އެއްގަމު އުޅަނދުފަހަރު ދުއްވުމުގެ ލައިސަންސް ދޫކުރުމާބެހޭ ގަވާއިދަށް ގެނައި އިސްލާހުގައި، ރާއްޖެއަށް "އޮޓޯ ރިކްޝާ" އަދި "އޮޓޯ" އެތެރެކުރުމުގެ ހުއްދަ ނުދޭ ކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ވިދާޅުވެއްޖެއެވެ. މިގަވާއިދު ފުރަތަމަ އެކުލަވާލާ ޢަމަލުކުރަން ފެށީ 2012ވަނަ އަހަރުގެ ޖުލައި 15ވަނަ ދުވަހުއެވެ.
އެއްގަމު އުޅަނދުފަހަރު ދުއްވުމުގެ ލައިސަންސް ދޫކުރުމާބެހޭ ގަވާއިދަށް އިސްލާހު ގެނެސްފައިވަނީ އެއްގަމު އުޅަނދު ރެޖިސްޓްރީ ކުރުމުގައި، އަތޮޅުތަކުގެ ރަށްރަށުގައި ބޭނުންކުރާ ބައެއް ކަހަލަ އިންޖީނުލީ އުޅަނދުތަކުގެ ލައިސަންސް ކެޓަގަރީތައް ހިމެނިފައި ނުވާތީ، އެކަން ހިމެނުމުގެ ގޮތުންނެވެ.
އެއްގަމު އުޅަނދުފަހަރު ދުއްވުމުގެ ލައިސަންސް ދޫކުރުމާބެހޭ ގަވާއިދުގައި B3 ، B4 ، C3 އަދި C4 މިކެޓަގަރީ ތަކުގެ އުޅަނދު ބަޔާންކޮށްފައިވީ ނަމަވެސް، ރަޖިސްޓްރޭޝަން ގަވާއިދުގައި މި އުޅަނދުތަކުގެ ކެޓަގަރީތައް ބަޔާންކޮށްފައި ނެތުމުގެ ސަބަބުން ރަށްރަށުގައި ބޭނުންކުރާ 3 ފުރޮޅުލީ މީހުން އުފުލާ "ބަގީ" ތަކާއި ރަށު ޕިކަޕް ރަޖިސްޓަރީ ކުރުމުގައި ދަތިތައް ކުރިމަތިވަމުން އަންނަ ކަމަށް ޓްރާންސްޕޯޓު މިނިސްޓްރީން ވިދާޅުވެއެވެ.
މިކަން މިގޮތަށް ކަނޑައެޅުމުގެ ކުރިން ލައިސަންސް ގަވާއިދާއި ރަޖިސްޓްރޭޝަން ގަވާއިދާއި ފުށުއެރުންތައް ހުރުމާއި އަދި 3 ފުރޮޅުލީ މީހުން އުފުލާ "ބަގީ" އުޅަނދު ރަޖިސްޓްރީ ކުރުމުގައި ބޮޑެތި ފުށުއެރުންތަކެއް ރަޖިސްޓްރޭޝަން ސިސްޓަމުގައިވެސް ފާހަގަވެފައިވާ ކަމަށް މިނިސްޓްރީން ވިދާޅުވެއެވެ.
އަދި ގަވާއިދުގައި 3 ފުރޮޅުލީ "ބަގީ" ތަކަށް ވަކި ކެޓަގަރީއެއް ނެތި އޮތް އޮތުމުގެ ސަބަބުން ރިޒޯޓުތަކުގައާއި ރަށްރަށުގައި މިހާރުވެސް ބޭނުންކުރަމުންދާ އެފަދަ އުޅަނދުތައް ރަޖިސްޓްރީކުރުމުގައި ދަތިކަން އޮތްކަން މިނިސްޓްރީން ފާހަގަކުރައްވައެވެ. ނަމަވެސް ގަވާއިދަށް ގެނައި އިސްލާހާއެކު މިކަމަށް ހައްލު އަންނާނެކަމަށް މިނިސްޓްރީން ވިދާޅުވެއެވެ.
