ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ހައްޔަރުކުރުމާ ގުޅިގެން އޭނާއަށް ތާޢީދުކުރާ އެތަކެއް ހާސް ބަޔަކު މަގުތަކަށް ނިކުމެ ހަމަނުޖެހުން ހިންގަމުން އެބަދެއެވެ. ޚާން ހައްޔަރުކޮށްފައި ވަނީ، އޭނާއާ ދެކޮޅަށް އުފުލާފައިވާ ކޮރަޕްޝަންގެ ދަޢުވާތަކެއްގެ އަޑުއެހުމުގައި ބައިވެރިވުމަށް މޭ 9 ވަނަ ދުވަހު އެ ޤައުމުގެ ހައި ކޯޓަށް ހާޒިރުވުމުންނެވެ.
ވެރިރަށް އިސްލާމްއާބާދުގެ އިތުރުން ކަރާޗީއާއި، ލާހޯރާއި، ރާވަލްޕިންޑީ އަދި ޕެޝާވަރުގައި އޭނާއަށް ތާޢީދުކުރާ މީހުން ދަނީ މުޒާހަރާކޮށް، ސަލާމަތީ ބާރުތަކާ ކުރިމަތިލަމުންނެވެ. ޚާންގެ ތަހްރީކް އަލް-އިންސާފު (ޕީ.ޓީ.އައި) ޕާޓީން ވަނީ ޚާން މިނިވަން ކުރުމަށް ގޮވައިލާ އިސްލާމްއާބާދުގައި މުޒާހަރާ ކުރުމަށް އޭނާއަށް ތާޢީދުކުރާ މީހުންނަށް ގޮވައިލާފައެވެ. އަދި، އެހެން ހިސާބުތަކުގައި ދިރިއުޅޭ މީހުންނަށް އިސްލާމްއާބާދަށް ޖަމާވުމަށް އިރުޝާދު ދީފައެވެ.
މި ގޮވައިލުމަށް އިޖާބަދިނުމުގެ ގޮތުން ޕާކިސްތާނުގެ ހުޅަނގުއުތުރުގައިވާ ޚައިބަރް ޕަޚްތުންޚްވާގައި ދިރިއުޅޭ ޕީ.ޓީ.އައިއަށް ތާޢީދުކުރާ އެތަކެއް ހާސް ބަޔަކު ވެސް އިސްލާމްއާބާދަށް ދިޔުމަށް ދަތުރު ފަށާފައިވާ ކަމުގައި އެ ޕާޓީން ބުނެއެވެ. ކުއެތާގައި ހިނގަމުންދާ ހަމަނުޖެހުންތަކުގައި ޕީ.ޓީ.އައިގައި މަސައްކަތްކުރާ އޮފިޝަލެއް މަރުވެފައިވާ ކަމަށް ވެސް ރިޕޯޓުތައް ބުނެއެވެ.
ޕީ.ޓީ.އައިގެ މެންބަރުން ޕާކިސްތާނުގެ އެކި ކަންކޮޅުތަކުގައި ހަމަނުޖެހުން ހިންގަމުން ދިޔަ ނަމަވެސް، އެ ފަދަ އެއްވެސް އަމަލެއް ހިންގަން ބޭނުން ނުވާ ކަމުގައި ޕީ.ޓީ.އައިއިން ވަނީ ބުނެފައެވެ. ނަމަވެސް، އެ ޕާޓީގެ މެންބަރުން ވަނީ އިސްލާމްއާބާދުގެ ބޮޑެތި މަގުތައް ވެސް ބަންދުކޮށްފައެވެ.
ޚާން މިނިވަން ކުރުމަށް ގޮވައިލާ ކުރަމުންދާ މުޒާހަރާތަކުގައި ހިންގަމުންދާ ހަމަނުޖެހުންތައް އަމާޒުކޮށްފައި ވަނީ ޕާކިސްތާނުގެ އަސްކަރިއްޔާއަށެވެ. މުޒާހަރާގެ ބައިވެރިން ވަނީ ލާހޯރުގައި ހުންނަ އަސްކަރިއްޔާގެ އިސް ކޮމާންޑަރެއްގެ ގޭގައި ހުޅުޖަހާފައެވެ. އަދި، ރާވަލްޕިންޑީގައި ހުންނަ އަސްކަރިއްޔާގެ އިސް މަރުކަޒަކަށް ވަދެވެން އޮންނަ މަގުތައް ބަންދުކޮށް، އެ ތަން ބަންދުކޮށްފައެވެ.
