ޖުމްހޫރީ ޕާޓީގެ ޤައުމީ ކޮންފަރެންސް ފަށައިފިއެވެ.
މިއަދާއި މާދަމާގެ ނިޔަލަށް ދަރުބާރުގޭގައި ކުރިއަށްދާ މިކޮންފަރެންސް އިފްތިތާހު ކޮށްދެއްވީ ޖުމްހޫރީ ޕާޓީގެ ލީޑަރު
ޤާސިމް އިބްރާހިމްއެވެ. މިޖަލްސާގައި ސިޔާސީ އެކި ޕާޓީތަކުގެ އިސްބޭފުޅުންނާއި، ރާއްޖޭގައި ތިއްބަވާ އެކި ޤައުމުތަކުގެ ސަފީރުންނާއި، އިލެކްޝަންސް ކޮމިޝަންގެ އިސްބޭފުޅުންވެސް ބައިވެރިވެ ވަޑައިގެންނެވިއެވެ.
ކޮންފަރެންސް އިފްތިތާހުކޮށްދެއްވައި ވާހަކަފުޅު ދައްކަވަމުން ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވީ މިކޮންފަރެންސަކީ އެޕާޓީގެ ކުރިމަގުގެ މުހިންމު ނިންމުތަކެއް ނިންމިގެންދާނެ ކޮންފަރެންސެއްކަމަށެވެ. ޤާސިމް ވިދާޅުވީ ރާއްޖޭގެ ޑިމޮކްރަސީގެ ހަޔާތުގައި ޖުމްހޫރީ ޕާޓީއަކީ މުހިންމު ދައުރެއް އަދާކުރާ ޕާޓީއެއްކަމަށެވެ. ފެހި ޤާނޫނު އަސާސީގެ ދަށުން ރާއްޖޭގައި އިންތިޚާބުވި ކޮންމެ ވެރިކަމަކީވެސް ޖުމްހޫރީ ޕާޓީގެ ފުރިހަމަ ބައިވެރިވުމާއެކު އުފެދުނު ވެރިކަން ތަކެއްކަމަށް ޤާސިމް ވިދާޅުވިއެވެ.
ޤާސިމް ވިދާޅުވީ ސިޔާސީ މަސައްކަތް ކުރައްވާ ކޮންމެ ބޭފުޅަކީވެސް އެކަމުގައި ގިނަ ގޮންޖެހުންތަކާއި، ކާމިޔާބީވެސް އޮތްކަމަށްދެކި މަސައްކަތް ކުރައްވަންޖެހޭ ބޭފުޅެއް ކަމަށެވެ. އަދި ބައެއްފަހަރު ޖަލަށް ދާންޖެހުމާއި، ސިޔާސީ ގޮތުން ބަލިވުމާއި މިކަންކަމަކީ އޭގެ ބަދަލު ފަހުން ހިފަންޖެހޭ ކަންކަމެއް ނޫންކަމަށާއި، ކޮންމެ ކަމެއްގައިވެސް މަސައްކަތް ކުރަންވާނީ ހެޔޮ ނިޔަތުގައި ކަމަށް ޤާސިމް ވިދާޅުވިއެވެ.
މިއަދު ފެށި ޖުމްހޫރީ ޕާޓީގެ ޤައުމީ ކޮންފަރެންސްގައި އެޕާޓީގެ އަސާސީ ގަވާއިދަށް ހުށަހެޅިފައިވާ އިސްލާހުތައް ވަނީ ފާސްކޮށްފައެވެ. އެޖެންޑާގައި އޮތް ގޮތުން މިރޭ އެޕާޓީގެ ކައުންސިލާއި، ޕާޓީގެ އެކި މަޤާމުތަކަށް ކުރިމަތިލާފައިވާ ބޭފުޅުންގެ މެދުގައި ވޯޓު ނެގުން ކުރިއަށްދިއުމަށް އޮތީ ހަމަޖެހިފައެވެ. ނަމަވެސް ވޯޓު ކަރުދާހުގައި ފޮޓޯ ނެތުމުން އެކަމުގެ ކަންބޮޑުވުން ބައެއް ކެނޑިޑޭޓުން ފާޅު ކުރުމުން ވޯޓުގެ ކަންކަން މާދަމާ ކުރިއަށް ގެންދިއުމަށް ވަނީ ނިންމާފައެވެ.
ޖުމްހޫރީ ޕާޓީގެ ޤައުމީ ކޮންގްރެސްގައި މާދަމާ އެޕާޓީން ކުރިއަށް އޮތް ރިޔާސީ އިންތިޚާބުގައި ނިންމާނެ ގޮތަކާއި ގުޅޭގޮތުން ހުށަހެޅިފައިވާ ޤަރާރަށް ބަހުސްކޮށް ވޯޓަށް އެހުމަށް ވަނީ ހަމަޖެހިފައެވެ. އަދި މާދަމާރޭ ޤައުމީ ކޮންފަރެންސް ނިންމުމުގެ ޖަލްސާ ބޭއްވުމަށް ވަނީ ހަމަޖެހިފައެވެ.