ދެކުނު އެމެރިކާގެ ޤައުމެއް ކަމުގައިވާ ބްރެޒިލްގެ އިރުދެކުނުގެ ސަރަޙައްދުތަކަށް ބޯކޮށް ވާރޭވެހި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ސަބަބުން މަރުވި މީހުންގެ ޢަދަދު 46 އަށް އަރައިފިއެވެ. ވިއްސާރައިގެ އަސަރު އެންމެ ބޮޑަށް ކޮށްފައިވާ އިރުދެކުނުގައިވާ ސައޮ ޕައުލޯއާއި ސައޮ ސެބާސްޓިޔާއޯގައި ކިސަޑުތަކުގެ ދަށުވެފައިވާ ކަމަށް ބެލެވޭ މީހުން ހޯދައި، ސަލާމަތްކުރުމަށް އޮފިޝަލުން ދަނީ ހުއްޓުމެއް ނެތި މަސައްކަތް ކުރަމުންނެވެ.
ފާއިތުވި 24 ގަޑިއިރުގެ ތެރޭގައި ސައޮ ސެބާސްޓިޔާއޯއަށް 680 މިލިމީޓަރުގެ ވާރޭ ވެހިފައިވާ ކަމުގައި އެ ޤައުމުގެ މޫސުމާ ބެހޭ އިދާރާއިން ހާމަކުރެއެވެ. ސައޮ ސެބާސްޓިޔާއޯއަކީ ސައޮ ޕައުލޯއާ 200 ކިލޯމީޓަރު އިރުދެކުނުން އޮންނަ އައްސޭރިފަށުގެ ރަށެކެވެ. ކުރިއަށް އޮތް ހަފުތާއެއްހާ ދުވަހު ވެސް އެ ސަރަޙައްދަށް ބޯކޮށް ވާރޭވެހޭނެ ކަމަށް ލަފާކުރެވޭ ކަމުގައި މޫސުމާ ބެހޭ އިދާރާއިން ބުންޏެވެ.
ބޯކޮށް ވާރޭވެހުމުގެ ސަބަބުން ގިނަ ސަރަޙައްދުތަކެއްގެ ބިންގަނޑު ކަނޑައިގެން ގޮސް ކިސަޑު ފައިބާފައިވާއިރު، ކިސަޑުތަކުގެ ދަށުން އިތުރު މީހުންގެ ހަށިތައް ފެންނަމުންދާ ކަމުގައި އޮފިޝަލުން ވިދާޅުވެއެވެ. އަދި، ކިސަޑުތަކުގެ ދަށުގައި ގިނަ ޢަދަދެއްގެ ބަޔަކު ތާށިވެފައިވާ ކަމަށް ބެލެވޭއިރު، ދިރިތިއްބާ ގިނަ ބަޔަކު ސަލާމަތް ކުރެވުމަކީ ނާދިރުކަމެއް ކަމުގައި ވެސް އޮފިޝަލުން ބުންޏެވެ.
ސައޮ ޕައުލޯގެ ގަވަރުނަރުގެ އޮފީހުން ބުނީ، ވިއްސާރަ އަލިވެފައިނުވާތީ، ކުރިއަށް އޮތް ދުވަސްތަކުގައި އިތުރު ސަރަޙައްދުތަކުގެ ބިންގަނޑު ކަނޑައިގެން ގޮސް، ކިސަޑު ފޭބުމުގެ ބިރު އެބައޮތް ކަމުގައެވެ. އަދި، ވިއްސާރައިގެ ސަބަބުން، މީހުން ސަލާމަތް ކުރުމަށް ކުރަމުންދާ މަސައްކަތްތަކަށް ހުރަސް އެޅެމުންދާ ކަމުގައި ވެސް އެ އޮފީހުން ބުނެއެވެ. އެ މަސައްކަތުގައި 1,000 އަށްވުރެ ގިނަ އޮފިޝަލުން ދަނީ ހަރަކާތްތެރިވަމުންނެވެ. އަދި، 50 އުޅަނދާއި 14 ހެލިކޮޕްޓަރު ބޭނުން ކުރަމުންނެވެ.
ފައިބާފައިވާ ކިސަޑުތަކުގެ ދަށުގައި 38 އަށްވުރެ ގިނަ މީހުން ތާށިވެފައިވާ ކަމަށް ބެލެވޭއިރު، އެ މީހުންގެ ހަށިތައް ފެނި، މި ހާދިސާގައި މަރުވި މީހުންގެ ޢަދަދު 70 އަށް އެރުން ގާތް ކަމުގައި ސައޮ ޕައުލޯގެ ގަވަރުނަރު ޓްރްސީސިޔޯ ޑެ ފްރެއިތާސް ވިދާޅުވިއެވެ. ފެންބޮޑުވުމާއި ކިސަޑު ފޭބުމާ ގުޅިގެން މިހާރު ވެސް 1,730 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. އޭގެ ތެރެއިން 760 އަށްވުރެ ގިނަ މީހުންގެ ގެދޮރު ވަނީ ހަލާކުވެފައެވެ.
ރައްކާތެރި ހިސާބުތަކަށް ބަދަލުކޮށްފައިވާ މީހުންގެ ތެރޭގައި ޒަޚަމުވެފައިވާ 25 މީހުން ވެސް ހިމެނެއެވެ. އޭގެ ތެރޭގައި ހަ ކުޑަކުދިން ހިމެނޭއިރު، ޖުމުލަ ހަތް މީހެއްގެ ހާލު ސީރިޔަސް ކަމުގައި ސައޮ ޕައުލޯގެ އޮފިޝަލުން ވިދާޅުވެއެވެ. ގެދޮރު ހަލާކުވެފައިވާ މީހުންނަށް ޓެންޓުތައް ޖަހައި، ވަގުތީ ހިޔާވަހިކަން ފޯރުކޮށްދިނުމަށް އޮފިޝަލުން ދަނީ މަސައްކަތް ކުރަމުންނެވެ.
މި ހާދިސާގައި ގެއްލުން ލިބިފައިވާ ސަރަޙައްދުތައް ބައްލަވައިލެއްވުމަށް ރައީސް ލުއީޒް އިނާސިއޮ ލޫލާ ޑެ ސިލްވާ ވަނީ ވަޑައިގަންނަވާފައެވެ. ބިންގަނޑު ކަނޑައިގެން ގޮސް ކިސަޑު ފޭބުމުގެ ބިރު އޮތް ސަރަޙައްދުތަކުގައި 9.5 މިލިޔަނަށް ވުރެ ގިނަ މީހުން ދިރިއުޅޭ ކަމަށް އެ ޤައުމުގެ އޮފިޝަލުން އަންދާޒާ ކުރެއެވެ. ބްރެޒިލްއަކީ 215 މިލިޔަން މީހުންގެ އާބާދީއެއް އޮންނަ ޤައުމެކެވެ.