މުއްދަތު ހަމަވެފައިވާ ލައިސަންސް ބޭނުންކޮށްގެން މިމަހުގެ ނިއަލަށް އެއްގަމު އުޅަނދު ދުއްވޭނެ ކަމަށް ޓްރާންސްޕޯޓު މިނިސްޓްރީން ވިދާޅުވެއްޖެއެވެ.
ޑިޖިޓަލް ލައިސަންސް ތަޢާރަފްކުރުމަށް ކުރަންޖެހޭ ތައްޔާރީތައްވުމަށްޓަކައި އެއްގަމު އުޅަނދު ދުއްވުމުގެ ލައިސަންސްގެ ޚިދުމަތްދިނުން ޖެނުއަރީ މަހުގެ 29 ވަނަ ދުވަހު މެދުކަނޑާލިއިރު މިނިސްޓްރީން ހާމަކުރައްވާފައިވަނީ މުއްދަތު ހަމަވާ ލައިސަންސްތައް، މިމަހުގެ 14 ވަނަ ދުވަހުގެ ނިޔަލަށް ބޭނުން ކުރެވޭނެކަމަށެވެ. ނަމަވެސް މިމުއްދަތު މިމަހުގެ ނިއަލަށް މިހާރުވަނީ އިތުރުކުރައްވާފައެވެ.
މިމުއްދަތު އިތުރު ކުރެއްވީ އަލަށް ބޭނުންކުރަން ފަށާ ސޮފްޓްވެއަރ ބަދަލުވުމަށް މަސައްކަތް ކުރަމުން އަންނާތީއާއި ޓްރާންސްޕޯޓް މިނިސްޓްރީގެ މަސައްކަތްތައް ހުޅުމާލެއަށް ބަދަލު ކުރުމަށް ކުރަންޖެހޭ މަސައްކަތްތައް މިވަގުތު ކުރަމުން އަންނާތީ އާއްމު ރައްޔިތުންނަށް ދިމާވެދާނެ ދަތިތަކަކަށް ހައްލު ހޯދާދިނުމުގެ ގޮތުން ކަމަށް ޓްރާންސްޕޯޓް މިނިސްޓްރީން ވިދާޅުވެއެވެ.
ޓްރާންސްޕޯޓް މިނިސްޓްރީން މިހާރުވަނީ އެމިނިސްޓްރީގެ "ސިމްސް ކަސްޓަމަރ ޕޯޓަލް" ތެރެއިން ޑިޖިޓަލް ލައިސަންސްގެ ޚިދުމަތް ދޭން މިމަހުގެ 5ވަނަ ދުވަހުން ފެށިގެން ފަށާފައެވެ.
"ސިމްސް ކަސްޓަމަރ ޕޯޓަލް" އަކީ ދަޢުލަތުގެ އީފާސް ނިޒާމުގެ ތެރެއިން ބެނުންކުރެވޭ ޕޯޓަލްއެކެވެ. އިފާސް ލޮގިންއާއިއެކު މިޕޯޓަލްއަށް ވަނުމުން، ލައިސަންސް އޮންނަ މީހެއް ނަމަ ޑިޖިޓަލް ލައިސަންސް މިހާރު ބަލާލެވޭނެއެވެ.
ޓްރާންސްޕޯޓް މިނިސްޓްރީން ވިދާޅުވީ ޑިޖިޓަލް ލައިސަސްގެ އިތުރުން، ޕޯޓަލްއަށް ލޮގިން ވުމުން ލައިސަންސާ ގުޅުންހުރި އެހެނިހެން ޚިދުމަތްތައް މިހާރު ލިބޭނެ ކަމަށެވެ. އެގޮތުން ލައިސަން ނެގުމަށް ހުށައެޅުމާއި އަދި ޕްރޮސެސްވަމުންދާ ފޯމުތައްވެސް ފެންނާނެއެވެ.
އަދި މިހާރު މަސައްކަތް ކުރަމުންދަނީ މިޕޯޓަލް ތެރެއިން ލައިސަންސް ޓެސްޓް ހެދުމުގެ މަސައްކަތް ފެށުމަށެވެ. މިމަސައްކަތްވެސް މާދަމާ ފެށުމަށްޓަކައި މިހާރު މަސައްކަތް ކުރަމުން އަންނަ ކަމަށް އެމިނިސްޓްރީން ވިދާޅުވެއެވެ.