ޔަހޫދީން އަތްގަދަކޮށްފައިވާ ފަލަސްޠީނުގެ ހުޅަނގު އައްސޭރީގައި ޔަހޫދީންގެ ޢާންމުންގެ މީހަކު ބަޑީގެ ހަމަލާއެއްދީ ފަލަސްޠީނުގެ މީހަކު ޝަހީދުކޮށްލައިފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޝަހީދުކޮށްލާފައި ވަނީ އުމުރުން 27 އަހަރުގެ މިޘްކާލް ސުލައިމާން ރައްޔާން ކަމުގައެވެ.
ރައްޔާން ޝަހީދުކޮށްލާފައި ވަނީ ހުޅަނގު އައްސޭރީގެ އުތުރުގައި އޮންނަ ނާބްލުސްގެ އަވަށެއް ކަމުގައިވާ ޤަރާވަތް ބަނީ ޙަސަނުގައި ޔަހޫދީންނާއި ފަލަސްޠީނު ރައްޔިތުންނާ ދެމެދު ހިނގި ކުރިމަތިލުމެއްގެ ތެރެއިންނެވެ. އޭނާ ޝަހީދުކޮށްލާފައި ވަނީ އޭނާގެ ބޮލަށް ބަޑިޖަހައިގެންނެވެ.
ފަލަސްޠީނުގެ ބިންތަކުގައި ވަޒަންވެރިކޮށްފައިވާ ޔަހޫދީންނާއި ފަލަސްޠީނުގެ ރައްޔިތުންނާ ދެމެދު ހިނގި ކުރިމަތިލުންތައް ހުއްޓުވީ ޔަހޫދީ އިސްރާޢީލުގެ ސިފައިންނެވެ. ހުޅަނގު އައްސޭރީގައި އިސްރާޢީލުން އަތްގަދަކޮށްފައިވާ މުސްލިމުންގެ ބިންތަކުގައި 475,000 އަށްވުރެ ގިނަ ޔަހޫދީން ވަޒަންވެރިވެގެން ދިރިއުޅެއެވެ.
ހުސްވި ޖަނަވަރީ މަހަކީ، 2015 ވަނަ އަހަރަށް ފަހު ފަލަސްޠީނުގެ ރައްޔިތުންނަށް ކުރިމަތިވި އެންމެ ލޭއޮހޮރުވުންތައް ގިނަ އެއް މަހެވެ. ޔަހޫދީ ޖައްބާރު ޓެރެރިސްޓު ސިފައިން ޖަނަވަރީ މަހުގެ ތެރޭގައި ފަލަސްޠީނުގެ ބިންތަކަށް އަރައި ހިންގި ލާއިންސާނީ އުދުވާންތަކުގައި ފަލަސްޠީނުގެ 37 އަށްވުރެ ގިނަ މީހުން ވަނީ ޝަހީދުކޮށްލާފައެވެ. އަދި، ގިނަ ޢަދަދެއްގެ ބަޔަކު ޒަޚަމުކޮށްލާފައެވެ.
ޖަނަވަރީ މަހު ޖިނީން ރެފިޔުޖީ ކޭމްޕަށް ވަދެ ޔަހޫދީ ޖައްބާރު ސިފައިން ހިންގި އުދުވާންތަކެއްގައި އެންމެ ދުވަހެއްގެ ތެރޭގައި ވެސް ފަލަސްޠީނުގެ 11 ޝަހީދުކޮށްލާފައިވެއެވެ. އޭގެ ތެރޭގައި އުމުރުން ދުވަސްވީ އަންހެނެއް ވެސް ހިމެނެއެވެ. އަދި، ކުށެއް ނެތް ކުޑަކުދިން ވެސް ހިމެނެއެވެ.
ޖަނަވަރީ މަހު ޔަހޫދީ ޖައްބާރު ސިފައިންގެ ޝިކާރައަކަށްވެ ޝަހީދުވި ފަލަސްޠީނުގެ ރައްޔިތުންގެ ތެރޭގައި އުމުރުން 18 އަހަރުން ދަށުގެ ހަ ކުދިން ހިމެނެއެވެ. އޭގެ ތެރެއިން އުމަރު ލުޠުފީ ޚުމޫރަކީ އެންމެ 14 އަހަރުގެ ކުއްޖެކެވެ. އަދި، އުމުރުން 60 އަހަރުގެ މަޖުދާ ޢަބްދުލް ފައްޠާޙް އުބައިދު ޝަހީދުކޮށްލާފައި ވަނީ، އަމިއްލަ ގޭގައި ޤުރުއާން ކިޔަވަން އިންދައެވެ.
ހުސްވި 2022 ވަނަ އަހަރަކީ ފަލަސްޠީނުގެ މުސްލިމުންނަށް ބިރުވެރި އަދި ނުރައްކާތެރި އަހަރެކެވެ. ޔަހޫދީ ޖައްބާރު ޓެރެރިސްޓު ސިފައިން ހުޅަނގު އައްސޭރިއަށް އަރައި ހިންގި އުދުވާންތަކުގައި ފަލަސްޠީނުގެ 200 އަށްވުރެ ގިނަ މީހުން ވަނީ ޝަހީދުކޮށްލާފައެވެ. އަދި، ގިނަ ޢަދަދެއްގެ ބަޔަކު ޒަޚަމުކޮށްލާފައެވެ. މީގެ ތެރޭގައި ގިނައީ ޢާންމުންނާއި ކުޑަކުދިންނެވެ.