ޕަބްލިކް ސަރވިސް މީޑިއާ، ޕީ.އެސް.އެމްގެ ދަށުން "ޓީ.ވީ.އެމް ޤުރްޢާން ޗެނަލް"ގެ ނަމުގައި އައު ޗެނަލެއް އިފްތިތާޙްކޮށްފިއެވެ. ޓީވީއެމްއަށް 45 އަހަރު ފުރުން ފާހަގަކުރުމާއި ދިމާކޮށް މި ޗެނަލް ރަސްމީކޮށް އިފްތިތާޙުކޮށްދެއްވީ، މިނިސްޓަރ އޮފް އިސްލާމިކް އެފެއާޒް އަޙްމަދު ޒާހިރެވެ.
މި ޗެނަލް އިފްތިތާޙްކޮށްދެއްވާ ވާހަކަފުޅުދައްކަވަމުން އިސްލާމިކް މިނިސްޓަރ އަޙްމަދު ޒާހިރު ވަނީ، އާއްމުންގެ މެދުގައި ދީނީ ހޭލުންތެރިކަން އިތުރުކުރުމަށް ޓީވީއެމުން ކުރާ މަސައްކަތާއި، ދީނީ ޢިލްމުވެރިންނާއެކު އޮންނަ ގާތްގުޅުން ފާހަގަކުރައްވާ، އެކަމަށް ޝުކުރު އަދާކުރައްވާފައެވެ. މިނިސްޓަރ ވިދާޅުވީ، ކީރިތި ޤުރުއާނަކީ އަޅުގަނޑުމެންގެ މުޅި ހަޔާތް ބައްޓަންކުރަންވީގޮތް ބަޔާންކޮށްދެއްވާފައިވާ ފޮތްކަމަށެވެ.
ޤުރުއާނަކީ ދުނިޔަވީ އެތައް ފިލާވަޅުތަކެއް ދަސްކޮށްދޭ އަގުހުރި ފޮތެއްކަން ފާހަގަކުރައްވާ، ޤުރުއާނުގެ މާނަ އެނގުމަކީ ވަރަށް މުހިއްމު ކަމެއްކަމަށް މިނިސްޓަރ ވިދާޅުވިއެވެ. އެހެންކަމުން ޕީ.އެސް.އެމްއިން އަލަށް މިފެށި ޤުރުއާން ޗެނަލްގެ ސަބަބުން ވަރަށް ގިނަ ބަޔަކަށް ފައިދާތަކެއް ލިބިގެންދާނެކަމަށް މިނިސްޓަރ ވިދާޅުވިއެވެ.
''އާދެ ކީރިތި ޤުރްޢާނަކީ އެއީ އަޅުގަނޑުމެން ދިރިއުޅެންވީ ގޮތް، އަޅުގަނޑުމެންގެ މުޅި ޙަޔާތް ބައްޓަންކުރަންވީ ގޮތް ބިޔާންކުރައްވާފައި އޮންނަ ފޮތް. އަޅުގަނޑު ޤަބޫލުކުރާ ގޮތުގައި ޕީއެސްއެމްއިން މި ފެއްޓެވި ޤުރްއާން ޗެނަލްގެ ސަބަބުން ވަރަށް ގިނަ ބަޔަކަށް ފައިދާތަކެއް ކުރާނެ. ޤުރްއާނުގެ މާނައާއި އެކީގައި އަޑުއިވުނީމަ އެކުރާ އަސަރު ވަރަށް ތަފާތުވާނެ" މިނިސްޓަރ ޒާހިރު ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ޕީ.އެސް.އެމްގެ މެނޭޖިންގ ޑިރެކްޓަރ ޢަލީ ޚާލިދު ވިދާޅުވީ، މި ޗެނަލް ލޯންޗުކޮށްފައިވަނީ ވަރަށް ގިނަ ކަންކަމަށް ބެލުމަށްފަހު، މިއީ އިތުރު ސްޓާފުން ނެގުމާއި، އިތުރު ޚަރަދުތަކެއް ކުރުމަކާނުލާ ކުރެވޭނެ މަސައްކަތެއްކަމަށް ޤަބޫލުކުރެވޭތީކަމަށެވެ. އަދި މި ޗެނަލް އާއްމުންނާއި ހަމައަށް ގެނެސްދިނުމަށް ހަމަޖެހިފައިވަނީ އެސް.އެސް ނެޓްވޯކް ޕްރައިވެޓް ލިމިޓެޑް މެދުވެރިކޮށްކަމަށާއި، ކުރިއަށްއޮތްތާނގައި މި ޗެނަލް އިތުރަށް ފުރިހަމަށްކުރުމަށް ދެ ފަރާތުން ގުޅިގެން މަސައްކަތް ކުރާނެ ކަމަށް ޚާލިދު ވިދާޅުވިއެވެ.