ހަމަނުޖެހުންތައް ކޮންޓްރޯލް ކުރުމަށް ފުލުހުންނާއި ސަލާމަތީ ބާރުތަކުން ދަނީ ބާރުގެ ބޭނުން ކުރަމުންނެވެ. އަދި، މުޒާހަރާ ކުރަމުންދާ މީހުން ކޮންޓްރޯލް ކުރުމަށް ކަރުނަ ގޭހާއި ވޯޓަރ ކެނަން ފަދަ ހަތިޔާރު ބޭނުންކުރަމުންނެވެ. މުޒާހަރާތަކުގައި ބައިވެރިވާ އެންމެން ހައްޔަރު ކުރާނެ ކަމުގެ އިންޒާރު ވެސް ޕާކިސްތާން ފުލުހުންގެ އިންސްޕެކްޓަރ ޖެނެރަލް ވަނީ ދެއްވާފައެވެ. މިހާރު ވެސް ގިނަ ޢަދަދެއްގެ ބަޔަކު ވަނީ ހައްޔަރުކޮށްފައެވެ.
ޚާން ހައްޔަރުކޮށްފައި ވަނީ ހައި ކޯޓުގެ ޢިމާރާތަށް ވަދެވަޑައިގެންނެވި ވަގުތު ޕާކިސްތާނުގެ ޕެރެމިލިޓަރީ ރޭންޖަރސްގެ އޮފިސަރުންނެވެ. އޭނާ ހައްޔަރުކޮށްގެން ފުލުހުންގެ މަރުކަޒަކަށް ގެންގޮސްފައިވާ ކަމުގައި ޕީ.ޓީ.އައިއިން ބުނެއެވެ. އަދި، ހައްޔަރުކުރުމުގެ ތެރޭގައި ޚާނަށް ފުލުހުން އަނިޔާކޮށްފައިވާ ކަމުގައި ވެސް ޕީ.ޓީ.އައިއިން ތުހުމަތު ކުރެއެވެ.
ހައި ކޯޓުގައި ކުރިއަށްދާ މައްސަލައިގެ އަޑުއެހުމަށް ޚާން ހާޒިރު ނުކުރާނެ ކަމަށާއި، ބަދަލުގައި ކޯޓުގެ އަޑު އެހުން ބާއްވާނީ އޭނާ ހައްޔަރުކޮށްފައި ހުރި ފުލުހުންގެ އިދާރާގައި ކަމުގައި ފުލުހުން ވިދާޅުވިއެވެ. ފުލުހުން މި ގޮތަށް ނިންމާފައި ވަނީ އޭނާއަށް ތާޢީދުކުރާ މީހުން ހިންގަމުންދާ ހަމަނުޖެހުންތަކާ ގުޅިގެން ސަލާމަތީ ސަބަބުތަކަށް ޓަކައި ކަމަށް ބެލެވެއެވެ. ޚާން ހައްޔަރުކުރުމާ ގުޅިގެން އިސްލާމްއާބާދުގައި ސަލާމަތީ ފިޔަވަޅުތައް ވަނީ ވަރަށް ބޮޑަށް ވަރުގަދަކޮށްފައެވެ.
ޕާކިސްތާނުގެ އެކި ކަންކޮޅުތަކުގައި ހިނގަމުންދާ ހަމަނުޖެހުންތަކާ ގުޅިގެން ސްކޫލްތައް ވެސް ވަނީ ބަންދުކޮށްފައެވެ. އަދި، މުޒާހަރާތަކާ ދެކޮޅަށް ޕާކިސްތާނުގެ ސަރުކާރުން ވަނީ ބައެއް ސޯޝަލް މީޑިޔާ މަންސަތައް ކަމުގައިވާ ޓްރިޓަރއާއި ފޭސްބުކް ބޭނުން ނުކުރެވޭ ގޮތަށް ހުރަސްއަޅާފައެވެ.
ޚާން ހައްޔަރުކޮށްފައި ވަނީ ހުސްވި އަހަރު އޭނާ އަވަހާރަކޮށްލަން ދިން ޙަމަލާއެއް ރާވާފައި ވަނީ އެ ޤައުމުގެ އަސްކަރިއްޔާގެ އިސް އޮފިސަރެއް ކަމުގައިވާ މޭޖަރ ޖެނެރަލް ފައިޞަލް ނަސީރު ކަމަށް އޭނާ ތުހުމަތުކޮށްފައިވާ ދަނޑިވަޅެއްގައެވެ. މުޒާހަރާއެއްގެ ތެރެއިން ބަޑިޖަހައިގެން ދިން ޙަމަލާގައި ޚާންގެ ފަޔަށް ވަޒަނެއް އަރައި ޒަޚަމުވިއެވެ. އެ ޙަމަލާގައި ޖެނެރަލް ފައިޞަލް ނަސީރުގެ އެއްވެސް ބައިވެރިވުމެއް ނެތް ކަމުގައި ޕާކިސްތާނުގެ އަސްކަރިއްޔާއިން ބުނެއެވެ.