ޓްރާންސްޕޯޓު މިނިސްޓްރީ މިހާރު އުޅަނދުތައް ރަޖިސްޓަރީ ކުރާއިރު އެ އުޅަނދުގެ ފޮޓޯ ބަލައި އެ އުޅަނދަކީ ކޮންކަހަލަ އުޅަނދެއްކަން ޔަގީން ކުރަމުންދާ ކަމަށް އެމިނިސްޓްރީން ވިދާޅުވިއެވެ.
ޓްރާންސްޕޯޓް މިނިސްޓްރީން ވިދާޅުވީ 3 ފުރޮޅުލީ އުޅަނދުގެ ގޮތުގައި "އޮޓޯ ރިކްޝާ" އަދި "އޮޓޯ" ގެ ގޮތުގައި ބޭނުންކުރާ އުޅަނދުތައް ދިވެހިރާއްޖޭގެ އެއްވެސް ރަށެއްގައި މިހާތަނަށް އޮޕަރޭޓް ކުރުމަށް ހުއްދަ ދީފައި ނުވާކަމަށެވެ. އަދި "އޮޓޯ ރިކްޝާ" އަދި "އޮޓޯ" ގެ ގޮތުގައި ބެލެވޭ އުޅަނދުފަހަރު ރަޖިސްޓްރީ ކުރުމުގެ ފުރުސަތު ރާއްޖޭގައި ނެތް ކަމަށާއި، ކުރިޔަށް އޮތްތާގައިވެސް އެ ބާވަތުގެ އުޅަނދު ރަޖިސްޓަރީ ކުރުމަށް ހުއްދަ ނުކުރާނެ ކަމަށް ޓްރާންސްޕޯޓް މިނިސްޓްރީން ވިދާޅުވެއެވެ.
އަލަށް ގެނައި އިސްލާހުގައި، ލައިސަންސް ގަވާއިދުގެ B3 ކެޓަގަރީގައި ހިމެނެނީ، މީހުން އުފުލުމަށް ބޭނުންކުރާ، އިށީނުމުގެ ޖާގަ 3 މީހުންނަށް ވުރެ އިތުރުނުވާ، ފަސިންޖަރުން އުފުލާ، 3 (ތިނެއް) ފުރޮޅުލީ އުޅަނދެވެ. އެގޮތުން މި އުޅަނދުތަކަކީ މިހާރުވެސް މީހުން އުފުލާ "ބަގީ"ގެ ގޮތުގައި ފަސިންޖަރުން އުފުލުމަށް ރާއްޖޭގެ ރިޒޯޓުތަކުގައާއި ބައެއް ރަށްރަށުގައި ބޭނުންކުރާ އުޅަނދުތަކެވެ. ސިޓީ ކައުންސިލްތަކާއި ރަށު ކައުންސިލްތަކުން ގަރާޖުގެ ގޮތުގައި ޕާމިޓު ދޫކުރަމުންދާނީ 4 ފުރޮޅުލީ އުޅަނދު ފަހަރަށެވެ.
މި ގަވާއިދަށް ގެނައި އިސްލާހުގެ މައިގަނޑު ބޭނުމަކީ ލައިސަންސް ކެޓަގަރީގައި، 3 ފުރޮޅުލީ އުޅަނދުފަހަރަށް ލައިސަންސް ދެމުންގެންދާއިރު އެއުޅަނދުތަކަކީ ކޮބައިކަން ރަޖިސްޓްރޭޝަން ގަވާއިދުން ބަޔާންކޮށް އެކެޓަގަރީތައް ރަޖިސްޓަރީތަކުން ފެންނާނެގޮތަށް ކެޓަގަރައިޒު ކުރުން ކަމަށް މިނިސްޓްރީން ވިދާޅުވެއެވެ.