ޔަހޫދީ އިސްރާޢީލުގެ ސިފައިން ފަލަސްޠީނުގެ ހުޅަނގު އައްސޭރިއަށް އަރައި ލާއިންސާނީ އުދުވާންތަކެއް ހިންގައި ދެ މީހުން ޝަހީދުކޮށްލައިފިއެވެ. ޔަހޫދީ ޓެރެރިސްޓު ސިފައިން ހުޅަނގު އައްސޭރިއަށް އަރާފައި މި ވަނީ، ޣައްޒާއަށް ވަރުގަދަ މިސައިލް ޙަމަލާތަކެއްދީ ގިނަ ޢަދަދެއްގެ ބަޔަކު ޝަހީދުކޮށްލުމަށް ފަހު، އޭގެ އެއް ދުވަސް ފަހުންނެވެ. ޣައްޒާގެ އަމާޒުތަކަށް އިސްރާޢީލުގެ އަސްކަރީ މަތިންދާބޯޓުތަކުން ދިން ވަރުގަދަ ވައިގެ ޙަމަލާތަކުގައި 15 މީހުން ވަނީ ޝަހީދުކޮށްލާފައެވެ.
ހުޅަނގު އައްސޭރިއަށް އަރައި ޔަހޫދީން އުދުވާންތައް ހިންގާފައި ވަނީ ޖިނީންގެ ދެކުނުން އޮންނަ ޤަބަޠިއްޔާގައެވެ. މި އުދުވާންތަކުގައި ޝަހީދުކޮށްލާފައިވާ ދެ މީހުންނަކީ އުމުރުން 19 އަހަރުގެ އަޙްމަދު ޖަމާލް އައްސާފާއި، 24 އަހަރުގެ ވަރާނީ ވާލިދު ޤަތާނަތު ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ހާމަކުރިއެވެ.
މަންޒަރު ފެނުނު މީހުން ބުނީ ޔަހޫދީ އިސްރާޢީލުގެ ސިފައިންގެ ބޮޑު ފައުޖެއް ޤަބަޠިއްޔާއަށް ވަދެފައިވާ ކަމުގައެވެ. އަދި، ގަދަބާރުން ފަލަސްޠީނުގެ ރައްޔިތުންގެ ގެދޮރަށް ވަދެ، އެ ތަންތަން ބަލައިފާސްކޮށްފައިވާ ކަމުގައި ވެސް އެ ފަރާތްތަކުން ބުނެއެވެ. އަދި، ދެ މީހަކު ޝަހީދުކޮށްލާފައި ވަނީ، އެ މީހުން ދަތުރުކުރި ކާރަށް ދިން ބަޑީގެ ޙަމަލާތަކުގައި ކަމަށް ވެސް އެ ފަރާތްތަކުން ބުނެއެވެ. މި ޙަމަލާތަކުގައި އިތުރު މީހަކު ޒަޚަމުވިއެވެ.
ޔަހޫދީ އިސްރާޢީލުގެ އަސްކަރިއްޔާއިން ބުނީ، ދެ މީހުން ޝަހީދުކޮށްލާފައި ވަނީ އެ މީހުން އިސްރާޢީލުގެ ސިފައިންނަށް ޙަމަލާދޭން މަސައްކަތް ކުރުމުން ކަމުގައެވެ. އަދި، އެ މީހުން ދަތުރު ކުރަމުންދިޔަ ކާރުގެ ތެރެއިން "އެމް-16" މަރުކާގެ ބަޑިއަކާއި ފިސްތޯލައެއް ފެނިފައިވާ ކަމުގައި ވެސް އިސްރާޢީލުގެ އަސްކަރިއްޔާއިން ބުންޏެވެ.
އެ ޙަމަލާގެ ކުރިން އިސްރާޢީލުގެ އަސްކަރީ މަތިންދާބޯޓުތަކުން ވަނީ ޣައްޒާއަށް ވަރުގަދަ ވައިގެ ޙަމަލާތަކެއް ދީފައެވެ. ދަތުރުކުރަމުން ދިޔަ ކާރަކަށް އަމާޒުކޮށް ދިން މި ޙަމަލާގައި ފަލަސްޠީނުގެ ދެ މީހުން ޝަހީދުކޮށްލާފައިވާ ކަމަށް ފަލަސްޠީނުގެ ޞިއްޙަތާ ބެހޭ ވުޒާރާއިން ހާމަކުރެއެވެ.
އޭގެ ކުރިން އިސްރާޢީލުގެ އަސްކަރިއްޔާއިން މަތިންދާބޯޓުތަކާއި ޑްރޯންތައް ބޭނުންކޮށްގެން ޣައްޒާއަށް ދީފައިވާ ނުރައްކާތެރި ވައިގެ ޙަމަލާތަކުގައި ފަލަސްޠީނުގެ 13 މީހުން ވަނީ ޝަހީދުކޮށްލާފައެވެ. އޭގެ ތެރޭގައި ގިނަ ޢަދަދެއްގެ ކުޑަކުދިން ވެސް ހިމެނެއެވެ. އެ ޙަމަލާތަކުގައި ފަލަސްޠީނުގެ މިނިވަންކަމަށް ޖިހާދު ކުރަމުންދާ އިސްލާމިކް ޖިހާދު ޖަމާޢަތުގެ އިސް ތިން މެންބަރުން ވަނީ ޝަހީދުކޮށްލާފައެވެ. މަރުވި މީހުންގެ ތެރޭގައި ގިނައީ އެ ތިން މީހުންގެ ޢާއިލާގެ މެންބަރުންނެވެ.
މި ޙަމަލާތަކުގައި 20 އަށްވުރެ ގިނަ މީހުން ޒަޚަމުކޮށްލާފައިވާއިރު، އޭގެ ތެރެއިން ބައެއް މީހުންގެ ހާލު ސީރިޔަސް ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ހާމަކުރެއެވެ. މި ޙަމަލާތަކުގައި ގިނަ ޢަދަދެއްގެ ޢިމާރާތްތަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ.
ޔަހޫދީ އިސްރާޢީލުގެ ޖައްބާރު ސިފައިން މި އަހަރުގެ މިހާތަނަށް ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު ވަނީ 123 އަށް އަރާފައެވެ. މީގެ ތެރޭގައި ކުށެއް ނެތް ޢާންމުންގެ ތެރެއިން ގިނަ ޢަދަދެއްގެ އަންހެނުންނާއި ކުޑަކުދިން ހިމެނެއެވެ. އަދި، އުމުރުން ދުވަސްވީ މީހުން ވެސް ހިމެނެއެވެ.