''އަޅުގަނޑުމެންނަށް އެންމެ ރަނގަޅު މަޝްވަރާއެއް މިކުރެވުނީ އެސްއެސް ނެޓާ އެކީ. އެސްއެސް ނެޓާއެކީގައި އަޅުގަނޑުމެން މި ކުރެވުނު މަޝްވަރާއިން އަޅުގަނޑުމެން މިކަން ކުރާއިރު އިތުރު ޚަރަދެއް މީގެ ތެރެއަށް ނުގޮސް އަދި ކުރިއަށް އޮތްތަނުގައި މި ޗެނަލް އިތުރަށް ތަރައްޤީކުރެވޭނެ މަގުތަނަވަސް ވާނޭ ގޮތަށް އެބޭފުޅުން އިންތިޒާމްތައް ހަމަޖެއްސި" ޢަލީ ޚާލިދު ވިދާޅުވިއެވެ.
މި ޗެނަލަކީ ޤުރްޢާނުގެ ދިވެހި ތަރުޖަމާ ފެންނަގޮތަށް ޙާއްސަ ކުރެވިގެން ޕީއެސްއެމް އިން ތަޢާރަފް ކުރި ޗެނަލެކެވެ. މި ޗެނަލް އިފްތިތާޙް ކުރުމުގެ މައިގަނޑު މަޤްޞަދަކީ ޤުރްޢާނުގެ ދިވެހި ތަރުޖަމާއަށް އާންމުން ހޭލުންތެރިކޮށް، މުޖްތަމަޢު ތެރޭގައި ޤުރްޢާނަށް އޮތް ލޯބި އިތުރުކޮށް ކުރިއެރުވުމެވެ. މި ޗެނަލުން 24 ގަޑިއިރުގެ ޙިދުމަތް ލިބޭއިރު މިއީ މިފަދަ ޗެނަލެއް ރާއްޖޭގައި ތަޢާރަފް ކުރި ފުރަތަމަ ފަހަރެވެ.
ގިނަ ފަހަރަށް ޤުރްއާން ކިޔަވައި، އަޑުއަހައި ހެދެނީ އޭގެ މާނަ ނޭނގިއެވެ. އެހެންކަމުން ޤުރްއާނުގެ މޫރިތި އާޔަތްތައް ދިވެހި ތަރުޖަމާއެކު އަޑުއަހައި ކިޔޭނެހެން ޗެނަލެއް ތަޢާރަފް ކުރުން ވެގެންދާނީ ޤުރްއާނުގެ އަލީގައި ދީނީ ޢިލްމު އުނގެނުމަށް ލިބޭނެ ރަނުގެ ފުރުޞަތަކަށެވެ.
ޙާއްސަކޮށް މި ބަރަކާތްތެރި ރަމަޟާން މަހު ސްކޫލްތަކަށާއި، ޤުރައާން ކްލާސްތަކަށާއި ޢާންމު ފަރުދުންނަށް މި ޤުރްއާން ޗެނަލްގެ ސަބަބުން ފަސޭހަތަކެއް ލިބިގެންދާނެއެވެ. މިޗެނަލް ޕީއެސްއެމް ކަނެކްޓް ތެރެއިންވެސް ފެންނާނެއެވެ.