާޢީލުގެ ވައިގެ ދިފާޢީ ނިޒާމު ބޭނުންކޮށްގެން މީގެ ތެރެއިން ގިނަ ރޮކެޓް ޙަމަލާތައް ވަނީ ދިފާޢުކޮށްފައެވެ.
ޔަހޫދީ އިސްރާޢީލުން ހުސްވި 2022 ވަނަ އަހަރުގެ އޮގަސްޓު މަހު ވެސް ޣައްޒާއަށް މި ފަދަ ނުރައްކާތެރި ޙަމަލާތަކެއް ދީފައިވެއެވެ. ތިން ދުވަހަށް ދެމިގެންދިޔަ އެ އުދުވާންތަކުގައި ފަލަސްޠީނުގެ 49 މީހުން ވަނީ ޝަހީދުކޮށްލާފައެވެ. އޭގެ ތެރޭގައި ކުށެއް ނެތް 19 ކުޑަކުދިން ވެސް ހިމެނެއެވެ. އެ ކަމުގެ ރައްދުގައި ޕީ.އައި.ޖޭން ވަނީ އިސްރާޢީލުގެ ރަށްތަކަށް އަމާޒުކޮށް ރޮކެޓް ޙަމަލާތަކެއްދީ ތިން މީހުން ޒަޚަމުކޮށްލާފައެވެ.