ޤަވާޢިދާ ޚިލާފަށް އިޓަލީވިލާތަށް ހިޖުރަކުރަން މަސައްކަތްކުރި ބަޔަކު ގޮވައިގެން ދަތުރުކުރަމުންދިޔަ ބޯޓެއް އެ ޤައުމުގެ ދެކުނު އައްސޭރިފަށަށް ފެތި، 62 މީހުން މަރުވެއްޖެއެވެ. ބޯޓުގައި ދަތުކުރި މީހުންގެ ތެރޭގައި ގިނަ ޢަދަދެއްގެ ކުޑަކުދިން ތިބި ކަމުގައި، ކުޑަކުދިންގެ ހައްޤުތައް ހިމާޔަތްކުރަން މަސައްކަތްކުރާ ޖަމުޢިއްޔާ ސޭވް ދަ ޗިލްޑްރަންއިން ބުނެއެވެ.
ބޯޓު ކަނޑުވެ، ފެތިފައި ވަނީ ގާޖައަށްވުރެ އިތުރަށް މީހުން އަރުވައިގެން ދަތުރުކުރަނިކޮށް ތޫފާނެއްގެ ޖެހުމުގެ ސަބަބުން ކަމަށް ބެލެވޭ ކަމުގައި އިޓަލީވިލާތުގެ ކޯސްޓްގާޑުން ބުނެއެވެ. ތުރުކީވިލާތުގެ ރަށެއް ކަމުގައިވާ އިޒްމީރުން މި ބޯޓު ފުރާފައި ވަނީ މީގެ ހަފުތާއެއްހާ ދުވަސް ކުރިންނެވެ. ބޯޓުގައި ތިބި މީހުން ބުނީ، ބާރު އަޑުފަށްގަނޑަކަށް ފަހު ބޯޓު ބިންދައިގެން ގޮސް އެންމެން ކަނޑަށް ވެއްޓުނު ކަމުގައެވެ.
ބޯޓުގައި ދަތުރުކުރި މީހުންގެ ހަށިތައް ހޯދުމަށް އިޓަލީވިލާތުގެ ކޯސްޓްގާޑުން ހުއްޓުމެއްނެތި މަސައްކަތް ކުރަމުންދާއިރު، ބޯޓުގައި ދަތުރުކުރި ބައެއް މީހުންގެ ހަށިތައް އެ ސަރަޙައްދުގެ ރަށްތަކުގެ އައްސޭރިފަށަށް ވަނީ ލައްގާފައެވެ. މީހުންގެ ހަށިތައް ހޯދުމަށް ޑައިވަރުންގެ ޓީމުތަކުން ވެސް ވަނީ މަސައްކަތް ކުރަމުންނެވެ.
މި ހާދިސާގައި ސަލާމަތްވި ކުޑަކުދިންނަށް ނަފްސާނީ ފަރުވާ ފޯރުކޮށްދެމުންދާ ކަމުގައި ޑޮކްޓަރސް ވިތްއައުޓް ބޯޑަރސްގެ އިސް އޮފިޝަލެއް ކަމުގައިވާ ސެރްޖިޔޯ ޑި ޑާޓޯ ވިދާޅުވިއެވެ. "އެއް ކުއްޖަކީ އަފްޣާނިސްތާނުގެ 12 އަހަރުގެ ކުއްޖެއް. އޭނާގެ ޢާއިލާގެ އެހެން ހުރިހާ މެންބަރުން ގެނބުނީ އޭނާގެ ކުރިމަތީގައި. މަންމައާއި ބައްޕައާއި ހަތަރު ބެއިންގެ އިތުރުން ތިމާގެ އިތުރު ތިން މީހުން ވެސް މަރުވި،" އޭނާ ވިދާޅުވިއެވެ.
ކަނޑުވި ބޯޓުގައި ދަތުރުކޮށްފައިވަނީ އަފްޣާނިސްތާނާއި، ޕާކިސްތާނާއި، ސޮމާލިޔާގެ އިތުރުން ސޫރިޔާގެ ރެފިޔުޖީން ކަމުގައި ސޭވް ދަ ޗިލްޑްރަން އިން ބުނެއެވެ. މީގެ ތެރޭގައި 10 ކުޑަކުދިން ވެސް ހިމެނެއެވެ. އަދި، ގިނަ ޢަދަދެއްގެ ކުޑަކުދިންގެ ހަށިތައް އަދިވެސް ނުފެންނަ ކަމުގައި އޮފިޝަލުން ވިދާޅުވެއެވެ.
މި ހާދިސާއާ ގުޅިގެން، ޤަވާޢިދާ ޚިލާފަށް ހިޖުރަކުރަން އެހީތެރިވެދިން ތިން މީހަކު އިޓަލީވިލާތުން ވަނީ ހައްޔަރުކޮށްފައެވެ. އަދި، ދަތުރުގެ އިންތިޒާމުތައް ހަމަޖެއްސުމުގައި ހަރަކާތްތެރިވި އިތުރު މީހަކު ހޯދުމުގެ މަސައްކަތް ކުރަމުންދާ ކަމުގައި ވެސް އިޓަލީވިލާތުގެ އޮފިޝަލުން ވިދާޅުވެއެވެ.
މި އަހަރުގެ މިހާތަނަށް 14,000 އަށްވުރެ ގިނަ މީހުން ޤަވާޢިދާ ޚިލާފަށް އިޓަލީވިލާތަށް ހިޖުރަކޮށްފައިވާ ކަމުގައި އެ ޤައުމުގެ ދާޚިލީ ވުޒާރާއިން ހާމަކުރެއެވެ. އޭގެ ކުރީ އަހަރުގެ ފުރަތަމަ ދެ މަހުގެ ތެރޭގައި އެ ޤައުމަށް އެތެރެވެފައި ވަނީ 5,200 މީހުންނެވެ. ޤަވާޢިދާ ޚިލާފަށް އިޓަލީވިލާތަށް ހިޖުރަކުރުން ހުއްޓުވަން މަސައްކަތް ކުރައްވާނެ ކަމަށް އެ ޤައުމުގެ ބޮޑުވަޒީރު ޖިޔޯޖިޔާ މެލޯނީ ވަނީ ވިދާޅުވެފައެވެ.