ޔަހޫދީ އިސްރާޢީލުން ހުއްޓުމެއް ނެތި ފަލަސްޠީނުގެ ޣައްޒާއަށް ދެމުންދާ ވައިގެ ޙަމަލާތަކުގައި 21އަށްވުރެ ގިނަ މީހުން ޝަހީދުކޮށްލައިފިއެވެ. އެންމެ ފަހުން ޝަހީދުކޮށްލާފައިވާ މީހުންގެ ތެރޭގައި އުމުރުން އެންމެ 10 އަހަރުގެ ކުށެއް ނެތް ކުއްޖެއް ކަމުގައިވާ ލަޔާން މަދޫޚް ވެސް ހިމެނެއެވެ. އެ މައުޞޫމް ކުއްޖާގެ ފުރާނަ ނަގައިލާފައި ވަނީ އޭނާގެ ގެއަށް ދިން ނުރައްކާތެރި ޓެރެރިސްޓް ޙަމަލާތަކެއްގައެވެ.
މޭ މަހުގެ 10 ވަނަ ދުވަހު އެކަނިވެސް ޔަހޫދީ ޓެރެރިސްޓު އަސްކަރިއްޔާގެ މަތިންދާބޯޓުތަކުން ޣައްޒާއަށް ދިން ޙަމަލާތަކުގައި ފަލަސްޠީނުގެ 15 މީހުން ވަނީ ޝަހީދުކޮށްލާފައެވެ. ފުރާނަ ނަގައިލާފައިވާ މީހުންގެ ތެރޭގައި ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޖަމާޢަތެއް ކަމުގައިވާ ޕޮޕިޔުލަރ ފްރޮންޓް ފޯރ ދަ ލިބެރޭޝަން އޮފް ޕަލަސްޓައިންގެ ހަތަރު މެންބަރުން ހިމެނެއެވެ.
ޔަހޫދީންގެ ހުއްޓުމެއް ނެތް ޙަމަލާތަކާ ގުޅިގެން ޣައްޒާ މި ވަގުތު އޮތީ ހުއްޓުމަކަށް އައިސްފައެވެ. ސްކޫލްތަކާއި ފިހާރަތައް ވަނީ ބަންދުކޮށްފައެވެ. ޣައްޒާގެ ރައްޔިތުންނަށް ގެއިން ބޭރަށް ނިކުތުމުގެ ފުރުޞަތެއް ނެތެވެ. ޔަހޫދީ ޓެރެރިސްޓު އަސްކަރިއްޔާގެ ވައިގެ ޙަމަލާތައް ގިނަ ފަހަރު ދީފައި ވަނީ ޣައްޒާގެ ރައްޔިތުން ނިދާފަތި ތިއްބާ، ދަންވަރުގެ ވަގުތުގައެވެ.
ޔަހޫދީ ޓެރެރިސްޓު ދަޢުލަތުގެ އުދުވާންތަކަށް ރައްދު ދިނުމުގެ ގޮތުން ފަލަސްޠީނުގެ މިނިވަން ހޯދުމަށް ޖިހާދު ކުރަމުންދާ ޖަމާޢަތްތަކުން ވެސް ދަނީ މަސައްކަތް ކުރަމުންނެވެ. ޣައްޒާގައި ހަރަކާތްތެރިވާ ޖަމާޢަތްތަކުން މޭ 10 ވަނަ ދުވަހު އެކަނިވެސް އިސްރާޢީލުގެ ޔަހޫދީންނަށް އަމާޒުކޮށް 400އަށްވުރެ ގިނަ ރޮކެޓް ޙަމަލާދީފައިވެއެވެ. މީގެ ތެރެއިން ގިނަ ރޮކެޓުތައް އިސްރާޢީލުން ދިފާޢު ކުރި ނަމަވެސް، ހަތަރު ރޮކެޓެއް ވަނީ ޢާންމުން ދިރިއުޅޭ ހިސާބުތަކަށް އަރާފައެވެ.
ޔަހޫދީ އިސްރާޢީލުން ދެމުންދާ ނުރައްކާތެރި ޙަމަލާތަކާ ގުޅިގެން އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވަނީ އިސްރާޢީލަށް ވަރަށް ބޮޑަށް ފާޑުވިދާޅުވެފައެވެ. އަދި، މި ޙަމަލާތަކުގައި ގިނަ ޢަދަދެއްގެ ޢާންމުންނާއި ކުޑަކުދިން ޝަހީދުކޮށްލުމަކީ ބަލައިގަނެވޭ ކަމެއް ނޫން ކަމުގައި އޭނާ ވިދާޅުވިއެވެ. އަދި، ހަމަނުޖެހުންތައް ވަގުތުން ހުއްޓައިލުމަށް ވެސް އޭނާ ވަނީ ޔަހޫދީ ޓެރެރިސްޓު ސަރުކާރަށް ގޮވައިލައްވާފައެވެ.
"އިސްރާޢީލުން ވެސް ބައިނަލްއަޤުވާމީ ޤާނޫނުތަކަށް ތަބާވާން ޖެހޭނެ. ޚާއްޞަކޮށް، ބާރުގެ ބޭނުން ކުރުމާ ގުޅޭ ގޮތުން ހުރި ޤާނޫނުތަކަށް ހުރުމަތްތެރިކޮށް ހިތަން ޖެހޭނެ. ޢާންމު ރައްޔިތުންގެ ފުރާނައަށް ނުރައްކާވިޔަ ދީގެން ނުވާނެ. އަދި، ޢާންމުން ދިރިއުޅޭ ޢިމާރާތްތަކާއި އެ މީހުންގެ ގެދޮރަށް ޙަމަލާދީގެން ނުވާނެ،" އ.ދގެ ތަރުޖަމާނުގެ ނައިބު ފަރްޙާން ޙައްޤު ވިދާޅުވިއެވެ.
މީގެ އިތުރުން ވެސް، ބައިނަލްއަޤުވާމީ މުޖުތަމަޢުގެ ފާޑުކިޔުންތައް އިސްރާޢީލަށް ދަނީ އަމާޒުވަމުންނެވެ. ޔަހޫދީންގެ ޙަމަލާތަކުގައި ބައެއް ޢާއިލާތަކުގެ ހުރިހާ މެންބަރުން ވަނީ ޝަހީދުކޮށްލާފައެވެ. އޭގެ ތެރޭގައި ކުޑަކުދިން ވެސް ހިމެނެއެވެ. ނަމަވެސް، ޔަހޫދީ އިސްރާޢީލުން ބުނީ އެ މީހުންގެ ޙަމަލާތައް އަމާޒުކޮށްފައި ވަނީ މުޖާހިދުންގެ މަރުކަޒުތަކަށް ކަމުގައެވެ.