މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ހުސްވެފައިވާ މެންބަރުކަމުގެ މަޤާމަށް ކުރިމަތިލެއްވި ފަސް މީހުންގެ ތެރެއިން ތިން މީހެއްގެ ނަން ތަޅުމަށް ފޮނުވަން ކޮމެޓީން ފާސްކޮށްފިއެވެ.
ބްރޯޑްކޮމްގެ މެންބަރެއްގެ، މެންބަރުކަމުގެ މަޤާމު ހުސްވީ، އެ ކޮމިޝަންގެ ނާއިބު ރައީސްގެ މަޤާމުގައި ހުންނެވި އަޙްމަދު ޤައިސް، މިދިޔަ މަހުގެ 8 ވަނަ ދުވަހު މަޤާމުން އިސްތިުފާދެއްވުމުންނެވެ. ބްރޯޑްކޮމްގެ ހުސްވެފައިވާ މެންބަރުކަމުގެ މަޤާމަށް ހުޅުވާލުމުން، އެ މަޤާމަށް ކުރިމަތިލެއްވި ފަސް މީހެއްގެ ނަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިސްކަންދެއްވާ ތަރުތީބުން މަޖިލީހަށް ފޮނުއްވީ މިމަހުގެ 8 ވަނަ ދުވަހުއެވެ.
މިނަންތައް ދިރާސާ ކޮށްފައިވަނީ މަޖިލީހުގެ މިނިވަން މުވައްސަސާތަކާއި ބެހޭ ކޮމެޓީންނެވެ. ކޮމެޓީން ދިރާސާ ކުރުމަށްފަހު ތަޅުމަށް ފޮނުވުމަށް ފާސްކޮށްފައިވަނީ ތިން ނަމެކެވެ. އެއީ އައިމިނަތު ނުޒުހާ، ރިވޯޑް، ހ. ހޯރަފުށި، ހުސައިން އަމްރު، ވ. ރޯޝަން އަދި މަރިޔަމް ނަރީމާން ޝަރީފް މުޝްތަރީގެ ގދ. ތިނަދޫ އެވެ. މި ނަންތަކަށް ރުހުން ހޯދުމަށް ވަކިވަކިން ތަޅުމުގައި ވޯޓަށް އަހާނެއެވެ.
7 މެންބަރުންގެ މައްޗަށް އެކުލެވޭ ބްރޯޑްކާސްޓިންގ ކޮމިޝަންގައި މިހާރު ތިއްބެވީ، އެކޮމިޝަންގެ ރައީސާ މަރްޔަމް ވަޙީދާއާއި، ނާއިބު ރައީސް މުޙައްމަދު ފަޒީންގެ އިތުރުން ކޮމިޝަންގެ މެންބަރުން ކަމަށްވާ އަމްޖަދު ވަހީދާއި، އަލީ ޔޫސުފާއި، އާމިނަތު އަމީނާއާއި، ޝިފްލާ އިބްރާހީމްއެވެ.