މޯލްޑިވްސް ބްރޯޑްކާސްޓިން ކޮމިޝަންގެ ހުސްވެފައިވާ މެންބަރުކަމުގެ މަޤާމަށް އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ ފަރާތްތަކުގެ ނަންތައް އާއްމުންގެ ހިޔާލަށް ހުޅުވާލައިފިއެވެ.
މިމަހުގެ 8 ވަނަ ދުވަހު އޮތް މަޖިލީހުގެ ޖަލްސާގައި ވަނީ ބްރޯޑްކޮމްގެ ހުސްވެފައިވާ މެންބަރުކަމުގެ މަޤާމަށް ހުޅުވާލުމުން، އެ މަޤާމަށް ކުރިމަތިލެއްވި ފަރާތްތަކުގެ ތެރެއިން ރައީސުލްޖުމްހޫރިއްޔާ ފޮނުއްވި 5 ނަން މަޖިލީހުގެ ތަޅުމަށް ހުށަހަޅާފައެވެ. އަދި އެ ނަންތައް ވަނީ ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށްވެސް ފޮނުއްވާފައެވެ.
ބްރޯޑްކޮމްގެ މެންބަރުކަމަށް އައްޔަންކުރެއްވުމަށް ފޮނުއްވި ނަންތައް
1- އައިމިނަތު ނުޒުހާ، ރިވޯޑް، ހއ. ހޯރަފުށި
2- ހުސެއިން އަމްރު، ވ. ރޯޝަން
3- ޝާން ސޯލިހު މުހައްމަދު، ފިނިވާދީ، ދ. ކުޑަހުވަދޫ
4- މަރިޔަމް ނަރީމާން ޝަރީފް، މުޝްތަރީގޭ، ގދ. ތިނަދޫ
5- މަރިޔަމް މުނާ، ބޯގަންވިލާ، ސ. ފޭދޫ
މަޖިލީހުގެ އިދާރާއިން މިއަދު ވަނީ މި 5 ބޭފުޅުންނާމެދު އާއްމުންގެ ހިޔާލެއް ނުވަތަ ޝަކުވާއެއް އޮތްނަމަ އެކަމަށް ފުރުޞަތު ހުޅުވާލާފައެވެ. އަދި އެ ފަރާތްތަކާއިމެދު ޝަކުވާއެއް އޮތްނަމަ މިމަހުގެ 19 ވަނަ ދުވަހުގެ މެންދުރު 2:00ގެ ކުރިން މަޖިލީހަށް ފޮނުއްވުމަށް ވަނީ އެދިފައެވެ.
ބްރޯޑްކާސްޓިންގ ކޮމިޝަންގެ މެންބަރެއްގެ، މެންބަރުކަމުގެ މަޤާމު ހުސްވީ، އެ ކޮމިޝަންގެ ނާއިބު ރައީސްގެ މަޤާމުގައި ހުންނެވި އަޙްމަދު ޤައިސް، މިދިޔަ މަހުގެ 8 ވަނަ ދުވަހު މަޤާމުން އިސްތިުފާދެއްވުމުންނެވެ.
7 މެންބަރުންގެ މައްޗަށް އެކުލެވޭ ބްރޯޑްކާސްޓިންގ ކޮމިޝަންގައި މިހާރު ތިއްބެވީ، އެކޮމިޝަންގެ ރައީސާ މަރްޔަމް ވަޙީދާއާއި، ނާއިބު ރައީސް މުޙައްމަދު ފަޒީންގެ އިތުރުން ކޮމިޝަންގެ މެންބަރުން ކަމަށްވާ އަމްޖަދު ވަހީދާއި، އަލީ ޔޫސުފާއި، އާމިނަތު އަމީނާއާއި، ޝިފްލާ އިބްރާހީމްއެވެ.