ގެއްލިގެން ހޯދަމުންދާ އާސިރު ކާރެއްގައި އެއަރޕޯޓަށް ފައިބާ ޓަރމިނަލަށް ވަންނަ މަންޒަރު ސީސީޓީވީ ފުޓޭޖުން ފެންނަކަމަށާއި، އެހެން ނަމަވެސް އޭނާ އެއްވެސް ތާކަށް ދަތުރުކުރިކަން މިހާތަނަށް ބެލިބެލުމުން އެނގެން ނެތްކަމަށް ފުލުހުން ވިދާޅުވެއްޖެއެވެ.
ވީނުވީއެއް ނޭނގިގެން ސ.މަރަދޫ، ގަސްކަރަ މުޙައްމަދު އާސިރު އިސްމާއިލް (31 އަހަރު) ގެއްލިގެން ފުލުހުންނަށް ރިޕޯޓްކޮށްފައިވަނީ މިމަހުގެ 5 ވަނަ ދުވަހުއެވެ. މައްސަލަ ރިޕޯޓް ކޮށްފައިވަނީ މިމަހުގެ 4ވަނަ ދުވަހު 19:30 ހާއިރުން ފެށިގެން އޭނާގެ އެއްވެސް ޚަބަރެއް ނުވާކަމަށްބުނެއެވެ. އަދި އޭނާ ހޯދުމަށް ފުލުހުން ވަނީ އޭނާގެ ފޮޓޯވެސް އާއްމުކޮށްފައެވެ.
މި މީހާ ހޯދުމުގެ މަސައްކަތް ކުރިއަށްދާގޮތުގެ ތަފްސީލް މީޑިއާއާއި ޙިއްސާކުރައްވަމުން ފުލުހުން ވިދާޅުވީ މިހާތަނަށް ކުރި މަސައްކަތުންވެސް، އޭނާ ފެނިފައި ނުވާކަމަށެވެ.
އޭނާ ހޯދުމުގެ މަސައްކަތުގައި ފުލުހުން ވަނީ މާލޭގެ ވަރަށް ގިނަ ސަރަޙައްދުތަކުގެ ސީސީޓީވީ ފުޓޭޖްތައް ބަލާފައެވެ. އެގޮތުން މާލެއާއި، އެއަރޕޯޓްގެ ފުޓޭޖްތަކުން އާސިރުގެ ހަރަކާތްތައް ފެންނަ ވީޑިއޯތަކެއް ވަނީ ހޯދާފައެވެ. މިވީޑިއޯތަކުން ފެންނަނީ 4 ފެބްރުއަރީ ވަނަ ދުވަހުގެ ރޭ 19:20 ހާއިރު، ބޮޑުތަކުރުފާނު މަގު ހުޅުލޭ ފެރީ ޓަރމިނަލް ކައިރިން ހުދު ކުލައިގެ ޓެކްސީއަކަށް އޭނާ އަރާ މަންޒަރެވެ. އަދި އެ ޓެކްސީ ގޮސް އެއަރޕޯޓް ޓަރމިނަލަށް މަޑުކުރުމުން އާސިރު ޓެކްސީން ފައިބައިގެން ގޮސް ޓަރމިނަލަށް ވަންނަ މަންޒަރު ސީސީޓީވީ ފުޓޭޖަކުން ފެނިފައިވާ ކަމަށް ފުލުހުން ވަނީ ވިދާޅުވެފައެވެ.
އެހެން ނަމަވެސް އޭނާ އެއްވެސް އެއަރލައިނަކުން ރާއްޖެއިން ބޭރަށް ނުވަތަ ރާއްޖޭގެ އެހެން ރަށަކަށް ދިޔަކަންވެސް މިހާތަނަށް ބެލި ބެލުމުން އެނގިފައި ނުވާކަމަށް ފުލުހުން ވަނީ ހާމަކުރައްވާފައެވެ.
މިއާއި ގުޅިގެން އާސިރު ހޯދުމުގެ މަސައްކަތުގައި މާލޭގެ އިތުރު ސަރަޙައްދުތަކުގެ ސީސީޓީވީ ކެމެރާތަކާއި އެއަރޕޯޓްގެ އިތުރު ސަރަޙައްދުތަކުގެ ފުޓޭޖް ބެލުމުގެ މަސައްކަތް ފުލުހުން އަންނަނީ ކުރަމުންނެވެ. އަދި އަތޮޅުތަކުގެ ޕޮލިސް ސްޓޭޝަންތައް މެދުވެރިކޮށް އޭނާ ހޯދުމުގެ މަސައްކަތް، މެދުކެނޑުމެއް ނެތި ކުރިއަށްދާކަމަށް ފުލުހުން ވިދާޅުވިއެވެ.
ފުލުހުން ވަނީ މުޙައްމަދު އާސިރު އިސްމާޢީލްގެ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ގަލޮޅޮ ޕޮލިސް ސްޓޭޝަންގެ 9631696 އަށް ގުޅައި އެކަން ހިއްސާކޮށްދެއްވުމަށް އެދިވަޑައިގެންފައެވެ.