އެމްއެންޑީއެފް ކޯސްޓްގާރޑު "ޝިޕް ހުރަވީ" ގެ ބަދަލުގައި އިންޑިއާ ސަރުކާރުން ދިން އުޅަނދު ކޮމިޝަން ކުރައްވައިފިއެވެ.
އިންޑިޔާއިން ހަދިޔާކުރި އުޅަނދަކީ ހުރަވީއަށްވުރެ ބޮޑު، އޮޕަރޭޝަނަލް ޤާބިލްކަން އިތުރު، ފަހުގެ އުޅަނދެކެވެ. މި އުޅަނދު އެމްއެންޑީއެފަށް ހަދިޔާކުރުމާއެކު ކޯސްޓްގާރޑު ޝިޕް ހުރަވީ ޑީކަމިޝަން ކުރައްވާފައެވެ. މި އުޅަނދު ކޮމިޝަން ކުރުމަށް ބޭއްވި ރަސްމިއްޔާތު ޝަރަފްވެރި ކޮށްދެއްވައި އުޅަނދު ކޮމިޝަން ކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުއެވެ. މިރަސްމިއްޔާތުގައި ދެޤައުމުގެ ދިފާއީ ވަޒީރުންނާއި، ސިފައިންގެ އިސްބޭފުޅުންގެ އިތުރުން ވަޒީރުންގެ މަޖިލީހުގެ މެމްބަރުން ވަނީ ބައިވެރިވެ ވަޑައިގެންފައެވެ.
އެމްއެންޑީއެފް ކޯސްޓްގާޑު ޝިޕް ހުރަވީގެ ބަދަލުގައި އިންޑިއާ ސަރުކާރުން އެމްއެންޑީއެފްއަށް ހަދިޔާކުރި އުޅަނދާއިއެކު ލޭންޑިން ކްރާފްޓެއްވެސް ވަނީ ހަދިޔާ ކުރައްވާފައެވެ. ލޭންޑިން ކްރާފްޓަކީ 13.75 މީޓަރު ބޮޑު ލޭންޑިން ކްރާފްޓެކެވެ.
މިއަދު ހަދިޔާކުރި އުޅަދަނީ 2006 ވަނަ އަހަރު އިންޑިއާއިން ހަދިޔާކުރި އުޅަނދަށްވުރެ ސައިޒުގެ ގޮތުން ބޮޑު ދުވެލި ބާރު، އަސްކަރީ އޮޕަރޭޝަނަލް ޤާބިލުކަން އިތުރު ފަހުގެ އުޅަނދެކެވެ. މިއުޅަނދުގެ ސަބަބުން އެމްއެންޑީއެފް ކޯސްޓްގާޑުގެ އޮޕަރޭޝަނަލް ޤާބިލްކަން އިތުރުވެ ރާއްޖޭގެ ދިފާޢީ ކަންކަމާއި އަދި ސަލާމަތާއި ރައްކާތެރިކަން ދެމެހެއްޓުމުގައާއި ރާއްޖޭގެ ކަނޑުގެ ސަރަހައްދުތައް ބެލެހެއްޓުމަށް ކުރާ މަސައްކަތްތައް އިތުރަށް ހަރުދަނާ ވެގެންދާނެއެވެ.
ރާއްޖޭގެ ދިފާޢީ ބާރުގެ އޮޕަރޭޝަނަލް ޤާބިލްކަން އިތުރު ކުރުމަކީ ދިވެހި ސަރުކާރުން ވަރަށްބޮޑު އިސްކަމެއް ދެއްވާފައިވާ ކަމަކަށްވާއިރު މިކަމުގައި އިންޑިއާ ސަރުކާރުން ދަނީ ގިނަ އެހީތަކެއް ދިވެހި އަސްކަރިއްޔާއަށް ފޯރުކޮށް ދެއްވަމުންނެވެ. މިގޮތުން އިންޑިއާ ސަރުކާރުން 2019 ވަނައަހަރުވެސް ވަނީ ކަނޑުގެ އުޅަދެއް ކޯސްޓްގާޑަށް ހަދިޔާ ކުރައްވާފައެވެ.