މިދިޔަ ހަފްތާގެ ބުރާސްފަތި ދުވަހުގެ އިރުއޮއްސުނު ވަގުތު ހުޅުމާލޭގައި ހުންނަ 'ޖޫސް ޓައިމް'އަށް ގެއްލުންދިން މައްސަލާގައި ފުލުހުން ހިންގި އޮޕަރޭޝަނެއްގައި 7 މީހަކު ހައްޔަރުކޮށްފިއެވެ،
ފުލުހުން ވިދާޅުވީ ހުޅުމާލެ ޖޫސް ޓައިމަށް ބަޔަކު ވަދެ ގެއްލުންދީފައިވާ މައްސަލައާ ގުޅިގެން ކޯޓު އަމުރެއްގެ ދަށުން އިއްޔެ ހުޅުމާލޭގެ އެޕާޓްމަންޓެއް ބަލައި ފާސްކޮށްފައިވާކަމަށެވެ. މި އެޕާޓްމަންޓް ބަލައިފާސްކުރިއިރު، މާރާމާރީ ހިންގުމަށް ބޭނުންކުރާ ބައެއް ތަކެއްޗާއި މަސްތުވާތަކެތިވެސް ފެނިފައިވާކަމަށް ފުލުހުން ވިދާޅުވިއެވެ. އަދި މިތަކެއްޗާއިއެކު އެ އެޕާޓުމަންޓުން 7 މީހަކު ހައްޔަރުކޮށްފައިވާކަމަށް ފުލުހުން ވިދާޅުވިއެވެ. ހައްޔަރު ކުރި މީހުންގެ ތެރޭގައި އަންހެނަކުވެސް ހިމެނެއެވެ. މި އެންމެންނަކީވެސް ދިވެހިން ކަމަށް ފުލުހުން ވަނީ ވިދާޅުވެފައެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި 'ޖޫސް ޓައިމް' އަށް ގެއްލުން ދީފައި ވަނީ ހެލްމެޓް އަޅާ މޫނު ނިވާކޮށްފައިވާ ދެ ފިރިހެނުންނެވެ. ގެއްލުން ދިނުމަށް ފަހު އެ މީހުން ވަނީ ފިލާފައެވެ. އެމީހުން އެތަނުން ދިޔައީ ސައިކަލެއްގައެވެ.
ޖޫސް ޓައިމަށް ވަތް މީހުން ވަނީ އެތަނުގެ ބިއްލޫރިތައް ތަޅާލައި އެތެރެއަށް ވަދެ އެތެރޭގައި ހުރި ތަކެއްޗަށް ވެސް ވަރަށް ބޮޑަށް ގެއްލުން ދީފައެވެ.