މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސް އިފްތިތާހު ކުރައްވައިފިއެވެ. މިއިންސްޓިޓިއުޓް އިފްތިތާހު ކޮށްދެއްވީ ނައިބު ރައީސް ފައިސަލް ނަސީމެވެ.
މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސަކީ ލާމަރުކަޒީ ނިޒާމު ރާއްޖޭގެ އިތުރަށް ފުޅާކޮށް ހިންގުމަށްޓަކައި، ތައުލީމީ ގާބިލް ބަޔަކު އުފެއްދުމަށް އެލްޖީއޭގެ އިސްނެންގެވުމުގެ މަތީން އުފެއްދި އިންސްޓިޓިއުޓެކެވެ. މިއިންސްޓިޓިއުޓު އިފްތިތާހްކުރެއްވީ މިއަދު ފާހަގަކުރި ލާމަރުކަޒީ ދުވަހުގެ މުނާސަބަތާއިވެސް ގުޅުވައިގެންނެވެ.
އިންސްޓިޓިއުޓް އިފްތިތާހު ކުރުމަށް ބޭއްވި ޖަލްސާގައި ވާހަކަ ދައްކަވަމުން ލޯކަލް ގަވަރމަންޓް އޮތޯރިޓީ ބޯޑުގެ ރައީސް، މިނިސްޓަރ އޮފް ހޯމް އެފެއާޒް ޢިމްރާން ޢަބްދުﷲ ވިދާޅުވީ ރާއްޖޭގެ ހިންގުމުގެ ނިޒާމަށް އެންމެ ބޮޑު ބަދަލެއް ގެނައީ 2010 ވަނަ އަހަރު ފާސްކުރި ލާމަރުކަޒީ ގާނޫނުގެ ތެރެއިން ކަމަށެވެ. އަދި މިއަދު ސަރުކާރުން ޤާނޫނަށް ގެނައި އިސްލާހުތަކާއިއެކު ކައުންސިލްތަކަށް ބޮޑެތި ބާރުތަކާއި އިޚްތިޔާރުތައް ލިބިގެން ގޮސްފައިވާކަމަށެވެ.
މިނިސްޓަރ ވިދާޅުވީ މިއަދު ޤާނޫނުތަކުން ލިބިދީފައިވާ ބާރުތަކާއި، ސަރުކާރުން ބޭނުންވާ ސްޕީޑުގައި ކަންކަން ކޮށްދިނުމުގައި ކައުންސިލްތަކުން ބޮޑު އެއްބާރުލުމެއް ދެއްވާކަމަށެވެ. ނަމަވެސް އޮތް ގޮންޖެހުމަކީ ކައުންސިލްތަކުގައި އެންމެ އެކަށޭނަވަރަށް ފަންނީ ބޭފުޅުން ނެތުންކަމަށެވެ. އަދި މިއީ ލާމަރުކަޒީ މުޅި ނިޒާމު ހިންގުމަށްޓަކައި ޒުވާން ޖީލެއް ބިނާކުރުމަށް އެޅިގެންދިޔަ މިފަދަ ފުރަތަމަ ބިންގާ ކަމަށް މިިނިސްޓަރ ވިދާޅުވިއެވެ.
އެލްޖީއޭ އުފެދުނީއްސުރެ މިހާތަނަށް ރާއްޖޭގެ ހިންގުމުގެ ނިޒާމު ހަރުދާކޮށް ކުރިއެރުވުމަށް ގިނަ މަސައްކަތްތަކެއް ކުރައްވާފައިވާކަމަށްވެސް މިނިސްޓަރ ވިދާޅުވިއެވެ. އަދި ނިމިގެންދިޔަ އަހަރު އެކަނިވެސް އެލްޖީއޭއިން 1،574 މީހުންނަށް ތަމްރީން ދެއްވާފައިވާކަމަށެވެ.
މިރަސްމިއްޔާތުގައި އިންސްޓިޓިއުޓްގެ އާވެބްސައިޓްވެސް ވަނީ އިފްތިތާހުކޮށް ދެއްވާފައެވެ. ވެބްސައިޓް އިފްތިތާހު ކޮށްދެއްވީ ނައިބު ރައީސް ފައިސަލް ނަސީމެވެ. އަދި ކުރިއަށް އޮތް ތިން އަހަރުގެ ސްޓްރެޓެޖިކް ޕްލޭނާއި، ކިއެވެނި ޕޯޓަލްވެސް ވަނީ އިފްތިތާހުކޮށްފައެވެ.
މިރަސްމިއްޔާތުގައި ވަނީ މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސްއާއެކު ބައިވެރިވާ އެކި މުއައްސަސާތަކާއެކު ވަނީ އެއްބަސްވުންތައް ބަދަލުކޮށްފައެވެ. މިއެއްބަސްވުންތަކުގައި އެލްޖީއޭގެ ފަރާތުން ސޮއިކުރެއްވީ އެލްޖީއޭގެ ސީއީއޯ އަފްޝަން ލަތީފެވެ.